قانداستارىمىزدى قولداۋدا «وتانداستار قورى» ۇلكەن ماقسات جولىندا قىزمەت ەتەدى

نۇر-سۇلتان. قازاقپارات - ەلىمىز تاۋەلسىزدىك العاننان باستاپ اتاجۇرتقا الەمنىڭ ءار تاراپىنان ميلليوننان استام اعايىن ورالدى.

ۇلى دالا ەلىنە بەت تۇزەگەن كوشتىڭ تىزگىنىن ۇستاعان ازاماتتاردىڭ قاتارىندا قاراپايىم قازاقتار، ءبىلىمدى جاستارمەن قاتار بىلىكتى ماماندار دا كوپ. ولاردىڭ ءبىرى كاسىپتە، ەندى ءبىرى ءبىلىم مەن عىلىم سالاسىندا ەڭبەك ەتىپ ءجۇر.

قانداستارىمىزدىڭ ءالى دە تاريحي وتانىنا كوپتەپ ورالارى زاڭدىلىق. وسى ورايدا شەتەلدەگى وتانداستاردى قولداۋ تۋرالى مەملەكەتتىڭ بۇگىنگى اتقارىپ جاتقان جۇمىسى جايىندا «وتانداستار قورى» ك ە ا ق پرەزيدەنتى، مەملەكەت قايراتكەرى نۇرتاي ابىقايەۆپەن جۇرگىزگەن سۇحباتتى ۇسىنىپ وتىرمىز.

- نۇرتاي ءابىقاي ۇلى، ەلباسىمىز شەتتەگى جانە ەلگە كوشىپ كەلگەن قانداستارعا جان- جاقتى قولداۋ، كومەك جاساۋ ءۇشىن «وتانداستار قورى» ك ە ا ق قۇرىپ، قازاقستانعا كوشىپ كەلگەن اعايىنداردىڭ بەيىمدەلۋىنە كومەك بەرۋ جانە وسى جۇمىستاردى ىسكە اسىرۋدا زاڭنامالىق تۇرعىدان قامتاماسىز ەتۋدى تاپسىردى. قازىرگى ۋاقىتتا وسى جۇمىستار قانداي دەڭگەيدە جۇرگىزىلىپ جاتقانىن ايتىپ بەرسەڭىز؟

- حالقىمىز «ەلگە ەل قوسىلسا - قۇت» دەگەن. مەملەكەت تاۋەلسىزدىكتىڭ ارقاسىندا، ەلباسىنىڭ شەتتەگى قانداستارىمىزدى قولداۋ ساياساتىنىڭ ناتيجەسىندە وتانعا قازاقتىڭ اقىل- پاراساتى، ءبىلىم- بىلىكتىلىگى جانە كۇش- قۋات، سونىمەن قاتار ەلىمىزگە مادەني، رۋحاني، عىلىمي- تەحنيكالىق جانە ەكونوميكالىق بايلىق كەلىپ قوسىلدى دەسەم بولادى.

قازىرگى ۋاقىتتاعى جۇمىستارعا توقتالاتىن بولسام، قازاقستاننىڭ قوعامدىق جاڭارۋى اياسىندا ۇكىمەت بەكىتكەن 2018-2022 -جىلدارعا ارنالعان شەتەلدەگى قازاقتاردى قولداۋ بويىنشا ءىس- شارالار جوسپارىنا سايكەس قانداستارىمىزدىڭ ءبىلىم الۋىنا جانە انا ءتىلىن ساقتاپ قالۋىنا جاعداي جاساۋ، شەتەلدە تۇرىپ جاتقان قازاق دياسپوراسىمەن مادەني- گۋمانيتارلىق جانە اقپاراتتىق- ۇيلەستىرۋ ىسىنە بايلانىستى قامتاماسىز ەتۋ جۇمىستارىن جۇرگىزۋدەمىز.

