ارىستاعى جارىلىس: تاعى ءبىر ادامنىڭ مەرت بولعانى حابارلاندى
«مەملەكەت باسشىسى قاسىم-جومارت كەمەل ۇلى توقايەۆ وقيعا ورنىندا بولىپ، توتەنشە جاعداي بويىنشا ناقتى تاپسىرمالار بەردى. بارلىق ءتيىستى شارالار ۇيىمداستىرىلۋدا. ارىس قالاسىنىڭ تۇرعىندارى قاۋىپسىز جەرگە كوشىرىلدى. وكىنىشكە قاراي، ەكى ادام - ازاماتتىق تۇلعا جانە اسكەري قىزمەتكەر قازا تاپتى. وسى ورايدا، ولاردىڭ تۋعان-تۋىستارىنا كوڭىل ايتامىز. زارداپ شەككەندەرگە مەديتسينالىق كومەك كورسەتىلۋدە»، - دەدى اسقار مامين بۇگىن ءوتىپ جاتقان ۇكىمەت وتىرىسىندا.
ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا كەشە تاڭەرتەڭ جارىلىس بولعاندىعى تۋرالى حابارلاعان بولاتىنبىز. اپات سالدارىنان ءبىر ادام مەرت بولدى. تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.