كورەيا تۇرعىندارى قازاق سۋسىندارىن ءسۇيسىنىپ ىشەدى
وعان الەمنىڭ 46 ەلىنەن بىرنەشە تۋريستىك كومپانيا قاتىستى. اراسىندا قازاقستاندىق تۋروپەراتورلار دا بار. حالىقارالىق كورمە. 46 مەملەكەتتىڭ وكىلدەرىنە ءوز ەلىن جارنامالاۋعا بىرەگەي مۇمكىندىك. بۇل رەتتە قازاقستاندىق مامانداردىڭ شوقتىعى بيىك. ويتكەنى كەلۋشىلەردىڭ قاراسى ۇزىن- سونار كەزەككە ۇلاستى. بارلىعىن قازاقى سۋسىن شالاپتىڭ ءدامى مەن دايىندالۋ ءتاسىلى قىزىقتىرادى.
الىبەك جايبەرگەنوۆ، بارمەن:
- ءبىز ونى قىشقىل ايراننان جاسايمىز. مىندەتتى تۇردە قۇرت پەن سۋ جانە ازداپ تۇز قوسامىز. ادەتتە ءبىر- ەكى كۇن تۇرعاننان كەيىن تابيعي گاز وزدىگىنەن تۇزىلەدى. الايدا بۇل جەردە ونداي ۋاقىت بولماعاندىقتان گازدالعان سۋ قوسىپ جاتىرمىز.
بۇگىندە كورەيالىقتار دۇرىس تاماقتانۋعا باسا ءمان بەرە باستاعان. سوندىقتان قازاق اسحاناسىنا قىزىعۋشىلار كوپ. ويتكەنى قۇرت، تالقان، بال، الما - بارلىعى تابيعي تازا ءونىم. كەز كەلگەنى دامنەن اۋىز ءتيىپ، ەلدىڭ تاريحى ءھام تابيعاتىمەن تانىسادى. بىلتىرعى كورمەدە قازاقستاننىڭ ءتىل ۇيىرەر تاعامىنا 35 مىڭ كورەيالىق ءتانتى بولعان.
قايرات ءسادۋاقاسوۆ، «Kazakh Tourism» ۇ ك باسقارما ءتوراعاسىنىڭ ورىنباسارى:
- نۇر- سۇلتان، الماتى قالالارى مەن الماتى وبلىسىنا تۋريستەردىڭ قىزىعۋشىلىعى جوعارى. ۆيزاسىز رەجيم بولعاندىقتان، سەنبى، جەكسەنبى كۇندەرى قازاقستانعا كەلىپ دەمالىپ كەتەتىن تۋريستەردىڭ سانى ارتىپ جاتىر. كوبىنە كورەيلەر گولف ويناپ، شىمبۇلاقتا شاڭعى تەپكەندى جانە تۇنگى الماتىدا سەرۋەندەگەندى ۇناتادى.
كيم سان بي، كورمە قوناعى:
- وڭتۇستىك كورەيا مەن سولتۇستىك كورەيا اراسىنداعى تەمىرجول قاتىناسى اشىلسا جاقسى بولار ەدى. سوندا قازاقستانعا بارۋ جولىمىز جەڭىلدەر ەدى.
«Kazakh Tourism» ۇلتتىق كومپانياسىنىڭ مالىمدەۋىنشە، سوڭعى ۋاقىتتا مالايزيا، بىرىككەن اراب امىرلىگى، گونكونگ جانە قىتاي ەلىنىڭ ازاماتتارى قازاقستانعا قىدىرۋدى ۇدەتە باستاعان. ال ەۋروپا ەلدەرىنىڭ ىشىندە گەرمانيا مەن رەسەي تۇرعىندارى ءبىزدىڭ ەلگە قوناق بولعاندى قۇپ كورەدى. ونداي ۇردىسكە تۋريستىك كومپانيالاردىڭ ءوزارا ىنتىماقتاسا جۇمىس ىستەۋى تۇرتكى بولعان.
www.24.kz