شەتەلدەگى جانە تاريحي وتانىنا كوشىپ كەلگەن اعايىنداردى جۇمىسپەن قامتاماسىز ەتۋ ماقساتىندا «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسى زاڭ جوباسىنىڭ تۇجىرىمداماسى جانە «شەتەلدەگى وتانداستاردى مەملەكەتتىك قولداۋ تۋرالى» قازاقستان رەسپۋبليكاسىنىڭ زاڭ جوباسى دايىندالىپ، «وتانداستار قورى» ك ە ا ق جانىنان قۇرىلعان عىلىمي- ساراپتامالىق كەڭەستە تالقىلانىپ، قوعام تاراپىنان ۇلكەن ماڭىزعا يە بولدى. سونىمەن قاتار شەتەلدەگى قازاق دياسپوراسىن جانە رەپاترياتسيانى قولداۋ بويىنشا 2020-2030 -جىلدارعا ارنالعان مەملەكەتتىك باعدارلامانىڭ تۇجىرىمداماسى قازاقستان رەسپۋبليكاسى ۇكىمەتىنىڭ شەتەلدە تۇراتىن وتانداستارمەن مادەني- گۋمانيتارلىق بايلانىستاردى دامىتۋ بويىنشا ۇكىمەت جانىنداعى ۆەدومستۆوارالىق كوميسسياسىندا قارالىپ، قولداۋ تاۋىپ وتىر.

زاڭ جوباسىنىڭ اياسىندا «قازاق كارتاسى» - تۇلعانىڭ قازاق حالقىنا تيەسىلىگىن راستايتىن قۇجاتتى دايىنداۋ جانە ورىنداۋ قاجەتتىلىگى پايدا بولدى. بۇل قۇجات وتانمەن بايلانىستاردى جانە ۇلتتىق مادەني مۇرانى ساقتاۋ ءۇشىن شەتەلدە تۇراتىن ەتنوستىق قازاقتاردى قولداۋدىڭ ماڭىزدى قۇرالى بولادى. بۇل قۇجات قازاق ءتىلىن جانە سالت- ءداستۇرىن ساقتاۋعا جانە دامىتۋعا عانا ەمەس، سونداي-اق ءبىزدىڭ ەلگە قازاق حالقىنا تيەسىلى تۇلعالاردىڭ كوشۋىنە سەپتىگىن تيگىزۋمەن قوسا، شەتەلدەگى قازاق دياسپوراسىنىڭ تاريحي وتانمەن جان- جاقتى بايلانىستارىن جانداندىرۋعا سەرپىن بەرەدى جانە تابىستى قازاقتار تاراپىنان يننوۆاتسيالار مەن ينۆەستيتسيالاردى بەلسەندى تۇردە تارتۋ ءۇشىن جاڭا جاعدايلار جاسايدى.

زاڭ جوباسىندا «قازاق كارتاسىن» («وتان» كارتاسى») الۋدىڭ نەگىزگى شارتتارى مەن ونى يەلەنۋشى -  تۇلعالاردىڭ قۇقىقتارى الدىن الا قاراستىرىلۋدا. ولاردىڭ ىشىندە قوسىمشا قۇجاتتاردى بەرمەي قازاقستان شەكارالارىنان بىرنەشە رەت وتۋگە قۇقىق بەرەتىن ۇزاق مەرزىمدى كوپ مارتەلىك ۆيزانى تەگىن الۋ (شاقىرۋ، جۇمىسقا رۇقسات جانە ت. ب. )، قازاقستان رەسپۋبليكاسىنىڭ ازاماتتارىمەن تەڭ قازاقستان اۋماعىندا كاسىپكەرلىك قىزمەتپەن اينالىسۋ، مەملەكەتتىك وقۋ ورىندارىندا تەگىن ورتا ءبىلىم الۋ، مەملەكەتتىك جوعارى وقۋ ورنىندا كونكۋرستىق نەگىزدە تەگىن جوعارى ءبىلىم الۋ، جەكەمەنشىك وقۋ ورىندارىندا اقىلى ءبىلىم الۋ جانە تاعى دا باسقالار.

