تۇركىستان وبلىسىندا «تولە ءبي» فيلمىنىڭ تانىستىرىلىمى ءوتتى
«رۋحاني جاڭعىرۋ» باعدارلاماسى اياسىندا تۇركىستان وبلىس اكىمدىگىنىڭ قولداۋىمەن تۇسىرىلگەن فيلمنىڭ تۇساۋكەسەرى كوپشىلىكتىڭ كوڭىلىنەن شىقتى.
«ساق» كينوستۋدياسى مەن «وڭتۇستىك فيلم» مەكەمەسى بىرلەسىپ تۇسىرگەن «تولە ءبي» تەلەحيكاياسى ءوزىنىڭ تاريحي سالماعىمەن، قىزىقتى وقيعالارىمەن، شەبەر سەناريىمەن كورەرمەن جۇرەگىنە جول تاۋىپ، بويداعى وتانشىلدىق رۋحتى وياتا ءبىلدى»، - دەلىنگەن وڭىرلىك كوممۋنيكاتسيالار قىزمەتىنىڭ اقپاراتىندا.
فيلمدە ۇلى بابامىز تولە ءبيدىڭ بالالىق شاعىنان باستاپ ءيسى قازاققا تولە ءبي اتانعان قارت كەزىنە دەيىنگى ءومىرى تولىق قامتىلعان. سونداي-اق داناگوي ءبيدىڭ تاۋكە حان، قازىبەك ءبي، ايتەكە ءبي، بوگەنباي، قابانباي باتىرلارلار سەكىلدى زامانداستارىمەن بىرگە ەلدىك ماسەلەلەردى شەشكەن ساتتەرى باياندالادى.
تەلەحيكايا 10 سەريادان تۇرادى. ءار سەرياسى 30 مينۋتتان. فيلمنىڭ تانىستىرىلىمىندا تۇركىستان وبلىستىق مادەنيەت باسقارماسىنىڭ باسشىسى يسابەك نۇرداۋلەت قۇتتىقتاۋ ءسوز سويلەپ، تۋىندىنى جارىققا شىعارعان ازاماتتارعا العىسىن ايتتى.
تەلەحيكايانىڭ رەجيسسەرى - باتىرحان داۋرەنبەكوۆ، پروديۋسەرى - نۋريددين پاتتەيەۆ، كوركەمدىك جەتەكشىسى - ساتىبالدى نارىمبەتوۆ، سەناري اۆتورى - باقىتجان قۇلجاباي، شويبەك ورىنباي، قويۋشى وپەراتور - فۋركات سايپوۆ، كومپوزيتور - رۋسلان شىنىقۇلوۆ.
باستى رولدەردە - ابزال تولەن جانە ساعىندىق ءجۇمادىلوۆ. فيلمنىڭ قىسقارتىلعان نۇسقاسى تۇركىستاندىقتاردىڭ نازارىنا ۇسىنىلعاننان كەيىن تۋىندىنىڭ كوركەمدىك جەتەكشىسى، كورنەكتى رەجيسسەر ساتىبالدى نارىمبەتوۆ فيلمگە ءوز ۇلەسىن قوسقانىن ماقتان تۇتاتىنىن جەتكىزدى.
ال تولە ءبي تۋرالى كىتاپتىڭ اۆتورى، جازۋشى شويبەك ورىنباي ءوز رومانىنىڭ ەكرانعا ءساتتى شىققانىنا قۋانىشتى ەكەنىن، سەنىمى اقتالعانىن اتاپ ءوتتى.
فيلم رەجيسسەرى باتىرحان داۋرەنبەكوۆ: «سەريال ارقىلى تولە ءبي بابامىزدىڭ تەك شەشەن عانا ەمەس، جاس كەزىندە ەل ءۇشىن قولىنا نايزا العان باتىر بولعانىن، كەيىن ۇلكەن ساياساتكەرگە اينالعانىن، «جەتى جارعى» زاڭدار جيناعىن شىعارۋعا اتسالىسقان تۇلعا ەكەنىن كورسەتە بىلدىك. قولداۋ بىلدىرگەن تۇركىستان وبلىسى اكىمدىگىنە راحمەت. ءبىز ەندى تاريحي فيلم تۇسىرۋدەن قورىقپايمىز»، - دەدى.
سالتاناتتى جيىن سوڭىندا فيلمگە اتسالىسقان ازاماتتارعا العىس حاتتار تاپسىرىلدى.