وزگە ەلدەردەن كەلگەن قازاق دياسپورا وكىلدەرىنىڭ بالالارى قازاقستان قالالارىن ارالادى
پويىز نۇر-سۇلتان قالاسىنا كەلىسىمەن ەكىنشى ساپاردىڭ سالتاناتتى جابىلۋىنا وراي بالالاردىڭ وزدەرىنىڭ قاتىسۋىمەن ارنايى كونسەرت ۇيىمداستىرىلدى، سونىمەن قاتار، كونسەرتتە ساپار بارىسىندا ءوز تالانتتارىن اشا بىلگەن بالالار دا ونەر كورسەتتى.
ەڭ بەلسەندى قاتىسۋشىلار ارنايى سەرتيفيكاتتارمەن ماراپاتتالدى.
بالالار ءداستۇرلى فلەشموب ءبيىن كورسەتۋمەن قاتار، دوستارى مەن ۇيىمداستىرۋشىلارعا ءوز تىلەك-نيەتتەرىن ءبىلدىردى، ال ۇيىمداستىرۋشىلار قاتىسۋشىلارعا وزدەرىنىڭ ەستەلىك سىيلىقتارىن تابىستادى.
بۇل جولعى ساپاردىڭ وزىندىك ەرەكشەلىگىن اتاپ وتكەن ءجون، سەبەبى، بۇل ساپارعا قازاقستاندىق بالالارمەن قاتار قىرعىزستان، رەسەي جانە بەلورۋسيا سياقتى كورشى ەلدەردەن كەلگەن جاس قاتىسۋشىلاردا اتتاندى.
ولاردىڭ بارلىعى ساپار بارىسىندا اۋىسىپ وتىرعان قازاقستان تابيعاتىنىڭ سۇلۋلىعىنا تامسانىپ، تاڭ قالعاندارىن اتاپ وتۋدە.
«الماتىنىڭ تاۋلارى وتە ادەمى. ال بايقوڭىردا راكەتا ۇشىرعانىمىز ەسىمدە جاقسى ساقتالىپ قالدى. بارلىعى وتە قىزىق بولدى»، - دەپ سامارا قالاسىنان كەلگەن سامات ساياحاتتان العان اسەرىمەن ءبولىستى.
بالالاردىڭ ايتۋلارى بويىنشا، ەلوردادا ولارعا بارىنەن دە نازاربايەۆ ۋنيۆەرسيتەتىنە ۇيىمداستىرىلعان ەكسكۋرسيا مەن ەكسپو كورمەسى ۇناعان.
شەت ەلدەردەن كەلگەن قوناق بالالار نۇر-سۇلتان قالاسىنىڭ سونشالىقتى ۇلكەن جانە زاماناۋي قالا ەكەنىن كۇتپەگەندەرىن ايتتى. بايقوڭىردا بالالار «قورقىت اتا» مەموريالدى كەشەنىنە بارىپ، راكەتا ۇلگىسىن ۇشىردى.
ال تاراز قالاسى قاتىسۋشىلاردى ءوز تاريحىمەن تامساندىردى، بالالارعا بۇل قالادا ەڭ قاتتى ۇناعانى ايشا-ءبيبى جانە قاراحان كەسەنەسى بولدى.
«ماعان مۇندا بولىپ جاتقاننىڭ ءبارى ۇنادى. قازاقستاننىڭ تاريحىن زەرتتەۋ ماعان قىزىق بولدى، مەن ەندى بۇدان دا كوپ جەرلەردى ارالاعىم كەلەدى. ءبىز كوك-توبەگە كوتەرىلگەندە مەن وتىرىپ ماڭىزدى بىردەڭە تۋرالى ويلاعىم كەلدى. ول جەردىڭ اتموسفەراسى ەرەكشە. ءدال سول ساتتە مەن بۇل مەنىڭ وتانىم ەكەنىن ءتۇسىندىم»، - دەيدى ومبى قالاسىنان كەلگەن قوناق مەيرام.
جوبانىڭ 2019-جىلعى ماۋسىمىنىڭ سوڭعى ساپارى 1- تامىزعا جوسپارلانىپ وتىر.
وندا تاعى 200 بالا «رەلستەگى جىلجىمالى لاگەردە» ءوز قاتارلاستارىمەن ۇمىتىلماس توعىز كۇندى بىرگە وتكىزۋ مۇمكىندىگىنە يە بولادى.
ەستەرىڭىزگە سالا كەتسەك، 1- ماۋسىم حالىقارالىق بالالاردى قورعاۋ كۇنى «تۋعان ەلگە ساياحات» بالالار تۋريستىك پويىزى» جوباسىنىڭ العاشقى ماۋسىمى باستالعان بولاتىن. جوبا «سامۇرىق-قازىنا» ا ق كومپانيالار توبى اتىنان «Samruk-Kazyna Trust» الەۋمەتتىك جوبالاردى دامىتۋ قورىمەن جۇزەگە اسىرىلىپ جاتىر.