- سوڭعى ۋاقىتتا بۇقارالىق اقپارات كوزدەرىندە «وتانداستار قورى» تاراپىنان قوزعالىپ جاتقان ماسەلەلەر تۋرالى ءجيى وقيمىز. سولاردىڭ ءبىرى - «ءبىر تەرەزە» قاعيداسى نەگىزىندە قۇجاتتاردى رەسىمدەۋگە قاتىستى قانداي شارالار اتقارىلۋدا؟

- اعايىنداردى قۇجاتتاندىرۋ وسى ۋاقىتقا دەيىن ەڭ ءبىر كۇردەلى دە وزەكتى ماسەلە بولىپ وتىر. تالداۋ قورىتىندىسى بويىنشا ورالماندار تولىققاندى ىقپالداسۋ جانە ازاماتتىق الۋ ءۇشىن قازاقستان رەسپۋبليكاسىنىڭ اۋماعىندا عانا 7 ءتۇرلى ۇيىمعا 10 رەت ءوتىنىش بەرۋگە جانە شامامەن 46 قۇجات ۇسىنۋعا ءماجبۇر ەكەندىگى انىقتالدى.

«وتانداستار قورى» مەملەكەتتىك ورگانداردىڭ كورسەتەتىن قىزمەتتەرىنىڭ بارلىق كەشەنىن «ءبىر تەرەزە» قاعيداسىمەن اۆتوماتتاندىرۋدى جانە وڭتايلاندىرۋدى ۇسىنادى. بۇل ءبىرىنشى كەزەكتە ءتولقۇجات پەن تىركەۋگە قاتىستى. ناتيجەسىندە، ەلگە كەلگەن وتانداستار ح ق ك و- عا از عانا قۇجاتتاردى قوسىمشا تىزىمىمەن ءبىر رەت ءوتىنىش بەرۋ ارقىلى ءبىر جەردەن جاۋاپ الا الادى.

وسىلايشا قىزمەت الۋدىڭ ۋاقىتى قىسقارادى جانە بىرنەشە بيۋروكراتيالىق اۋرە-سارساڭ جويىلادى. ياعني، شەنەۋنىكتەرمەن تىكەلەي بايلانىس، ۋاقىت جوعالتۋ، كولىك شىعىندارى الىنىپ تاستالىپ، ءتىل مەن زاڭداردى بىلمەۋدەن تۋىندايتىن قوسىمشا سىبايلاس جەمقورلىق تاۋەكەلدەرى ءۇشىن جاعدايلار ازايادى.

«وتانداستار قورى» ك ە ا ق قۇرىلعان كەزەڭنەن باستاپ وسى ءبىر كۇردەلى ماسەلەنى شەشۋ ءۇشىن ءتيىستى مەملەكەتتىك ورگاندارمەن تىعىز جۇمىس ۇيىمداستىرىپ كەلەدى. قازىرگى تاڭدا وسى وتكەلەكتىڭ، قاعازباستىلىقتىڭ جولىن جەڭىلدەتۋ ءۇشىن «ءبىر تەرەزە» قاعيداسى بويىنشا ارنايى «جول كارتاسى» جاسالىپ، سول نەگىزدە ءتيىستى مەملەكەتتىك ورگاندارمەن جۇمىستار جاسالۋدا. ياعني، بيزنەس- پروتسەستەردى تۇبەگەيلى جاقسارتۋ جانە وتىنىشتەر سانىن 10 نان 5 كە دەيىن (قىسقا مەرزىمدى پەرسپەكتيۆادا)، ال ودان ءارى 2 گە دەيىن (ۇزاق مەرزىمدى پەرسپەكتيۆادا) ۇسىنىلاتىن قۇجاتتاردى 46 دان 20 عا دەيىن قىسقارتۋ جونىندە ۇسىنىستار ازىرلەنۋدە.

