ورىس تىلىندە سويلەگەن دەپۋتاتقا قارسى نارازىلىق بىلدىرۋشىلەر پارلامەنت عيماراتىنا شابۋىل جاسادى

 دەپ حابارلايدى «قازاقپارات» ح ا ا Deutsche Welle-گە سىلتەمە جاساپ.

جاپپاي نارازىلىق بەيسەنبى كۇنى، 20 - ماۋسىمدا باس اسسامبلەياداعى رەسەي دەلەگاتسياسىنىڭ پراۆوسلاۆيە پارلامەنتارالىق اسسامبلەياسىنا قاتىسۋىنا بايلانىستى باستالدى. دەلەگاتسيانى باسقارۋشى جانە ا س م باسشىسى ر ف مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ سەسسيا كەزىندە گرۋزيا پارلامەنتى سپيكەرىنىڭ كرەسلوسىنا وتىرىپ، جينالعاندارعا ورىس تىلىندە سويلەگەنى وپپوزيتسيانىڭ نارازىلىعىن تۋدىردى. گرۋزيانىڭ وپپوزيتسيالىق دەپۋتاتتارى مۇنى قورلاۋ دەپ باعالاپ نارازىلىقتارىن ءبىلدىرىپ، باس اسسامبلەيانىڭ جۇمىسىن توقتاتتى.

 Еuronews مالىمەتىنشە، شەرۋشىلەر گرۋزيا ءى ءى م باسشىسى گەورگي گاحاريا مەن سپيكەر يراكليي كوباحيدزەنىڭ وتستاۆكاعا كەتۋىن، سونداي- اق كەزەكتەن تىس پارلامەنت سايلاۋى وتكىزىلۋىن تالاپ ەتىپ، پارلامەنت عيماراتىنا بىرنەشە رەت شابۋىل جاساعان.

گرۋزيا ىشكى ىستەر ءمينيسترى گەورگيي گاحاريا شەرۋشىلەردى پوليتسياعا باعىنۋعا شاقىردى، دەپ حابارلايدى ت ا س س. «مەن ەڭ الدىمەن الاڭدا تۇرعان ءار ازاماتتى، مۇمكىن ولار ادىلەتتى نارازىلىق ءبىلدىرىپ تۇرعان بولار، پوليتسيا تالاپتارىنا باعىنۋعا شاقىرامىن. مۇندا بولىپ جاتقاننىڭ بارلىعى مەملەكەتتىك ينستيتۋتتارعا شابۋىل سانالادى»، - دەدى ول بەيسەنبى كۇنى جۋرناليستەرگە بەرگەن سۇحباتىندا.

نارازىلىق بىلدىرۋشىلەرگە قارسى كوزدى جاساۋراتاتىن گاز بەن رەزەڭكە وقتار قولدانىلدى. گرۋزيا باسپا ءسوزى بىرنەشە ادامنىڭ اۋىر جاراقات العانىن حابارلادى. گرۋزيا دەنساۋلىق ساقتاۋ مينيسترلىگىنىڭ مالىمەتىنشە، بارلىعى 52 ادام زارداپ شەككەن، ولاردىڭ 38- ءى - پوليتسيا قىزمەتكەرلەرى. كەشكىسىن رەسەيدىڭ دەپۋتاتى س. گاۆريلوۆ جانە باسقا دا مەملەكەتتىك دۋمانىڭ دەپۋتاتتارى تبيليسيدەن ۇشىپ كەتتى.