اسقار مامين ارىس قالاسىنداعى قۇرىلىس جۇمىستارىن كوردى

ارىس. قازاقپارات - بۇگىن ەلىمىزدىڭ پرەمەر-ءمينيسترى اسقار مامين ارىس قالاسىنا ءىس-ساپارمەن كەلىپ، جوندەۋ جۇمىستارى اياقتالعان نىسانداردى ارالاپ كوردى.

ۇكىمەت باسشىسى جاڭادان سالىنعان تۇرعىن ۇيلەردىڭ قۇرىلىسىمەن تانىسىپ، اتقارىلعان جۇمىستارعا باعاسىن بەردى، دەپ حابارلايدى قازاقپارات ءتىلشىسى.

ارىسقا كەلگەن اسقار مامين الدىمەن قالاعا كىرە بەرىستە جاڭادان بوي كوتەرگەن تۇرعىن ۇيلەردىڭ قۇرىلىسىمەن تانىستى. باسپانالاردىڭ ءىشىن كورىپ، قۇرىلىسشىلارمەن سويلەستى. بولات وتەمۇراتوۆ قورىنىڭ دەمەۋشىلىگىمەن سالىنىپ جاتقان 50 ءۇي 100 وتباسىعا لايىقتالعان. قازىرگى تاڭدا تۇرعىن ۇيلەردىڭ 10 ى ياعني 20 پاتەردىڭ قۇرىلىس جۇمىستارى تولىعىمەن اياقتالعان.

مەردىگەر كومپانيا باسشىلىعىنىڭ ايتۋىنشا، تۇرعىن ۇيلەرگە ءىشىنارا تۇرمىستىق تەحنيكا مەن جيھازدار قويىلعان. جوبانىڭ جالپى قۇنى 80 ميلليون تەڭگەنى قۇراسا، ءبىر ءۇيدى سالۋ 16,5 ميلليون تەڭگەگە تۇسكەن.

«باسپانالارعا سۋ مەن جارىق كىرگىزىلگەن. 45 ءۇيدىڭ ىرگەتاسى قالانىپ، قويىلعان. 38 ءۇيدىڭ شاتىرى جابىلىپ، تاعى 5 ءۇيدىڭ قابىرعاسى قالاندى. 25- قىركۇيەك كۇنى تاعى 10 ءۇيدىڭ قۇرىلىسىن اياقتاۋدى جوسپارلاپ وتىرمىز. ال، جالپى 25- قازاندا بارلىق ءۇيدى تۇرعىندارعا تاپسىرامىز دەگەن ويدامىز»، - دەيدى مەردىگەر كومپانيانىڭ ديرەكتورى اۆاز باكيەۆ.

اۆتور: اينۇر اقبايەۆا