توقايەۆ وزبەكستان پرەزيدەنتىمەن تەلەفون ارقىلى سويلەستى
12:51, 10 - ماۋسىم 2019
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆپەن تەلەفون ارقىلى سويلەستى، دەپ حابارلايدى قازاقپارات اقورداعا سىلتەمە جاساپ.
وزبەكستان پرەزيدەنتى شاۆكات ميرزيەيەۆ قاسىم-جومارت توقايەۆتى قازاقستان رەسپۋبليكاسىنىڭ پرەزيدەنتى سايلاۋىنداعى ايقىن جەڭىسىمەن قۇتتىقتادى.
قاسىم-جومارت توقايەۆ شاۆكات ميرزيەيەۆكە قۇتتىقتاعانى ءۇشىن ريزاشىلىق ءبىلدىرىپ، باۋىرلاس ەلدەر اراسىنداعى ىنتىماقتاستىقتى جان- جاقتى ءارى قارقىندى ىلگەرىلەتۋ جونىندەگى ەلباسى نۇرسۇلتان نازاربايەۆتىڭ ۇستانعان ساياساتىن جالعاستىراتىنىن اتاپ ءوتتى.
مەملەكەتتەر باسشىلارى قاسىم-جومارت توقايەۆتىڭ بيىلعى 14-15 -ساۋىردە وزبەكستانعا جاساعان مەملەكەتتىك ساپارىنىڭ ناتيجەسىندە قول جەتكىزىلگەن ۋاعدالاستىقتاردىڭ ءتيىمدى جۇزەگە اسىرىلۋى قازاق- وزبەك قارىم-قاتىناستارىنىڭ دامۋىنا تىڭ سەرپىن بەرەتىنىنە سەنىمدىلىك ءبىلدىردى.