ەلوردادا «تولە بي» تاريحي كينوتۋىندىسىنىڭ تۇساۋكەسەرى ءوتتى
تۇركىستان وبلىسىنىڭ قۇرىلۋىنا ءبىر جىل تولۋىنا وراي تۇسىرىلگەن تۋىندىنى العاشقى بولىپ ەلوردالىقتار تاماشالادى.
تەلەكيكايا قازاق تاريحىنداعى ءۇش ءبيدىڭ ءبىرى سانالاتىن تولە ءبيدىڭ بالا كەزىنەن باستاپ ەل ابىزى اتانعان شاعىنا دەيىنگى ءومىرىن قامتىعان.
«ساق» كينو ستۋدياسى مەن «وڭتۇستىك فيلم» كومپانياسىنىڭ بىرلەسكەن جوباسىنا نۇريددين پاتتەيەۆ پروديۋسەرلىك ەتكەن.
«بۇل فيلمنىڭ باستى كەيىپكەرى تولە بي بولعانىمەن، سول كەزدەگى زامان تىنىسىن، بيلەر ينستيتۋتىنىڭ بار كەرەمەتىن كورسەتۋگە تىرىستىق. فيلمدە داناگوي تولە ءبيدىڭ تاۋكە حان، قازىبەك بي، ايتەكە بي، بوگەنباي، قابانباي باتىرلارلار سەكىلدى زامانداستارىمەن ۇزەڭگىلەس بولىپ، ءوز ەلىنىڭ، ءوز جەرىنىڭ قامىن جەگەن قانشاما ءىس- ارەكەتتەرى كەڭىنەن باياندالادى. تاۋكە حاننىڭ «جەتى جارعىنى» جاڭعىرتار شاعىندا بۇكىل قازاق دالاسىنان 12 توبە ءبيدى الدىرعان ءساتى بار. ياعني، تۋىندىعا سول تۇستارداعى قازاق تاريحىنا اسەرى بولعان تالاي تۇلعانىڭ وبرازى ەندى. تولە ءبيدىڭ كەزىندە تاشكەنت قالاسىن 4 رەت جوڭعارلار باسىپ العان ەكەن. دانا ءبيدىڭ باستاۋىمەن ىلعي دا قازاقتار وزىنە قايتارىپ وتىرعان. سول تارتىستىڭ ءبىرى ەپيزود رەتىندە كىردى» ، - دەيدى «ساق» كينوستۋدياسىنىڭ ديرەكتورى نۇريددين پاتتەيەۆ.
تۇركىستان وبلىسى اكىمدىگىنىڭ بيۋدجەتىنە تۇسىرىلگەن حيكايانىڭ ءار سەرياسى 30 مينۋتتان تۇرادى.
«بەلگىلى رەجيسسەر ساتىبالدى نارىمبەتوۆ جوباعا كوركەمدىك جەكەتشى رەتىندە اتسالىستى. ال مارحابات بايعۇت كينونىڭ ءتىل تازالىعىنا جاۋاپ بەردى. فيلمگە نەگىزىنەن جەرگىلىكتى اكتەرلەردى تارتتىق. وبلىس بيۋدجەتىنە تۇسىرىلگەندىكتەن، ەلگە تانىمال ارتىستەردى شاقىرا المادىق. ونىڭ ۇستىنە وبلىس باسشىلىعىن اكتەرلەر قۇرامىن مەيلىنشە جەرگىلىكتى مامانداردان تارتۋدى تاپسىرعان. تولە ءبيدىڭ جاس كۇنىن ابزال تولەن ەسىمدى جاس اكتەرىمىز وينادى. ال ابىز كەزىن تۇسىرەر كەزدە ابزالعا ءتۇرى كەلەتىن اكتەر تاپپاي، ءبىراز قينالدىق. اقىرىندا رەجيسسەر باتىرحان داۋرەنبەكوۆپەن اقىلداسا كەلىپ، الماتى وبلىسىنان ساعىندىق ءجۇمادىلوۆ دەگەن ارىپتەسىمىزدى شاقىردىق» ، - دەيدى پروديۋسەر.
حيكايانىڭ سەناري اۆتورى - باقىتجان قۇلجاباي پەن شويبەك ورىنباي. ال اۋەزبەن ارلەگەن - كومپوزيتور رۋسلان شىنىقۇلوۆ.
تۇركىستان وبلىسىنىڭ ءبىر جىلدىعى اياسىندا نۇر- سۇلتان قالاسىندا «وڭتۇستىك فيلم» كومپانياسى مەن «ساق» كينوستۋدياسىنىڭ بىرنەشە انيمياتسيالىق تۋىندىسى كورسەتىلمەك. ال «تولە بي» حيكاياسىنىڭ تولىق نۇسقاسى ەلوردا كۇنى قارساڭىندا «حابار» ارناسىنان كورەرمەندەرگە جول تارتادى.