قازاقستان پرەزيدەنتى قاسىم- جومارت توقايەۆ اكىمدەرمەن كەڭەس وتكىزدى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ اقوردادا وبلىستاردىڭ جانە نۇر- سۇلتان، الماتى، شىمكەنت قالالارىنىڭ اكىمدەرىمەن كەڭەس وتكىزدى، دەپ حابارلايدى اقوردانىڭ باسپا ءسوز قىزمەتى.

قازاقستان پرەزيدەنتى اكىمدەردىڭ الدىنا ءبىرقاتار مىندەت قويدى. مەملەكەت باسشىسى ەڭ الدىمەن ازاماتتاردىڭ قۇقىقتارى مەن بوستاندىعىن، ولاردىڭ تىنىشتىعى مەن قاۋىپسىزدىگىن قامتاماسىز ەتۋدى تاپسىردى.

- ەلىمىزدە زاڭ ۇستەمدىك ەتۋى ءتيىس. زاڭ الدىندا بيلىك وكىلدەرى دە، ازاماتتار دا بىردەي. باستىسى - حالىقپەن ديالوگ ورناتۋ. بيلىك حالىقتى تىڭداپ، ولاردىڭ تالاپ- تىلەكتەرىنە زەيىن قويۋى كەرەك. شەنەۋنىكتەر كابينەتتەرىندە وتىرماۋى كەرەك. تۇرعىندارمەن جۇمىس ىستەۋى كەرەك. اكىمدەر مەملەكەتتىڭ ساياساتىن ازاماتتارعا ءتۇسىندىرۋى ءتيىس، - دەدى قاسىم- جومارت توقايەۆ.

 قازاقستان پرەزيدەنتى اكىمدەردىڭ قىزمەتى جاڭا جۇمىس ورىندارىن اشۋعا باعىتتالۋى كەرەك ەكەنىن ايتتى. بۇل اكىمدەر جۇمىسىنىڭ باستى كورسەتكىشى بولادى.

قاسىم- جومارت توقايەۆ جاڭادان قۇرىلعان ۇلتتىق قوعامدىق سەنىم كەڭەسىنە مۇشە بولاتىن ازاماتتاردى بارلىق وڭىردەن ۇسىنۋ قاجەت ەكەنىن ايتتى. ولار ىرىكتەۋ ءادىل بولۋى شارت.

مەملەكەت باسشىسى جاستار ساياساتىنا دا توقتالىپ، ول ءۇشىن الەۋمەتتىك ليفتىلەر قالىپتاستىرۋ قاجەتتىگىن ايتتى.

- مەنىڭ تاپسىرمام بويىنشا، پرەزيدەنتتىڭ كادرلىق رەزەرۆى قۇرىلىپ، وعان 300 جاس مامان ەنگىزىلەدى. اكىمدەردىڭ مىندەتى - رەزەرۆكە ەڭ دارىندى جانە كەلەشەگىنەن ءۇمىت كۇتتىرەتىن جاس باسقارۋشىلاردى ىرىكتەۋ، - دەدى قاسىم- جومارت توقايەۆ.

سوڭىندا مەملەكەت باسشىسى ءبىرقاتار ناقتى تاپسىرما بەردى.