بۇل جايىندا تاجىكستان جازۋشىلار وداعىنىڭ ءتوراعاسى نيزوم كوسيم ايتتى، دەپ حابارلايدى قازاقپارات ءتىلشىسى.
«فورۋم بىرلەسكەن جۇمىستاردىڭ ءارى قارايعى جوسپارىن بەلگىلەۋ ءۇشىن وتە ىڭعايلى الاڭ بولدى. ءبىز الداعى ۋاقىتتا ادەبي جۋرنالدار مەن گازەتتەردىڭ بىرلەسكەن ءنومىرىن شىعارۋعا ۋاعدالاستىق. بۇل وقىرماندارىمىزدىڭ وزگە ەلدەردىڭ، كورشىلەرىنىڭ ادەبي شىعارماشىلىعىمەن تانىس بولۋى ءۇشىن جاسالادى. مەنىڭشە، بۇل دا حالىقتارىمىزدى جاقىنداستىرا تۇسۋگە سەپتىگىن تيگىزەدى»، - دەدى نيزوم كوسيم فورۋمنىڭ جابىلۋىنا ارنالعان سالتاناتتى شارا اياسىندا.
ونىڭ اتاپ وتۋىنشە، اتالعان باسىلىمداردىڭ فورماتى الداعى ۋاقىتتا ەگجەي-تەگجەيلى تالقىلانادى. باسىلىم ءنومىرى جەرگىلىكتى نەمەسە شەتەلدىك قالامگەردىڭ شىعارمالارىنا نە بولماسا ناقتى ءبىر ەلدىڭ ادەبيەتىنە ارنالۋى مۇمكىن.
«بارلىق، اسىرەسە بۇرىنعى كەڭەستىك كەڭىستىكتەن شىققان جازۋشىلار وداعىنىڭ نەگىزگى جۇمىس باعىتتارىنىڭ ءبىرى - وزگە ەلدەرمەن، اسىرەسە باۋىرلاس رەسپۋبليكالارمەن مادەني بايلانىستى جولعا قويىپ، نىعايتۋ. بۇل ورايدا قازاقستان ءبارىمىزدى باسىپ وزدى. بۇل - ەلدەرىڭىزدە ءوتىپ جاتقان وسىمەن ءۇشىنشى حالىقارالىق ادەبي شارا بولىپ وتىر. مەن ونىڭ ەكەۋىنە قاتىسقان ەدىم. تاماشا اسەر الدىم»، - دەدى ول.
ايتا كەتەيىك، فورۋم اياسىنداعى ءۇش كۇن ىشىندە ۇيىمداستىرۋشىلار مەن قاتىسۋشىلاردىڭ ارقاسىندا اۋقىمدى دا جەمىستى ىستەر اتقارىلدى. پانەلدىك سەسسيالار، پىكىرتالاس، كەزدەسۋلەر ءساتتى ءوتىپ، مەموراندۋمعا قول قويىلىپ، جازۋشىلار اللەياسى اشىلدى. ءبىرىنشى كۇننىڭ جالپى وتىرىسىنا مەملەكەت باسشىسى قاسىم-جومارت توقايەۆ ارنايى قاتىسىپ، ناقتى ۇسىنىستار دا جاسادى.