قىتاي عالىمدارى ادامدى قان تامىرلارىنا قاراپ تانيتىن جۇيە ويلاپ تاپتى

نۇر-سۇلتان. قازاقپارات - ەستەرىڭىزدە بولسا، ادامدى جۇزىنەن، ساۋساق ىزىنەن، داۋسىنان، كوزىنىڭ قاراشىعىنان، ءجۇرىس-تۇرىسىنان، قيمىل-قوزعالىسىنان، ءتۇر-تۇلعاسىنان، ءتىپتى، كولەڭكەسىنەن تانيتىن جۇيە تۋرالى ءبىرسىدىرعى جازعانبىز.

سوڭعى رەت ادامدى كولەڭكەسىنەن تانۋ جۇيەسى جايىندا ايتىپ وتكەنبىز . سونداي-اق، ادامدى تانۋ تەحنولوگياسىن تۇرىك عالىمى ويلاپ تاپقانىن دا كەزىندە حابارلاعانبىز. بۇدان بولەك، ادام قۇقىعىنا قۇرمەتپەن قارايتىن باتىس ەلدەرىندە، دالىرەگى، ا ق ش-تا پوليتسياعا ادامدى تانۋ جۇيەسىن پايدالانۋعا تىيىم سالعانى جونىندە دە ءسوز قوزعاعانبىز.  

مۇنىڭ ءبارىن نەگە تاپىشتەپ ايتىپ وتىرمىز؟ ادامدى تانۋ جۇيەسى جىل ەمەس، اي ەمەس، اپتا ساناپ جەتىلدىرىلىپ كەلەدى. ەندى ادامدى قولىنداعى قان تامىرلارى مەن تەرى استىنداعى كاپيلليارىنا قاراپ تانيتىن تەحنولوگيا جاسالدى.

قىتاي ماماندارى بۇل جايىندا Zhongguo Xinwenwang اقپارات كوزى حابار تاراتتى. اتالمىش تەحنولوگيا AirWave دەپ اتالادى جانە جاساندى ينتەللەكتى ارقىلى جۇمىس ىستەيدى. ول ءار ادامنىڭ قايتالانبايتىن قان تامىرلارى مەن كاپپيلليارىنا قاراپ تانۋعا نەگىزدەلگەن. ادام اتالمىش تەحنولوگيا كومەگىمەن ءوزىنىڭ سايكەستىگىن تەكسەرۋ ءۇشىن قولىن سەرمەسە جەتىپ جاتىر. ول ءۇش سەكۋند ىشىندە ميللياردتاعان قولداردىڭ ىشىنەن ءدال باسىپ تاني الادى. وسى تەحنولوگيانى ويلاپ تاپقان Melux كومپانياسىنىڭ نەگىزىن قالاۋشى سە شينلۋدىڭ ايتۋىنشا، بۇل جۇيە كوپشىلىك جينالاتىن قوعامدىق ورىنداردى قولدانىلاتىن بولادى. ونىڭ ىشىندە، قولما-قول اقشاسىز ەسەپ ايىرىسۋ بارىسىندا قولدانىلۋى مۇمكىن.