قازاقستان حالىق ءارتىسى روزا رىمبايەۆا ءوز تاڭداۋىن جاسادى

الماتى. قازاقپارات - قازاقستان حالىق ءارتىسى، مەملەكەتتىك سىيلىقتىڭ لاۋرەاتى، ءانشى روزا رىمبايەۆا سايلاۋدا داۋىس بەردى، دەپ حابارلايدى قازاقپارات ءتىلشىسى.

بۇگىن الماتىداعى ق ر ۇلتتىق كىتاپحاناسىندا ورنالاسقان №254 -سايلاۋ ۋچاسكەسىنە اتاقتى ءانشى ازاماتتىق بەلسەندىلىگىن تانىتۋعا كەلدى.

«قازاقستاننىڭ ءار ازاماتى ءوز تاڭداۋىن جاساۋى كەرەك. ءار جاڭا باسشى ءوز باعدارلاماسىن جاسايدى، ەل بولاشاعىنا ءوز باعىتىن بەرەدى. ءبىز - حالىق، باسشىلىقتىڭ جاساعان باعدارلاماسىنا قولداۋ بىلدىرەمىز. ءارى ناتيجە كۇتەمىز. پرەزيدەنتتىككە كانديدات ازاماتتاردىڭ بارلىعىنىڭ نەگىزگى ماقساتى مەملەكەتتى، حالىقتى جاقسى ومىرگە جەتكىزۋ، ءومىرىمىزدى جاقسارتۋ. حالىق تاڭداعان ازامات بۇگىن جەڭەدى دەپ ويلايمىن»، - دەدى روزا رىمبايەۆا.

ءانشىنىڭ بالالارى دا تاڭەرتەڭنەن سايلاۋ ۋچاسكەلەرىنە كەتكەن.

«مەنىڭ ۇلدارىم تەمىربەك جۇرگەنوۆ اتىنداعى ونەر اكادەمياسىندا ورنالاسقان ۋچاسكەدە داۋىس بەرىپ جاتىر. مەن ازاماتتاردىڭ بارلىعىن جاقسى بىلەمىن دەپ ايتا المايمىن. ءبىراق، كەيبىرەۋلەرىنىڭ باعدارلاماسىن تولىق وقىپ شىقتىم، جەكە دە تانىسپىن. سول ادامعا داۋىس بەردىم»، - دەدى ءانشى.

ايماقتىق سايلاۋ كوميسسياسىنىڭ ءتورايىمى جاننا اسانوۆانىڭ ايتۋىنشا، قالادا 554 سايلاۋ ۋچاسكەسى اشىلعان. سايلاۋ ۋچاسكەلەرىندە 1 ميلليونعا جۋىق الماتى تۇرعىنى تىزىمدەلگەن.

«وزدەرىڭىز بايقاعاندارىڭىزداي، بەلسەندىلىك وتە جوعارى. كەشكە دەيىن ازاماتتاردىڭ ساياسي بەلسەندىلىگى بۇدان دا ارتا تۇسەدى دەپ ويلايمىن»، - دەدى ول.

قالاعا 80 حالىقارالىق باقىلاۋشى كەلدى.

بۇعان دەيىن الماتى اكىمى باۋىرجان بايبەكتىڭ داۋىس بەرگەنىن حابارلاعان بولاتىنبىز.

قالا بويىنشا بۇگىندە 1 ميلليون 130 مىڭ 792 سايلاۋشى تىركەلگەن.

 ەسكە سالا كەتسەك، بۇگىن قازاقستان پرەزيدەنتىن كەزەكتەن تىس سايلاۋ باستالدى. ق ر پرەزيدەنتىنىڭ كەزەكتەن تىس سايلاۋىندا ەل ىشىندە جانە شەت ەلدەردە 9968 داۋىس بەرۋ ۋچاسكەسى جۇمىس ىستەيدى. سايلاۋ تۋرالى كونستيتۋتسيالىق زاڭعا سايكەس، داۋىس بەرۋ ۋاقىتى ستاندارتتى (ساعات 7.00-20.00 ارالىعى) بولادى.