تولەن ابدىك: قازىرگى قازاق ادەبيەتىندە الەم وقىرمانىنا تانىستىراتىن شىعارمالار جەتەرلىك
قازاقستان رەسپۋبليكاسىنىڭ مەملەكەتتىك سىيلىعىنىڭ يەگەرى، جازۋشى، قوعام قايراتكەرى تولەن ابدىك وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«جالپى، ادەبيەت ءبىر ۇلتتىڭ اياسىنا سىيمايدى. ول - بۇكىل ادامزاتتىڭ ورتاق يگىلىگى. مىسالى، تولستوي، دوستويەۆسكييلەر تەك ءبىر ورىس ادەبيەتىنىڭ وكىلى دەپ ايتا المايسىڭ. ولاردىڭ شىعارمالارىنا الەم سۋسىندايدى. سول سياقتى شەكسپير دە ءبىر عانا اعىلشىن ادەبيەتىنىڭ اۋقىمىنا سىيمايدى. سوندىقتان، ۇلى ادەبيەت ورتاق. ءبىز سول ۇلى ادەبيەتتى جاساۋعا تىرىسۋىمىز كەرەك» ، - دەدى تولەن ابدىك ازيا قالامگەرلەرىنىڭ فورۋمى كەزىندە تىلشىلەردىڭ سۇراعىنا جاۋاپ بەرە وتىرىپ.
تولەن ابدىكتىڭ ايتۋىنشا، ەلوردادا ءوتىپ جاتقان ازيا قالامگەرلەرىنىڭ فورۋمى - الەم ادەبيەتشىلەرىنىڭ، جازۋشىلارىنىڭ باسىن قوسۋ دەگەن ءسوز.
«جازۋشىنىڭ ماقساتى - قوعامنىڭ بويىنا ادامگەرشىلىك، ىزگىلىك قاسيەتتەرىن ءسىڭىرۋ. ال ەگەر ادامنىڭ بويىندا ىزگىلىككە دەگەن سەنىم، قىلمىسقا دەگەن جەككورىنىش سەزىم بولسا، ءبىرىن- ءبىرىن قۇرمەتتەي السا، جەر بەتىندە سوعىس تا، تەرروريزم دە بولمايدى. سول سەبەپتى، ءبىز كوركەم ادەبيەتتى ناسيحاتتاۋىمىز كەرەك. الەم ادەبيەتىندە پىكىرلەسۋ، ءوز پروبلەمالارىن ورتاعا سالۋ دەگەن بولۋ ءتيىس. سوندىقتان، ءبىزدىڭ جازۋشىلار وداعى ۇيىمداستىرىپ جاتقان بۇگىنگى فورۋم وتە قاجەتتى شارا. ءبىز بۇكىل الەمدىك ادەبيەتتىڭ ءبىر بولشەگىمىز. تەك قازاق حالقىنا عانا قاجەتتىمىز دەگەن بولمايدى. ويتكەنى، ىزگىلىك، ادامگەرشىلىك، ماحاببات دەگەن ۇعىمدار بارلىق حالىقتا بىردەي. ادامزاتتىق قۇندىلىقتار ءبارىمىزدى بىرىكتىرۋ كەرەك» ، - دەدى تولەن ابدىك.
جازۋشىنىڭ ايتۋىنشا، قازىرگى قازاق ادەبيەتىندە الەم وقىرمانىنا تانىستىراتىن شىعارمالار جەتەرلىك، بارشىلىق.
ەسكە سالساق، ەلوردادا ازيا قالامگەرلەرىنىڭ فورۋمى ءوتىپ جاتىر. وعان ادەبيەت بويىنشا نوبەل سىيلىعىنىڭ 3 نومينانتى قاتىسۋدا. فورۋم بارىسىندا پرەزيدەنت قاسىم- جومارت توقايەۆ ازيا الىبى ادەبي سىيلىعىن تاعايىنداۋدى ۇسىندى.