ەلوردالىق بالەت ترۋپپاسى ليتۆانىڭ كاۋناس قالاسىندا كورەرمەندەردى ءتانتى ەتتى
«استانا وپەرا» بالەت ترۋپپاسى ليتۆالىق كورەرمەنگە الەمدىك كلاسسيكا جاۋھارلارى مەن ХХ-ХХІ عاسىرداعى اتاقتى حورەوگرافتاردىڭ تۋىندىلارى ەنگەن بىرەگەي گالا-بالەت باعدارلاماسىن ۇسىندى. ايگىلى كاۋناس بەكىنىسىنىڭ جانىنداعى اشىق الاڭعا جينالعان مىڭداعان تۋريست پەن قالا جۇرتشىلىعى قويىلىمدى تاماشالاعان سوڭ دۋ قول شاپالاق سوعىپ، «براۆو» دەپ ءۇن قاتىپ، وزدەرىنىڭ ريزاشىلىعى مەن شاتتىعىن ءبىلدىردى.
اۆتورى «استانا وپەرا» بالەت ترۋپپاسىنىڭ كوركەمدىك جەتەكشىسى، رەسەيدىڭ حالىق ءارتىسى التىناي اسىلمۇراتوۆا بولىپ تابىلاتىن ەكى بولىمنەن قۇرالعان اۋقىمدى باعدارلاما ا. اداننىڭ «جيزەل» بالەتىنەن پا-دە-دەمەن اشىلدى. جاس سوليست اناستاسيا زاكلينسكايا مەن ونىڭ سەرىكتەسى - جەتەكشى سوليست ولجاس تارلانوۆ نازىك جيزەل مەن گراف البەرتتىڭ بەينەلەرىن ۇسىندى. ءارتىس قىز قالىقتاعان جەڭىل ورمان پەرىسىنىڭ پارتياسىن شەبەر ورىنداپ، اسەرلى ماحاببات وقيعاسىن ءبيدىڭ مانەرلى تىلىمەن جەتكىزە الدى. ⅩⅣ عاسىردىڭ ورتاسىندا نەمان مەن نەريس وزەندەرىنىڭ قوسىلعان تۇسىندا سالىنعان ليتۆانىڭ كونە تاس بەكىنىسى عاجايىپ بالەتتىڭ كوركەم دەكوراتسياسىنىڭ ءرولىن اتقاردى. ال كونسەرتتىڭ ەكىنشى بولىمىندە اناستاسيا زاكلينسكايا ن. ريمسكي- كورساكوۆتىڭ مۋزىكاسىنا م. فوكيننىڭ حورەوگرافياسىنداعى «شەحەرازادا» بالەتىنەن شىعىس ارۋى زوبەيدانىڭ كەيپىنە شەبەر ەنە كەتتى. التىن قۇل رولىندە بالەت سوليسى سەرىك ناقىسپەكوۆ ونەر كورسەتتى.
نازىك جيزەلدەن كەيىن ساحنا تورىنە قۇشتارلىققا تولى سىعان قىزى كارمەن شىقتى. ليتۆالىق كورەرمەن نازارىنا ج. بيزەنىڭ مۋزىكاسىنا قويىلعان ⅩⅩ عاسىردىڭ ايتۋلى حورەوگرافى رولان پەتيدىڭ اتتاس بالەتىنەن دۋەت ۇسىنىلدى. قازاقستاننىڭ ەڭبەك سىڭىرگەن قايراتكەرلەرى گاۋحار ۋسينا مەن رۇستەم سەيىتبەكوۆتىڭ مانەرلى اكتەرلىك ويىنى مەن سەزىمتال پلاستيكاسى جينالعان قاۋىمنىڭ ەشقايسىسىن بەي- جاي قالدىرمادى.
شۆەيتساريالىق بالەتمەيستەر كسەنيا زۆەريەۆانىڭ قويىلىمىنداعى قازاقستاندىق كومپوزيتور اقبوتا رايىمقۇلوۆانىڭ «زامان تىنىسى» بالەتىنەن دۋەت - قيال مەن بۇگىنگى شىندىق ۇشتاساتىن كونە سيقىرعا تولى قىزىقتى اڭگىمە بولىپ تابىلادى. عاجايىپ وقيعالارعا تاپ بولاتىن ءارى تىلسىم كۇشكە يە قاھارمانداردى قازاقستاننىڭ ەڭبەك سىڭىرگەن قايراتكەرى انەل رۇستەموۆا مەن ولجاس تارلانوۆ سومدادى. زاماناۋي وتاندىق ءارى شەتەلدىك اۆتورلار شىعارمالارىنىڭ ۇلگىلەرىنە ا. سادىقوۆانىڭ حورەوگرافياسىنداعى ق. شىلدەبايەۆتىڭ «تامىر» جانە دج. ۋيليامستىڭ مۋزىكاسىنا ك. زۆەريەۆانىڭ «جوعالعان جۇماق» نومىرلەرى ەندى.
اينالادا مەرەكەلىك كوڭىل- كۇي سەزىلىپ تۇردى، ل. مينكۋستىڭ «بايادەركا» بالەتىنەن ءۇندى ءبيىن، «دون كيحوت» بالەتىنەن سىعان ءبيىن (ە. شەرستنيەۆانىڭ رەداكتسياسى) ، ا. اداننىڭ «كورسار» بالەتىنەن پا- دە- دە، ر. دريگونىڭ «ارلەكينادا» بالەتىنەن پا- دە- دەنى ورىنداپ، كاۋناس تۇرعىندارىن قۋانتقان ارتىستەر بار ونەرىن ورتاعا سالدى. جەتەكشى سوليست ەركىن راحماتۋللايەۆ، سوليستەر دالەر زاپاروۆ، شۇعىلا ادەپحان، بالەت ارتىستەرى جانىبەك يمانقۇلوۆ، ناتاليا كونديا، نازيرا زاەتوۆا، سۇلتانبەك عۇمار، عالىمجان نۇرمۇحامەت، بوستان قوجابەكوۆ، دانيار جۇماتايەۆ جانە ت. ب. ءوز شەبەرلىكتەرىن كورەرمەنگە پاش ەتتى.
