بۇل تۋرالى بۇگىن ەلوردادا ءوتىپ جاتقان ازيا ەلدەرى قالامگەرلەرىنىڭ تۇڭعىش فورۋمىندا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«قۇرمەتتى قالامگەرلەر، جازۋشىلار! قۇرمەتتى قاۋىم! ەڭ الدىمەن بارشاڭىزدى وسى فورۋمعا كەلگەندەرىڭىزگە، قاتىسقاندارىڭىزعا ريزاشىلىعىمدى بىلدىرەمىن. ازيا اقىن-جازۋشىلارىنىڭ العاشقى فورۋمى قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ باستاماسىمەن وتكىزىلۋدە. ءبىزدىڭ حالقىمىز رۋحاني مۇرالارىن ساقتاپ، ۇلتتىق تاريحىن زەرتتەۋگە ، مادەنيەتىن جان-جاقتى قولداۋعا ءاردايىم باسا ءمان بەرەدى»، - دەدى فورۋم جۇمىسىن اشقان قازاقستان پرەزيدەنتى.
مەملەكەت باسشىسى بۇل بەرىك ۇستانىم تاۋەلسىز قازاقستان كەزەڭىندە جاڭا سيپات الىپ وتىرعانىن باسا ايتتى.
«قازاق ادەبيەتى حالقىمىزدىڭ سان عاسىرلىق تاريحىمەن بىتە قايناسقان اسىل قازىنا. تۇتاس تۇركىنىڭ ورتاق مۇرالارى كۇلتەگىن، تونىكوك، بىلگە قاعان جىرلارى مەن قورقىت اتا كىتابى ادەبيەتىمىزدىڭ ءتۇپ تامىرى. ءال-فارابي، قوجا احمەت ياساۋي سىندى ۇلى تۇلعالاردىڭ ەڭبەكتەرى يسلام داۋىرىندە تۇركى جۇرتىن بۇكىل دۇنيەگە تانىتتى. التىن وردا زامانىنداعى جىراۋلىق پوەزيا ءداستۇرى ءوز جالعاسىن تاۋىپ كەلەدى. ءتول ادەبيەتىمىزدىڭ اسقار شىڭعا شىعۋى ۇلى ويشىل ابايدىڭ دانالىق بولمىسىمەن تىعىز بايلانىستى. ونىڭ شىعارمالارى جالپى ادامزاتقا ورتاق رۋحاني جاۋھارلار»، - دەدى قاسىم-جومارت توقايەۆ.