قانداستارعا ارنالعان «قازاق كارتاسى» جاسالادى

نۇر-سۇلتان. قازاقپارات - شەتەلدىك قازاقتاردىڭ قازاقستان اۋماعىندا ەل ازاماتتارىمەن بىردەي قۇقىققا يە بولۋىنا مۇمكىندىك بەرەتىن «قازاق كارتاسى» اتتى قۇجاتتىڭ جوباسى دايىندالىپ جاتىر، دەپ حابارلايدى قازاقپارات ءتىلشىسى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى، «وتانداستار» قورى جانە دۇنيەجۇزى قازاقتارى قاۋىمداستىعى باسشىلارىنىڭ بىرلەسكەن وتىرىسىندا ايتىلدى.

«وتانداستار» قورىنىڭ پرەزيدەنتى نۇرتاي ابىقايەۆتىڭ ايتۋىنشا، «قازاق كارتاسى» دەپ اتالاتىن قۇجات شەتەلدىك قازاقتاردىڭ تاريحي وتانىندا ۋاقىتشا ءومىر ءسۇرىپ، بەيىمدەلۋى ءۇشىن جاسالماق.

«شەت ەلدەردەگى قازاقتاردى قولداۋعا باعىتتالعان زاڭ قابىلداناتىن بولادى. سونىڭ اياسىندا «قازاق كارتاسى» دەگەن قۇجات جاسالۋى مۇمكىن. ول قۇجات سىرتتاعى قازاقتارعا قازاقستاندىقتارمەن بىردەي ءومىر سۇرۋگە مۇمكىندىك تۋعىزادى. ياعني، ءبىلىم الۋ، دارىگەرگە قارالۋ، بيزنەسپەن اينالىسۋ، جۇمىس ىستەۋ سياقتى بارلىق ءومىر اسپەكتىلەرىندە قازاقستان ازاماتتارىمەن بىردەي قۇقىققا يە بولادى. تەك ساياساتپەن اينالىسۋعا بولمايدى. ول ءۇشىن ازاماتتىق الۋى قاجەت. «قازاق كارتاسى» قولىندا بار قازاق وتباسىمەن ءبىزدىڭ ەلدە ەشقانداي ۆيزاسىز ءجۇرىپ-تۇرا الادى»، - دەيدى نۇرتاي ابىقايەۆ.

نۇرتاي ابىقايەۆ «قوعامدىق قابىلداۋ» جوباسى اياسىندا شەتەلدىك قازاقتارعا ارنالعان ءبىرىڭعاي بايلانىس ورتالىعى جۇمىس ىستەپ تۇرعانىن ايتتى. «ءبىر تەرەزە» قاعيداتى بويىنشا جۇمىس ىستەيتىن ورتالىق ارقىلى 750 دەن استام اۋىزشا ءوتىنىش تۇسكەن.

ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى قون پروتسەسىن مونيتورينگىلەۋ باسقارماسىنىڭ باسشىسى داستان ايتقۇلوۆ «قازاق كارتاسى» ازىرگە جوبا ەكەنىن ايتادى.

«دۇنيەجۇزى قازاقتارى قاۋىمداستىعى «قازاق كارتاسىن» جاساۋ تۋرالى ۇسىنىس بەرگەن بولاتىن. بۇل ءالى قاراستىرىلۋدا. باسقا ەلدەردە وسىنداي جاقسى تاجىريبەلەر بار. سونى بىزگە دە پايدالانساق دەگەن نيەتتەن تۋىنداپ وتىر. نەگىزگى ماقساتى - شەتەلدەن قازاقستانعا كەلۋگە دايىن ەمەس قازاقتاردىڭ بەيىمدەلۋىنە ۋاقىت بەرۋ. ازىرگە ول ۋاقىتتىڭ قانشا مەرزىمگە بەرىلەتىنى ناقتىلانعان جوق»، - دەيدى مينيسترلىك وكىلى.