-  كەزىندە ءوزىڭىز الەم ەلدەرىندەگى قانداستارىمىزعا ارنالعان ءبىرىڭعاي بايلانىس ورتالىعى قىزمەتىنىڭ ىسكە قوسىلعاندىعى جايلى ب ا ق ارقىلى وي ءبولىسىپ ەدىڭىز. بۇگىندە ەلگە ورالعان جانە ورالۋعا نيەتتى قانداستارىمىزدى قولداۋ شارالارىنا تولىعىراق توقتالساڭىز؟

- ءبىزدىڭ قىزمەتىمىزدىڭ ءبىرى - تاريحي وتانىنا تابان تىرەگەن قانداستاردىڭ جاڭا ورتاعا بەيىمدەلۋىنە كومەك كورسەتۋ. بۇل جەردە وتانداستاردىڭ ۇلتتىق- ەتنوستىق جانە ەكونوميكالىق ورتاعا جوعارعى دەڭگەيدە ءسىڭىسۋى، ىسكەر ورتادا ءوزىن تانىتۋى مەن تىرشىلىك ارەكەتى ءۇشىن تەڭ مۇمكىندىك پەن جاعداي تۋدىرىلىپ، ەتنوستىق بەيىمدەلۋىنە بارىنشا كومەك كورسەتىلەدى. سوعان بايلانىستى ءبىرىڭعاي بايلانىس ورتالىعى مەن قوعامدىق قابىلداۋ ەندىرىلىپ، وتانداستاردى قولداۋ قىزمەتى ۇيىمداستىرىلدى.

ءبىرىڭعاي بايلانىس ورتالىعىنىڭ وپەراتورلارى تەلەفون جانە مەسسەندجەرلەر ارقىلى رەپاترياتسيا تەتىكتەرى جانە ءتيىستى مەملەكەتتىك قىزمەتتەردى، ەلىمىزدە بيزنەس جۇرگىزۋدى مەملەكەتتىك قولداۋ شارالارىنا، قور مەن دۇنيەجۇزىلىك قازاقتار قاۋىمداستىعى جۇزەگە اسىرىپ جاتقان جوبالارعا، وتانداستار مەن ەتنوستىق قازاقتارعا قاجەتتى باسقا دا ماسەلەلەرگە قاتىستى ءنورماتيۆتى- قۇقىقتىق اكتىلەر بويىنشا اقپاراتتىق جانە كونسۋلتاتيۆتىك قولداۋدى جۇزەگە اسىرادى.

قوعامدىق قابىلداۋ 14 وبلىس ورتالىعى، نۇر-سۇلتان، الماتى، شىمكەنت قالالارىندا اشىلادى. ولار «وتانداستار قورى» جانە دۇنيەجۇزىلىك قازاقتار قاۋىمداستىعى جۇمىسىنىڭ باعىتى بويىنشا قىزىعۋشىلىق تانىتقانداردىڭ بارلىعىن جەكە قابىلداپ، قۇقىقتىق ماسەلەلەر جونىندە كەڭەس بەرەدى. جۇگىنۋشىلەردىڭ ماسەلەلەرى ناقتى شەشىلگەنشە مۇمكىندىگىنشە سۇيەمەلدەيدى جانە ماسەلەلەر ۋاقىتىندا جانە ساپالى قاراستىرىلۋى ءۇشىن مەملەكەتتىك ورگان قۇرىلىمدارىمەن ءوزارا ارەكەتتە بولادى. جۇگىنۋلەردەن تۇسكەن حات-حابارلارعا مونيتورينگ جاسايدى جانە سايكەسىنشە تالداۋ جۇمىسىن جۇرگىزەدى.

