جالدامالى پاتەر العىسى كەلەتىن جاستار قانداي قۇجاتتاردى وتكىزۋى كەرەك
تولىققاندى قۇجاتتار ءتىزىمىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ ءتوراعاسى ماديار قوجاحمەت ايتىپ بەردى، دەپ حابارلايدى قازاقپارات ءتىلشىسى.
«ەرەجەگە سايكەس، ءوتىنىش قابىلداۋ باستالعاننان كەيىن ۇمىتكەرلەر مىناداي قۇجاتتاردى تاپسىرۋى كەرەك: ءوتىنىش، جەكە باسىن كۋالاندىراتىن قۇجاتتىڭ كوشىرمەسى، ءبىلىمى تۋرالى قۇجاتتىڭ كوشىرمەسى، نەكە قيۋ تۋرالى قۇجاتتىڭ كوشىرمەسى (بار بولعان جاعدايدا) ، بالالارىنىڭ تۋۋى تۋرالى كۋالىكتىڭ كوشىرمەسى (بار بولعان جاعدايدا) ، ءوتىنىش بەرۋشىگە جانە وتباسىنىڭ بارلىق مۇشەلەرىنە جىلجىمايتىن مۇلىكتىڭ بار- جوعى تۋرالى انىقتاما، جۇمىس ورنىنان انىقتاما، ءوتىنىش بەرۋشىنىڭ بانك شوتىنىڭ بولۋى جانە ونىڭ ءنومىرى تۋرالى انىقتاما، بانك شوتى بويىنشا اقشانىڭ قالدىعى مەن اي سايىنعى اينالىمى تۋرالى ءۇزىندى، ءوتىنىش بەرۋشىنىڭ ءتۇرلى قىزمەت سالاسىنداعى جەتىستىكتەرىن راستايتىن قۇجاتتار (بار بولعان جاعدايدا) » ، - دەدى ماديار قوجاحمەت.
قۇجاتتار قابىلدانعاننان كەيىن ۋاكىلەتتى ورگان ونىڭ ءبارىن تەكسەرىپ، تولىقتىعى مەن سايكەستىگىن قارايدى.
«وسىدان كەيىن ۇپايلارعا سايكەس ساناق جۇرگىزىلىپ، جالدامالى پاتەر بەرىلەتىن جاستاردىڭ ءتىزىمى بەكىتىلەدى. بۇل تىزىمگە ۇپايلاردى ەسەپتەۋ كەزىندە ءوتىنىش بەرۋشىنىڭ كاسىبى، وتباسىلىق جاعدايى، جەكە كاسىپكەرلىك قىزمەتى، بيۋدجەتتىك قىزمەتتەردە جۇمىس ىستەۋى، شوتتارىنىڭ جيناقتارى ەسكەرىلەدى. بالدارى تەڭ جاعدايدا ءوتىنىشتى ءبىرىنشى تاپسىرعان جاستارعا باسىمدىق بەرىلەدى. سونىمەن بىرگە، نەگىزگى تالاپتاردىڭ ءبىرى - جاستار تابىسى 40 ا ە ك- تەن تومەن بولماۋى كەرەك. مىسالى، جالدامالى پاتەر ءۇشىن جاس جىگىت 10-12 مىڭ، وعان قوسىمشا كوممۋنالدىق شىعىندار ءۇشىن تاعى 10-15 مىڭ تەڭگە تولەدى دەلىك. ونىڭ ايلىعى 110 مىڭ تەڭگە بولسا، ياعني، ول جالاقىسىنىڭ جارتىسىنىڭ جارتىسىن بانكتە باستاپقا جارنا رەتىندە جيناي الادى» ، - دەدى ول.
اتالمىش باعدارلاما بويىنشا بيىل نۇر- سۇلتاندا - 1050 پاتەر، الماتىدا - 1050 پاتەر، شىمكەنتتە - 904 پاتەر بەرىلەدى. ۋاكىلەتتى ورگان ساتىپ الۋ قۇقىعىنسىز جالعا بەرىلەتىن تۇرعىن ءۇيدى بەرۋ تۋرالى شەشىم قابىلداعان سوڭ 15 كۇنتىزبەلىك كۇن ىشىندە تۇرعىن ءۇيدى جالداۋ تۋرالى شارت جاسالادى.
ەسكە سالا كەتسەك، بىلتىر جاستار جىلىنىڭ اشىلۋىنا ارنالعان سالتاناتتى جيىندا ەلباسى نۇرسۇلتان نازاربايەۆ استانا، الماتى جانە شىمكەنت قالالارىندا جاستار ءۇشىن جىلىنا 1 مىڭ پاتەر سالىناتىنىن ءمالىم ەتكەن بولاتىن.
ال بىلتىر كۇزدە ۇكىمەتتىڭ كەڭەيتىلگەن وتىرىسىندا سول تۇستاعى يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك (قازىر - پرەمەر- ءمينيستردىڭ ورىنباسارى) استانا، الماتى، شىمكەنت جۇمىسشى جاستارىنا 1 مىڭ پاتەر سالۋ مامىردا باستالاتىنىن حابارلاعان ەدى.