بارلىق قازاقستاندىقتاردى ازاماتتىق بورىشىن وتەۋگە شاقىرامىن - ماۋلەن اشىمبايەۆ

پارتيا وكىلى ق ر ۇلتتىق كىتاپحاناسىندا ورنالاسقان №111-سايلاۋ ۋچاسكەسىندە جۇبايىمەن جانە قىزىمەن كەلدى.

«قازىر سايلاۋدا داۋىس بەرۋ پروتسەسى ءجۇرىپ جاتىر. مەنىڭ كەز كەلگەن پىكىرىم حالىقتىڭ تاڭداۋىنا ىقپال ەتپەۋى ءتيىس. سوندىقتان ەشنارسە ايتا المايمىن. ءبىر عانا ايتارىم، قازاقستاندىقتاردىڭ سايلاۋ ۋچاسكەسىنە كەلىپ، ءوز ازاماتتىق بورىشىن وتەۋگە شاقىرامىن. بۇل - شىن مانىندە ءاربىر قازاقستاندىقتىڭ جاۋاپكەرشىلىگى. بۇگىن وتە جاۋاپتى كۇن، ءاربىر قازاقستاندىق ءوز ۇلەسىن قوسۋى قاجەت»، - دەدى ماۋلەن اشىمبايەۆ.

سونىمەن بىرگە، ق ر ۇلتتىق قاۋىپسىزدىك كوميتەتىنىڭ باسشىسى كارىم ءماسىموۆ تە №111 -سايلاۋ ۋچاسكەسىندە ءوز تاڭداۋىن جاسادى.

ايتا كەتەيىك، ق ر ۇلتتىق كىتاپحاناسىندا ورنالاسقان №111-سايلاۋ ۋچاسكەسىندە 4661 تۇرعىن تىركەلگەن. ولاردىڭ 600 گە جۋىعى العاشقى ءۇش ساعاتتا داۋىس بەرىپ ۇلگەردى.

ق ر پرەزيدەنتىنىڭ كەزەكتەن تىس سايلاۋىندا ەل ىشىندە جانە شەت ەلدەردە 9968 داۋىس بەرۋ ۋچاسكەسى جۇمىس ىستەيدى. سايلاۋ تۋرالى كونستيتۋتسيالىق زاڭعا سايكەس، داۋىس بەرۋ ۋاقىتى ستاندارتتى (ساعات 7.00-20.00 ارالىعى) بولادى.

باتىس قازاقستان، اقتوبە، اتىراۋ، ماڭعىستاۋ، قىزىلوردا وبلىستارىندا ۋاقىت ايىرماشىلىعىنا بايلانىستى سايلاۋ ۋچاسكەلەرى جەرگىلىكتى ۋاقىت بويىنشا ساعات 07.00 دە - نۇر-سۇلتان ۋاقىتى بويىنشا ساعات 08.00 دە اشىلدى.