ءبىرىڭعاي بايلانىس ورتالىعى ىسكە قوسىلعان ساتتەن 1200 دەن استام ازاماتتىڭ ساۋالدارى قابىلدانىپ، جاۋاپتار بەرىلدى. قويىلاتىن سۇراقتاردىڭ كوبىسى ازاماتتىق الۋ، مەملەكەتتىك قولداۋلار جايلى تۇسىندىرمەلەر، ورالمان مارتەبەسىن الۋ جانە ونىڭ قۇقىقتارى مەن مىندەتتەرى جايلى بولىپ وتىر.

سونداي-اق 5 ايدىڭ كولەمىندە قوعامدىق قابىلداۋدا قارالعان 130 شاعىمنىڭ 90 پايىزدان ارتىعى وڭ شەشىمىن تاپسا، قالعان ماسەلەلەر بويىنشا قولدانىستاعى زاڭنامالارعا سايكەس ءتيىستى جۇمىستار جۇرگىزىلۋدە.

قازاقستاندىق ونىمدەردى ەكسپورتقا شىعارۋ، قازاقستانعا ينۆەستيتسيا تارتۋ، دارىندى وتانداستار مەن بيزنەس يدەيالاردى تابۋ، سونداي- اق كۆازيمەملەكەتتىك كومپانيالار مۇددەلەرىن تانىستىرۋ ماقساتىندا ءبىر عانا «اتامەكەن» برەندىمەن ىسكەرلىك ورتالىقتار جەلىسىن قۇرۋ شارالارى قولعا الىندى. ولار شەتەلدەگى قازاقتاردىڭ دياسپورالىق ۇيىمدارىن قوعامدىق بىرلەستىكتەر نەگىزىندە بىرىكتىرۋ ارقىلى جۇمىس ىستەيتىن بولادى. ىسكەرلىك ۇيلەرى ءبىرتۇتاس تسيفرلى جەلىگە بىرىكتىرىلىپ، كەيىن دەربەس سايت- پاراقشالارى قۇرىلادى. ال ولاردىڭ جۇمىسىن تۇراتىن ەلىنىڭ ازاماتتىعىن العان وتانداس بيزنەسمەندەر جۇزەگە اسىرادى. وسى رەتتە وتانداستارىمىز اراسىنداعى ىسكەر ادامداردى انىقتاۋ، ولاردى ورتاعا تارتۋ ءۇشىن قولدا بار الەۋەتتى تانىتۋعا ارنالعان بيزنەس فورۋمدار وتكىزىلۋدە.

بۇل شارالاردىڭ باستى مىندەتى - وتكىزىلەتىن ەلدە قازاقستاندىق بيزنەس قاۋىمداستىقتى قالىپتاستىرۋ، دارىندى ادامداردى جانە ستارتاپتاردى قوسا العاندا، سەرپىندى جوبالاردى ىزدەۋ. بۇل جەردە وتانداستاردىڭ بيزنەس يدەيالارىن، جوبالارىن ىسكە اسىرۋ جولىندا ۇيىمداستىرۋشىلىق نەمەسە قارجىلىق قولداۋ كورسەتە الاتىن كاسىپكەرلەردىڭ «اتامەكەن» ۇلتتىق پالاتاسى جانە الەۋمەتتىك- كاسىپكەرلىك كورپوراتسياسى، باسقا دا ۇيىمدار بۇگىننىڭ وزىندە بىرگە جۇمىس ىستەيتىنىن ايتا كەتۋ كەرەك. سونىمەن قاتار Astana Hub پەن ستارتاپتاردى قولداۋ قورى، «دامۋ»، «قازاق ينۆەست» جانە «قازاگرو» ۇ ب ح ۇيىمدارىمەن سەرىكتەس بولۋ جاڭا باستامالاردى شىنايى قولداۋعا ارنالعان جاڭا مۇمكىندىكتەرگە جول اشتى. ودان بولەك، ءبىز ەڭبەكپەن قامتۋ باعدارلاماسى اياسىندا وقۋ-ءوندىرىس ورتالىعىن اشۋ ارقىلى وتانداستاردى كاسىبي وقىتۋ مەن جاڭا ماماندىققا ۇيرەتەمىز. باسىمدىق بەرىلگەن باعىتتار قاتارىندا زاماناۋي جانە ءداستۇرلى كيىمدەر، اشەكەيلەر، كادەسىيلار، ازىق- تۇلىكتەر جانە باسقالاردى قوسا العاندا، ۇلتتىق بىرەگەيلىك نىشاندارىمەن بايلانىستى ءونىم شىعارۋ بار.

