قاراعاندىلىق پوليتسەيلەر بالالارعا ارنالعان مۋلتفيلم قۇراستىردى
قىسقا مەتراجدى انيماتسيالىق فيلم پوليتسيا دەپارتامەنتى باسشىلىعىنىڭ تاپسىرماسى بويىنشا ازىرلەندى. مۋلتيپليكاتسيالىق كارتينا نەگىزىنە ق ر ءى ءى م ارداگەرى نۇرلان تەلاگيسوۆتىڭ ولەڭدەرى ەنگىزىلدى. سيۋجەت بويىنشا قۇمدا ويناپ وتىرعان ءۇش بالا ءوتىپ بارا جاتقان پاترۋلدىك ماشينانى كورەدى. بالالار ءبىر- بىرىنە پوليتسيادا جۇمىس ىستەيتىن اكەلەرى تۋرالى ايتا باستايدى. سودان كەيىن ولاردىڭ جانىنا زەينەتكەر كەلەدى. ول بالدىرعاندارعا ناعىز زاڭ قىزمەتشىسى قانداي بولۋ كەرەكتىگىن جانە پوليتسەي بولۋ ءۇشىن نە ىستەۋ قاجەتتىگىن اڭگىمەلەيدى.
مۋلتفيلمدە سونداي- اق، قازاقستاندىق پوليتسيا قىزمەتكەرلەرىنىڭ ەرلىگى ايتىلادى. ماسەلەن، وقۋشىلاردى الىپ كەلە جاتقان اۆتوبۋستىڭ جۇك كولىگىمەن سوقتىعىسۋىنىڭ الدىن الۋ ءۇشىن ءوز ءومىرىن قيعان جول پوليتسياسىنىڭ ينسپەكتورى قايرات جۇمابەكوۆ جانە جانىپ جاتقان پاتەردەن ءتورت بالانى قۇتقارعان ۋچاسكەلىك ينسپەكتور داۋرەن التايەۆ تۋرالى باياندالادى. مۋلتفيلم قازاقستان پوليتسياسى كۇنى قارساڭىندا ءتۇسىرىلدى.