«استانا وپەرا» بالەت ترۋپپاسىنىڭ ەتۋالدەرى، قازاقستاننىڭ ەڭبەك سىڭىرگەن قايراتكەرلەرى ايگەرىم بەكەتايەۆا مەن باقتيار ادامجاننىڭ ونەر كورسەتۋى جۇرتشىلىقتىڭ ەرەكشە شاتتىعىن تۋدىردى. پريما مەن پرەمەر ⅩⅩ عاسىرداعى م. جارردىڭ مۋزىكاسىنا ر. پەتيدىڭ «پاريج قۇداي اناسىنىڭ سوبورى» تانىمال بالەتىنەن دۋەت ورىندادى.
ايگەرىم بەكەتايەۆا سومداعان ەسمەرالدانىڭ ءمىنسىز اسەمدىگى، ادالدىعى، نازىكتىگى مەن ەركەلىگى جۇرەكتەردىڭ قىلىن شەرتتى، بالەرينا جارقىن ارتىستىك تەمپەرامەنتىن، كاسىبي قابىلەتى مەن تەحنيكالىق دايىندىعىنىڭ جوعارى دەڭگەيىن كورسەتىپ، وسىناۋ كۇردەلى پارتيادا جۇلدىزداي جارقىرادى.
دەنە ءبىتىمى سۇرىقسىز بولسا دا، جانى تازا جارىمجان قوڭىراۋشى كۆازيمودونىڭ اسا كۇردەلى پلاستيكاسىن حالىقارالىق ساراپشىلار مەن سىنشىلار ءمىنسىز دەپ تانىعان باقتيار ادامجاننىڭ ينتەرپرەتاتسياسى كورەرمەندەر تاراپىنان زور تابىسقا كەنەلدى. جەتەكشى سوليست ءبيىنىڭ كۇش- قۋاتى، سامعاپ سەكىرۋلەرى، ءمىنسىز تەحنيكاسى مەن وزىق اكتەرلىك شەبەرلىگى الەمنىڭ كوپتەگەن ەلدەرىنىڭ بالەتقۇمار جاندارىنىڭ جۇرەگىن جاۋلاي الدى. كاۋناس تا قالىس قالمادى - قازاقستاندىق ارتىستەردىڭ دارىنىن سۇيسىنە تاماشالاۋشىلاردىڭ قاتارى حورەوگرافيالىق ونەردى باعالاۋشى ليتۆالىقتارمەن تولىقتى. الەمدىك بالەت جۇلدىزدارى ءا. بەكەتايەۆا مەن ب. ادامجاننىڭ ورىنداۋىنداعى ل. مينكۋستىڭ «دون كيحوت» بالەتىنەن گران- پا كەشتىڭ سوڭىن عاجايىپ تۇيىندەدى.
كورەرمەندەردىڭ باعالاۋىنشا، قازاقستاندىق بالەت ترۋپپاسىنىڭ ونەر كورسەتۋى كلاسسيكالىق ونەردىڭ ناعىز مەرەكەسىنە اينالىپ، كاۋناس تۇرعىندارى مەن قوناقتارى ءۇشىن تاماشا سىي بولدى.
- ارتىستەر بىزگە ءبيدىڭ جوعارى مادەنيەتىن، تەحنيكالىق ءارى اكتەرلىك شەبەرلىگىن كورسەتتى. بيشىلەردىڭ كاسىبي مۇمكىندىكتەرى كەز- كەلگەن ماقتاۋدان جوعارى. ولاردىڭ ءارقايسىسىنىڭ وزىندىك ەرەكشەلىگى، ارتىستىك دارىندىلىعى مەن جەكە دارا ءستيلى بار ەكەنى ايقىن. بالەرينالاردىڭ قولدارى مەن اياقتارىنىڭ سىزىقتارى ءمىنسىز، ولار قۇددى ءبىر قوزعالىستاعى پوەزياداي كورىندى. ترۋپپا، ءسوزسىز، كەرەمەت كۇيدە.
سونداي-اق جانرلىق سان الۋاندىق پەن قىزىقتى دا مازمۇندى نومىرلەردىڭ كەرەعارلىعىن، كونتسەرتتىك باعدارلامانىڭ جاقسى ويلاستىرىلعانىن اتاپ وتكىم كەلەدى. بارلىعى ۇنادى: كلاسسيكالىق بالەتتەر دە، زاماناۋي نومىرلەر دە، شىن مانىندە ءبارى دە كەرەمەت بولدى! كاۋناستاعى بۇگىنگى ونەر كورسەتۋ سوڭعى ەمەس شىعار دەگەن ويدامىن، - دەپ اسەرىمەن ءبولىستى اگنە راۋدە ەسىمدى كورەرمەن.
«استانا وپەرا» بالەت ترۋپپاسىنىڭ كاۋناستاعى گاسترولى «رۋحاني جاڭعىرۋ» باعدارلاماسى اياسىندا ق ر مادەنيەت جانە سپورت مينيسترلىگىنىڭ قولداۋىمەن ۇيىمداستىرىلدى.