تاعى ءبىر ۇلكەن جوبامىز - ول «كاسىپقور» حولدينگىمەن بىرلەسىپ وندىرىستىك وقىتۋ ورتالىقتارىن قۇرۋ. ءبىرىنشى باعىت -  وقىتۋ باعىتى. بۇل باعىتتىڭ كوزدەگەنى -  وتانداستى وقىتۋ، قايتا دايارلاۋ، سەرتيفيكاتتاۋ، جۇمىسقا ورنالاستىرۋ. ەكىنشىسى وندىرىستىك باعىت. بۇل وتانداستاردى جاڭا تەحنولوگيا مەن وندىرىسكە وقىتادى، سەرتيفيكاتتايدى، بيزنەس جوسپار جاساۋدا، كرەديت، گرانت العاندا، ءوندىرىس ۇيىمداستىرعاندا سۇيەمەلدەيدى، كومەك كورسەتەدى. وتانداستىڭ تۇراقتى تابىس كوزىن تابۋىنا جول اشادى.

- شەتەلدەگى جاستارعا باعىتتالعان جوبالار جايلى نە ايتاسىز؟

-  «Samruk-Kazyna Trust»  الەۋمەتتىك جوبالاردى دامىتۋ قورىمەن جانە «الەۋمەتتىك جوبالار قورى» كورپوراتيۆتىك قورىمەن بىرلەسىپ «تۋعان ەلگە ساياحات» بالالار تۋريستىك پويىزى الەۋمەتتىك جوباسى جۇزەگە اسىرىلدى. ەكسكۋرسيالىق ساپار ەكى تۋردان تۇرادى. ءبىرىنشىسى 1-9 -شىلدە ارالىعىندا، ەكىنشىسى 1-9 -تامىز ارالىعىندا ءوتىپ، جوباعا قاتىسۋ ءۇشىن 50 بالا شاقىرىلدى.

بۇل جوبا ەلىمىزدىڭ تاريحي جانە ساۋلەتتىك ەسكەرتكىشتەرىن زەرتتەۋگە، وتانعا دەگەن سۇيىسپەنشىلىكتى ارتتىرىپ، وتانشىلدىقتى نىعايتۋعا باعىتتالعان.

اقپارات جانە قوعامدىق دامۋ مينيسترلىگىنىڭ ۇيىمداستىرۋىمەن ءوتىپ جاتقان ZEREN-2019 رەسپۋبليكالىق جازعى لاگەرىنە «وتانداستار قورىنىڭ» قولداۋىمەن 30 قانداسىمىز قاتىسىپ كەلدى. ولار -  موڭعوليا، قىتاي، وزبەكستان، رەسەي مەملەكەتتەرىنەن كەلگەن بەلسەندىلەر. وتانداستارىمىزدان قۇرالعان كوماندالار جوعارى ناتيجە كورسەتىپ، ءوز بيزنەس جوبالارىن جۇزەگە اسىرۋ ماقساتىندا 1-كەزەڭدە 3-ورىن 750000 تەڭگە، 2-كەزەڭدە 2-ورىن 1000000 تەڭگە كوتەرمە اقى يەلەندى.

