قاسىم- جومارت توقايەۆتىڭ قىتايعا ساپارىنىڭ ءۇش ەرەكشەلىگى اتالدى

نۇر- سۇلتان. قازاقپارات – ق ر پرەزيدەنتىنىڭ كومەكشىسى مۇرات نۇرتىلەۋوۆ مەملەكەت باسشىسى قاسىم- جومارت توقايەۆتىڭ قىتايعا ساپارىنىڭ ءۇش ەرەكشەلىگىن اتادى، دەپ حابارلايدى قازاقپارات ءتىلشىسى.

«ق ر پرەزيدەنتى ق ح ر ءتوراعاسى شي جينپين مىرزانىڭ شاقىرۋى بويىنشا 10-12 - قىركۇيەكتە مەملەكەتتىك ساپار شەگىپ، ونىڭ بارىسىندا ءبىرقاتار ەكىجاقتى كەلىسسوزدەر وتكىزىپ قايتتى. وسى رەتتە، ق ر پرەزيدەنتىنىڭ ق ح ر- عا ساپارىنىڭ ءۇش ەرەكشەلىگىن اتاپ وتكىم كەلەدى. بىرىنشىدەن، اتالعان ءىس- شارا مەملەكەت باسشىسىنىڭ پرەزيدەنتتىك سايلاۋدان كەيىنگى قىتايعا العاشقى مەملەكەتتىك ساپارى، جالپى العاندا العاشقى ساپار بولدى. قىتاي تاراپى دا وعان ۇلكەن باعا بەرىپ وتىر. ەكىجاقتى قارىم- قاتىناستارداعى باسىمدىق بار ەكەندىگىن سەزىنىپ، ولار دا ءوز تاراپتارىنان بىزبەن ەتەنە جۇمىس ىستەۋگە، بىرگە دامۋعا، حالىقتارىمىزدىڭ يگىلىگى ءۇشىن بىرگە جۇمىس ىستەۋگە دايىن ەكەنىن راستادى» ، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، بۇل، نۇر- سۇلتان مەن بەيجىڭ اراسىنداعى قارىم- قاتىناستاردىڭ قازىرگى دەڭگەيى جانە ماڭىزىمەن قاتار ونىڭ بولاشاق تراەكتورياسىن ايقىنداۋ تۇرعىسىنان ەرەكشە باسىمدىققا يە ەكەندىگىن كورسەتتى.

«ءوز كەزەگىندە پرەزيدەنت توقايەۆ ساباقتاستىقتى ساقتاي وتىرىپ، ءوزارا بايلانىستار مەن ىنتىماقتاستىقتى تىڭ بەلەسكە شىعارۋعا قازاقستان مۇددەلى ەكەنىن مالىمدەدى. ايتا كەتۋ كەرەك، قىتاي تاراپى دا بۇعان ۇلكەن ءمان بەرەتىندىگىن كوردىك. ولار بىزبەن ساۋدا- ەكونوميكالىق قاتىناستاردى، كولىكتىك، لوگيستيكالىق، وندىرىستىك، سونىمەن قاتار جاڭا باعىتتاردا جۇمىس ىستەۋگە دايىن ەكەندىكتەرىن راستادى» ، - دەدى پرەزيدەنت كومەكشىسى.

م. نۇرتىلەۋوۆتىڭ ايتۋىنشا، ەكىنشىدەن، ساپار دۇنيەجۇزىلىك ساياسات پەن ەكونوميكاداعا اۋمالى- توكپەلى كەزەڭدە ءوتىپ وتىر.

«بۇل ءبىزدىڭ قاتىناستاردىڭ ستراتەگيالىق سيپاتقا تولىق سايكەس ەكەندىگىن تاعى دا كورسەتتى. سايكەسىنشە، وسى تۇستا ەكى ەل ليدەرلەرى ايماقتىق جانە حالىقارالىق ماسەلەلەر توڭىرەگىندە پىكىر الماستى. ورتاق ۇستانىمدارىن، سونىمەن قاتار وزەكتى پروبلەملالار بويىنشا پوزيتسيالارىن توپشىلادى» ، - دەدى ول.

ۇشىنشىدەن، مەملەكەت باسشىسىنىڭ كومەكشىسى پرەزيدەنت ساپارى قىتايدىڭ 70 جىلدىق مەرەيتويى قارساڭىندا ۇيىمداستىرىلعانىنا نازار اۋدارتتى.

«وسى قاداممەن ءبىز قىتايمەن دوستاس حالىق ەكەندىگىمىزدى كورسەتتىك. تاتۋ كورشىلىكتى كورسەتتىك. ءوزارا ءتيىمدى ىقپالداستىقتى ءارى قاراي جان- جاقتى بەكىتە تۇسۋگە دايىندىعىمىزدى بىلدىردىك» ، - دەدى م. نۇرتىلەۋوۆ.