قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پرورەكتورى جاندوس بازارتاي وسىلاي پىكىر ءبىلدىردى.
«ءبىزدىڭ ەلىمىز تاۋەلسىزدىك جىلدارىندا وقۋ-اعارتۋ ىسىنە ەرەكشە قامقورلىق جاساپ كەلەدى. ەلىمىزدىڭ ءاربىر وڭىرىندە ءزاۋلىم مەكتەپتەر بوي تۇزەپ، وندا وقۋشىلار ساپالى ءبىلىم الۋعا قول جەتكىزىپ كەلەدى. بۇل سالاعا قاجەتتى زاماناۋي تەحنولوگيا قازىر ءبىزدىڭ ءاربىر مەكتەبىمىزدە جاس ۇرپاققا قىزمەت كورسەتەدى. بۇل جاس ورەندەردىڭ جان-جاقتى دامۋىنا وڭ اسەر تيگىزەتىنى بەلگىلى. وسىنداي قامقورلىق الداعى ۋاقىتتا دا جالعاسىن تاباتىنى قۋانتادى. مەملەكەت باسشىسى ءوز جولداۋىندا وسى باعىتتا اتقارىلاتىن جۇمىستار بارىسىن ايتىپ ءوتتى. ءبىرقاتار پروبلەمالارعا جان-جاقتى توقتالدى. ماسەلەن، جىل سايىن 21 مىڭنان استام تۇلەك كاسىبي جانە جوعارى وقۋ ورىندارىنا تۇسە الماي قالادى ەكەن. بۇل كورسەتكىش كوپشىلىكتى ويلانتادى. جاستار - ەگەمەندى ەلىمىزدىڭ كەلەشەگى. ولاردىڭ بولاشاعىنا بەيجاي قاراۋعا نەگىز جوق. سەبەبى، ولاردىڭ اراسىندا جۇمىسسىز جاستاردىڭ ارتۋى قوعامنىڭ كۇردەلى ماسەلەسىنە اينالادى. سوندىقتان بۇل تۇيتكىلدىڭ ءتۇيىنىن تارقاتۋعا ءمان بەرگەنىمىز ءجون. وسى ورايدا پرەزيدەنت «ءبىز وقۋشىلاردىڭ قابىلەتىن ايقىنداپ، كاسىبي باعىت-باعدار بەرۋ ساياساتىنا كوشۋىمىز قاجەت. بۇل ساياسات ورتا ءبىلىم بەرۋدىڭ ۇلتتىق ستاندارتىنىڭ نەگىزى بولۋى ءتيىس» دەپ اتاپ كورسەتتى»، - دەدى جاندوس بازارتاي.
ونىڭ ايتۋىنشا، قالا جانە اۋىل مەكتەپتەرى اراسىنداعى ءبىلىمنىڭ ساپاسى الشاقتاپ بارا جاتقانىنا بايلانىستى ءتيىستى ءىس-شارالاردى قولعا الۋى قاجەت. جولداۋدا پرەزيدەنت ايتىپ وتكەنىندەي، اۋىلدىق جەرلەردە بىلىكتى پەداگوگ كادرلاردىڭ تاپشىلىعى انىق بايقالادى.
«پرەزيدەنت وسى باعىتتا ءتيىستى جۇمىستاردىڭ قولعا الاتىنىن ايتتى. سولاردىڭ ءبىرى رەتىندە «ديپلوممەن اۋىلعا» باعدارلاماسىنىڭ اياسىن كەڭەيتىپ، جۇمىستى جاڭا دەڭگەيدە جالعاستىرۋ قاجەتتىگىنە توقتالدى. ءبىزدىڭ ەلىمىزدە حالىقتىڭ تەڭ جارىمىنان استامى اۋىلداردا تۇراتىنى بەلگىلى. سوندىقتان جەرگىلىكتى جەرلەردە پەداگوگ مامانداردىڭ قاتارىن ارتتىرۋعا نازار اۋدارعانىمىز ورىندى. ءبىزدىڭ قورقىت اتا اتىنداعى قىزىلوردا مەملەكەتتىك ۋنيۆەرسيتەتى بۇل باعىتتا ءتيىستى ءىس-شارالاردى قولعا الىپ كەلەدى. ناتيجەسىندە ءبىزدىڭ جوعارى وقۋ ورنىن بىتىرگەن تۇلەكتەردە تۋعان توپىراققا ورالىپ، مەكتەپتەردە پەداگوگ مامانداردىڭ قاتارىن تولىقتىرىپ وتىر. دەگەنمەن ەلىمىزدە تۇلەكتەردىڭ جارتىسىنا جۋىعى ءوز ديپلومى بويىنشا قىزمەتكە ورنالاسا الماي جۇرگەن جوعارى وقۋ ورىندارى كەزدەسەدى. سوندىقتان بۇل باعىتتا ءتيىستى ءىس-شارالاردى ءوز دەڭگەيىندە جۇزەگە اسىرۋعا ءمان بەرۋىمىز ءتيىس»، - دەدى جاندوس بازارتاي.
ەستەرىڭىزگە سالا كەتەلىك، كەشە مەملەكەت باسشىسى قاسىم-جومارت توقايەۆ قازاقستان حالقىنا جولداۋىن جاريا ەتتى.