سونداي-اق وتكەن 10-24 -شىلدە ارالىعىندا «نازاربايەۆ زياتكەرلىك مەكتەبى» بازاسىنداعى شەتەلدەگى قازاق دياسپوراسى بالالارىنا ارنالعان جازعى لاگەر جوباسى جۇزەگە اسىرىلدى. جازعى لاگەرگە الىس- جاقىن شەتەلدەردە (رەسەي، وزبەكستان، قىرعىزستان، تۇرىكمەنستان، تاجىكستان، يران، موڭعوليا) تۇراتىن 12-17 جاس ارالىعىنداعى 150 بالا قاتىستى.

ەكى اپتالىق وقۋ-تانىمدىق باعدارلاماسى اياسىندا بالالار نۇر- سۇلتان قالاسىندا ورنالاسقان ەلىمىزدىڭ مادەني، تاريحي، الەۋمەتتىك ماڭىزى زور نىساندارىمەن، ەسكەرتكىشتەرىمەن، وندىرىستىك كاسىپورىندارىمەن، «بۋراباي» ۇلتتىق تابيعي ساياباعىمەن تانىسۋعا مۇمكىندىك الدى. سونىمەن بىرگە ەتنوستىق قازاق بالالارى قازاق ءتىلىن، سالت- ءداستۇرى مەن مادەنيەتىن، تاريحىن، ۇلتتىق اسپاپتارى مەن ويىندارىن، فيزيكا، حيميا سىندى عىلىم سالالارىن مەڭگەردى. بۇدان بولەك، «بولاشاق» حالىقارالىق باعدارلامالار ورتالىعىمەن بىرلەسىپ، قازاقستانعا دياسپورا اراسىنان ستۋدەنتتەردى تارتۋ بويىنشا 30 دان استام ج و و قاتىساتىن ارنايى ساپارلار باعدارلاماسى بەكىتىلدى.

وسى جانە وزگە دە جوبالاردى ىسكە اسىرۋ قازىرگى زامانعى، تالانتتى جانە ءبىلىمدى جاستاردى ىزدەستىرۋ، تارتۋ جانە تاربيەلەۋ بويىنشا جاعداي جاساۋعا ەلەۋلى ۇلەس قوسادى. جاستار ءبىزدىڭ بولاشاعىمىز، ءبىلىم مەن تاربيەنىڭ نەگىزىندە ۇلتتىق كودتى ساقتاۋ بورىشىمىز دەپ سانايمىن. سەبەبى شەتتەن كەلگەن اعايىندار مادەنيەتىمىزدى، ۇلتتىق رۋحاني بايلىعىمىزدى مولايتىپ، دەڭگەيىن بيىكتەتە ءتۇستى.

مەملەكەت شەتتەن كەلگەن اعايىنداردىڭ يگەرگەن ءبىلىمى مەن ءارتۇرلى كاسىپتەگى تاجىريبەسىن پايدالانا بىلسە، بۇل ۇلتتىڭ كەمەلدەنۋىن، ەل ەكونوميكاسىنىڭ دامۋىن ءبىرشاما جەدەلدەتەدى.

شەتتەگى جانە قازاقستانداعى قازاقتار، ءارتۇرلى جەرلىك ەرەكشەلىكتەردەن قۇرالعانىمەن، ءبىر مادەنيەت، ءبىر ءتىل جانە ءبىر ءدىننىڭ يەسى. ولار ورتاق تاريحىمەن بىرىكتىرىلگەن تۇتاس قازاق ەتنوسى بولىپ تابىلادى. سوندىقتان ەلباسىنىڭ قانداستارىمىزدى قولداۋ ساياساتى ۇلت تاريحىنىڭ تەرەڭىنەن باستاۋ الاتىنىن ەسكەرىپ، ونى ىسكە اسىرۋ ءاربىر وتانداسىمىزدىڭ مىندەتى دەپ پايىمدايمىن.

اڭگىمەلەسكەن بەكەن قايرات ۇلى،

«ەگەمەن قازاقستان»