قازاقستاندىقتاردىڭ نەسيەسىن جابۋعا مەملەكەت قانشا قاراجات جۇمسايدى؟
بۇل سۇراققا ۇكىمەتتىڭ باسپا ءسوز ورتالىعىندا ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ جاۋاپ بەردى، دەپ حابارلايدى قازاقپارات ءتىلشىسى.
«اتالعان ساناتتاعى ازاماتتاردىڭ نەسيە بويىنشا بورىشىن وتەۋ ءۇشىن 105 ميلليارد تەڭگە قاجەت. ونىڭ 88 ميلليارد تەڭگەسىن رەسپۋبليكالىق بيۋجەتتەن تارتامىز. بيۋجەتتى پىسىقتاۋ اياسىندا الداعى اپتادا ناقتى سومالار اتالادى. 17 ميلليارد تەڭگەنى پروبلەمالىق نەسيەلەر قورىنان ارنايى وبليگاتسيالاردى شىعارۋ ارقىلى تارتپاقپىز. سونىمەن قاتار، ءوسىم مەن ايىپپۇلدار بويىنشا نەسيەلىك بورىشتاردىڭ 70 پايىزى قارجىلىق مەكەمەلەردىڭ ەسەبىنەن جۇرگىزىلەتىنىن ەسكەرۋ كەرەك»، - دەدى ءاليحان سمايىلوۆ.
ايتا كەتسەك، كەشە ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن. ەلىمىزدەگى الەۋمەتتىك تۇرمىسى تومەن توپتاعى ازاماتتار - كوپبالالى وتباسىلار، مۇگەدەك بالالارى بار وتباسىلار، جالعىز اسىراۋشىسىنان ايرىلعان وتباسىلار، اتاۋلى الەۋمەتتىك كومەك الاتىندار جانە جەتىم بالالار ءتۇرلى سەبەپتەرمەن قيىن جاعدايعا تاپ بولىپ، ءوز اتتارىنا العان نەسيەلىك مىندەتتەمەلەرىن ورىنداي الماي وتىر.
تىكەلەي جانە اتاۋلى قارجىلاي كومەك رەتىندە جوعارىدا اتالعان ساناتتاعى ازاماتتار ءۇشىن مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى.