قازاق اۋىلدارىن ەتنوگرافيالىق ەكسپەديتسيا ارالايدى

پەتروپاۆل. قازاقپارات - ق ر ۇلتتىق مۋزەيى م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىمەن بىرلەسىپ، قىزىلجار ءوڭىرىنىڭ قازاق اۋىلدارىنا ەكسپەديتسيا ۇيىمداستىردى، دەپ حابارلايدى قازاقپارات ءتىلشىسى.

سارىارقا كەشەندى ەتنوگرافيالىق ەكسپەديتسياسى ۇلتتىق مۋزەيدىڭ 5 جىلدىق مەرەيتويى اياسىندا وتپەك. سولتۇستىك قازاقستان وبلىسى قازاقتارىنىڭ ماتەريالدىق ەمەس مادەني مۇراسىن زەرتتەۋگە باعىتتالعان. ناتيجەسىندە سالت-ءداستۇردىڭ بىرەگەي تۇرلەرىن انىقتاپ، كوپشىلىككە تاراتۋ، جانداندىرۋ جانە ولاردى ءارتۇرلى فورماتتاردا پايدالانۋدى كوزدەيدى.  

 

ەتنوگرافيالىق ەكسپەديتسياعا ۇلتتىق مۋزەيدىڭ 3 عىلىمي قىزمەتكەرى جانە م. قوزىبايەۆ اتىنداعى سقمۋ تاريح جانە ازىق تۇلىك ونىمدەرىنىڭ تەحنولوگياسى ماماندىقتارىنىڭ 20 عا جۋىق ستۋدەنتى ءۇش اپتاعا اتتاندى. ءىس-شارا اياسىندا ولار س ق و-نىڭ ءۋاليحانوۆ جانە ەسىل اۋداندارىن ارالايدى. وسىلايشا ماتەريالدى ەمەس مادەني قۇندىلىقتاردى زەرتتەيدى.

 

 «بيىل حالىق اراسىنا شىعىپ، اتا-اجەلەرىمىزبەن كەزدەسىپ، اۋىز ادەبيەتىنىڭ ۇلگىلەرىن، اڭىز- اڭگىمەلەردى سولاردىڭ ءوز اۋزىنان جازىپ الۋدى ءجون كوردىك. ساندىك- قولدانبالى ونەر، وتباسىلىق- تۇرمىستىق جورالار، قازاقتىڭ ۇلتتىق تاعامدارى، ۇلتتىق ويىندار - وسىنىڭ ءبارىن جازىپ الۋعا تىرىسامىز. ويتكەنى، مادەني مۇرامىز ۇرپاق اۋىسقان سايىن كوشى- قون، باسقا دا فاكتورلاردىڭ سالدارىنان جويىلىپ بارادى»، - دەيدى ق ر ۇلتتىق مۋزەيىنىڭ ءبولىم جەتەكشىسى، ەتنوگراف ايگەرىم مۇساعاجينوۆا.

 

ۇلتتىق مۋزەيدىڭ جەتەكشى عىلىمي قىزمەتكەرى ايگەرىم مۇساعاجينوۆانىڭ بۇل سالادا جۇرگەنىنە 15 جىلعا جۋىقتاعان. قازاقستاننىڭ تۇكپىر- تۇكپىرىن ارالاعان ول ناتيجەسىندە ۇمىت بولا جازداعان 200 دەي ۇلتتىق تاعامدى انىقتاپ، جازىپ الىپتى. بۇل جولى نەگىزىنەن جاستاردان قۇرالعان ەكسپەديتسياعا جەتەكشىلىك ەتپەكشى.

«نەلىكتەن تاڭداۋ سولتۇستىك قازاقستان وبلىسىنا ءتۇستى؟ ويتكەنى بۇل - قازاقتىڭ ءداستۇرى بۇزىلماي ساقتالعان بىرەگەي ايماق. ماقساتىمىز - جاستاردى قاتىستىرا وتىرا ەتنوگرافيالىق زەرتتەۋ جۇرگىزۋدىڭ تاسىلدەرىن كورسەتۋ، بولاشاق مامانداردى ءبىزدىڭ باي مۇرامىزبەن تانىستىرۋ. بىلتىر سىناق رەتىندە قىزىلجار ءوڭىرىنىڭ بىرەر اۋىلىن ارالادىق. سونىڭ وزىندە وسى ايماققا عانا ءتان 13 ۇلتتىق تاعامدى انىقتادىق. بۇعان دەيىن بولعان، ءبىراق باسقا وڭىرلەردە جوعالىپ كەتكەن قىزىقتى بىرنەشە سالتتى كورىپ، جازىپ الدىق»، - دەيدى ايگەرىم مۇساعاجينوۆا.

زەرتتەۋ ناتيجەلەرى بولاشاقتا ءداستۇرلى مادەنيەتكە جانە مۋزىكالىق فولكلورعا، تاماقتانۋ تەحنولوگياسى مەن حالىق اۋىز ادەبيەتىنە ارنالعان وقۋ كۋرستارىندا قولدانىلماقشى. سونداي-اق، ارنايى البوم جاساپ شىعارۋ دا جوسپاردا بار.