شەتەلدەگى قازاق بالالارى اراسىنداعى بايقاۋ جەڭىمپازدارى قازاقستانعا كەلەدى

نۇر-سۇلتان. قازاقپارات - شەتەلدە تۇراتىن قازاق دياسپوراسى وقۋشىلارى اراسىندا وتكەن «ۇلى دالا ەلى» اتتى ادەبي بايقاۋدىڭ قورىتىندىسى شىقتى، دەپ حابارلايدى قازاقپارات «وتانداستار» قورىنىڭ باسپا ءسوز قزىمەتىنە سىلتەمە جاساپ.

حالىقارالىق بايقاۋعا شىعارماشىلىق جۇمىستار 2019-جىلدىڭ 1- ساۋىرىنەن باستاپ 30- مامىرعا دەيىن قابىلداندى. 2019-جىلدىڭ 1- ماۋسىمىنان باستاپ 10- ماۋسىمعا دەيىن قازىلار القاسى كەلىپ تۇسكەن جۇمىستاردى ساراپتاپ، قورىتىندى شىعاردى.

كونكۋرستا مىناداي تاقىرىپتار قامتىلدى: «مەن قازاقپىن!»، «قازاقستان، مەنىڭ جەرىم، تۋعان ولكەم!»، «وتانمەن رۋحاني بايلانىس ءتىلى»، «ءداستۇر - رۋحاني ءومىردىڭ نەگىزى».

بايقاۋعا قاتىسقان بالالاردىڭ I جاس توبى بويىنشا بايقاۋعا - 19 جۇمىس، Ⅱ جاس توبى بويىنشا - 15 جۇمىس كەلىپ تۇسكەن. باس-اياعى 34 جۇمىستى كوميسسيا مۇشەلەرى ساراپتاپ، 10 بالدىق جۇيەمەن باعالادى.

كوميسسيا ەڭ باستى كريتەري رەتىندە جۇمىستىڭ تاقىرىبىنا جانە نەگىزگى يدەياسىنا سايكەستىگى، تاقىرىپتىڭ تولىق اشىلۋى جانە ويدىڭ بەرىلۋ ءتاسىلى سياقتى كريتەريلەرگە سۇيەنە وتىرىپ، قورىتىندى شىعاردى.

«جالپى، جۇمىستاردىڭ بارلىعى دا تاقىرىپقا ساي جازىلعان، بالالار نەگىزگى يدەيانى اشۋعا تىرىسقان. ەسسەگە قويىلاتىن تالاپتاردىڭ بارلىعىن ساقتاي وتىرىپ، وزىندىك وي-تۇجىرىمدارىن ەرەكشە تاسىلمەن بەرە بىلگەن وقۋشىلار دا بار.

اسىرەسە، I جاس توبىندا (13-15 جاس ارالىعىنداعى بالالار) سولتانوۆ رايحات، اسىلباشيەۆا كاميليا، بايتۋللا باتان ۇلى، سۇلەيمەنوۆ ماساليم سياقتى جاس تالانتتاردىڭ، سول سياقتى Ⅱ جاس توبىندا (16-18 جاس ارالىعىنداعى وقۋشىلار) ەركىنبەك اقتوتى، امەنوۆا اليما، بەكتۇر ابدۋلحاكيم، حاستي ءابدولازيز سىندى جەتكىنشەكتەردىڭ ەڭبەكتەرىن ەرەكشە اتاپ وتكىمىز كەلەدى» - دەيدى قازىلار القاسىنىڭ مۇشەسى اينۇر امانگەلدى قىزى.

ساراپتاما كوميسسياسىنىڭ شەشىمى بويىنشا بايقاۋعا قاتىسقان 13-15 جاس ارالىعىنداعى بالالاردىڭ ەڭبەكتەرى بولەك، 16-18 جاس ارالىعىن قامتيتىن جەتكىنشەكتەردىڭ ەڭبەكتەرى بولەك باعالاندى.

جۇلدەگەرلەر:

I جاس توبى - 13-15 جاس ارالىعى بويىنشا:

1-ورىن - سولتانوۆ رايحات

2-ورىن - اسىلباشيەۆا كاميليا

3-ورىن - بايتۋللا باتان ۇلى

4-ورىن - سۇلەيمەنوۆ ماساليم

Ⅱ جاس توبى 16-18 جاس ارالىعى بويىنشا:

1-ورىن - ەركىنبەك اقتوتى

2-ورىن - حاستي ءابدولازيز

3-ورىن - امەنوۆا اليما

4-ورىن - بەكتۇر ابدۋلحاكيم

جەڭىسكە جەتكەن 4 ۇزدىك جۇمىس اۆتورلارى سولتانوۆ رايحات (رەسەي)، اسىلباشيەۆا كاميليا (شۆەتسيا)، ەركىنبەك اقتوتى (موڭعوليا) مەن حاستي ءابدولازيز (يران) اتامەكەنى - قازاقستان رەسپۋبليكاسىنا جولداما جەڭىپ الدى.

«ءبىز اينالامىزداعى باسقا ۇلت وكىلدەرىنە قازاقتىڭ كىم ەكەنىن تانىتىپ، سالت-ءداستۇرىمىزدى كورسەتۋگە تىرىسامىز. ناۋرىز مەيرامى، قۇربان ايت، قازاعىمىزدىڭ كوپتەگەن ءتول مەرەكەلەرىن تويلاپ، ۇلتتىق كيىمدەرىمىزدى كيىپ، ءجيى كورىسىپ تۇرامىز. قازاقستاننىڭ تۋى وسىنداعى ءاربىر قازاقتىڭ ءۇيىنىڭ تورىنەن ورىن العان. شەرتە الماساق تا، «ناعىز قازاق - دومبىرا» ۇنەمى قاسىمىزدا جۇرەدى. مەكتەپتە وقىپ جۇرگەن كەزدە بالالارمەن قازاقستانعا بارساق، نە ىستەيتىنىمىز تۋرالى كوپ ايتاتىنبىز. سونداعى وي-ارماندارىمىزدى ەسىمە السام، ءالى كۇنگە شەيىن كوزىم مولدىرەپ، قۋانىشتىڭ جاسىنا تولادى. ەلىمە بارعان كەزدە ونىڭ توپىراعىن ءسۇيۋ، جەرىنە باس ءيىپ «اسسالاۋماعالەيكۋم» دەپ سالەمىمدى بەرىپ، كەڭ-بايتاق جەرىمنىڭ گۇلى مەن جۋسانىنا تولى اۋاسىن يىسكەپ، ومىرگە جاڭا كەلگەن نارەستەگە ۇقساپ باستان جاڭا ءبىر سەزىمدى كەشىرگىم كەلەتىن. سول ارمان ورىندالدى»، - دەيدى گورگان قالاسىنان (يران) حاستي ابدولازيز تاريحي وتانىنا دەگەن ىقىلاسىن ءبىلدىرىپ.

استانا كۇنىن مەرەكەلەۋ اياسىندا بايقاۋ جەڭىمپازدارىنا نۇر-سۇلتان قالاسىنا جانە «بۋراباي» مەملەكەتتىك ۇلتتىق تابيعي پاركىنە بەس كۇندىك جولداما بەرىلدى.