ءماجىلىس دەپۋتاتى ەلورداداعى كورنەكتى كوشەلەردىڭ بىرىنە جوشى حان ەسىمىن بەرۋدى ۇسىندى
«التىن وردانىڭ 750 جىلدىعى اياسىندا ءتيىستى ماسەلەلەرگە ءمان بەرۋڭىزدى سۇرايمىن. بىرىنشىدەن، استانامىز نۇر- سۇلتان قالاسىنداعى كورنەكتى كوشەلەردىڭ بىرىنە جوشى حان ەسىمىن بەرۋ جانە ول كوشە بويىندا ۇلىس حانىنىڭ ەڭسەلى ەسكەرتكىشىن ورناتۋ - ۇلتتىق رۋحىمىزدى اسقاقتاتىپ، ەلدىگىمىزدى ءوز ازاماتتارىمىزعا عانا ەمەس، ەلوردامىزدىڭ ءاربىر قوناعىنا پاش ەتەر شارا بولماق»، - دەدى ب. سماعۇل ۇكىمەت باسشىسى اسقار ءماميننىڭ اتىنا جولداعان دەپۋتاتتىق ساۋالىندا.
سونىمەن قاتار ول جوشى حاننىڭ قاراعاندى وبلىسىنداعى، جەزقازعاننىڭ سولتۇستىك- شىعىسىندا 50 شاقىرىمداي جەردەگى جوشى حان كەسەنەسى - شىڭعىس حان مەن ونىڭ اۋلەتىنەن جەر بەتىندە قالعان جالعىز بەلگى ەكەنىن اتاپ ءوتتى.
«سوندىقتان ونىڭ جانىنان بۇل مازاردىڭ دۇنيەجۇزى تاريحىن وزگەرتكەن دارا تۇلعاعا تيەسىلى ەكەنىن الىستان ايگىلەپ تۇرار ايبىندى ەسكەرتكىش- بەلگى تۇرعىزۋ ماڭىزدى. شىڭعىس حاننىڭ ۇلكەن ۇلىنا ارنالعان تاريحي كەشەن تەك شىعىس ەلدەرى ءۇشىن عانا ەمەس، سونداي- اق بۇكىل الەمدەگى ساياحاتشىلار مەن زەرتتەۋشىلەر ءۇشىن زور قىزىعۋشىلىق تۋدىرىپ، تۋريستىك تارتىمدى ورىنعا اينالارى ءسوزسىز»، - دەدى ب. سماعۇل.
ونىڭ سوزىنە قاراعاندا، التىن وردانىڭ 750 -جىلدىعى اياسىندا جوشى حان، الاشا حان كەسەنەلەرىنە كەشەندى تۇردە ارحەولوگيالىق، ەتنوگرافيالىق زەرتتەۋ جۇمىستارى جۇرگىزىلگەنى ءجون. كەسەنەدەگى تاڭبالار مەن جازۋلاردى تاريحي، تىلدىك تۇرعىدا زەرتتەپ، رەستاۆراتسيا جانە كونسەرۆاتسيا جۇمىستارىن جۇرگىزۋ قاجەت.
«بەسىنشىدەن، ⅩⅢ عاسىردىڭ ەسكەرتكىشى جانە پلانەتامىزداعى شىڭعىس حان اۋلەتىنەن قالعان جالعىز بەلگى رەتىندە جوشى حان كەسەنەسىن كەلەشەكتە يۋنەسكو-نىڭ «دۇنيەجۇزىلىك مادەني مۇرا تىزىمىنە» ەنگىزۋ جولدارىن قاراستىرعان ءجون. سەبەبى، حالىقارالىق بەدەلدى تۋريستىك وپەراتورلار، جەكە ساياحاتشىلار ساپارىن جوسپارلاعاندا، كوبىنە يۋنەسكو تىزىمىنە ەنگەن ەسكەرتكىشتەرگە قاراپ، باعىت- باعدار تۇزەدى»، - دەدى دەپۋتات.
اۆتور: رۋسلان عابباسوۆ