سولتۇستىك قازاقستاندا كوپ بالالى انالار كاسىپ اشۋعا دەن قويدى
«اتامەكەن» كاسىپكەرلەر پالاتاسى باسپا ءسوز قىزمەتىنىڭ حابارلاۋىنشا، بۇل - «باستاۋ» باعدارلاماسى ارقىلى كاسىپكەرلىكتىڭ قىر-سىرىن مەڭگەرگەن ەكىنشى توپ.
جوباعا قىزىلجار اۋدانىنىڭ تۇرعىندارى قاتىستى. ءبىر اي ءبىلىم العان 29 تىڭداۋشى ەندى وزدەرىنىڭ بيزنەس جوبالارىن قورعايدى.
ماريام اقسارينانىڭ 4 ۇلى بار. بولاشاق بيزنەسىندە وعان وسى بالالارى كومەكتەسپەك.
«مەنىڭ جەكە كاسىپكەرلىگىم بار. بۇعان دەيىن دۇكەن اشتىم، الايدا ول ءىسىم جۇرمەدى. مەملەكەتتىڭ جەكە ءىس اشۋعا كومەكتەسىپ جاتقانىن ەستىپ كەلدىم. وسى جەردە العان ءبىلىمىم ماعان بولاشاقتا كومەكتەسەدى. ەندى قولىمنان كەلەتىن نارسەمەن، ياعني بودەنە قۇسىن وسىرۋمەن اينالىسامىن»، - دەيدى ماريام.
بەسكول اۋىلىنىڭ تۇرعىنى ماريام اقسارينانىڭ ايتۋىنشا، ول بۇل كاسىپتى تاڭداماس بۇرىن نارىقتى زەرتتەگەن. قازىر سورەلەردە قاز، ۇيرەك، تاۋىق ەتى جەتكىلىكتى، ال بودەنە ەتى مەن جۇمىرتقاسى ىلۋدە ءبىر كەزدەسەدى. پەتروپاۆلداعى ساۋدا ورتالىقتارى ديەتالىق ءونىمدى كورشى وڭىرلەردەن اكەلەدى ەكەن.
«باستاۋ» باعدارلاماسىمەن ءبىلىم العاندار 200 ا ە ك مولشەرىندە گرانت الا الادى. مامانداردىڭ ايتۋىنشا، قازىر «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 - 2021 -جىلدارعا ارنالعان باعدارلاماسىنا وزگەرىستەر ەنگىزىلىپ جاتىر. ناتيجەسىندە كوپ بالالى انالارعا بيزنەس-يدەيالارىن جۇزەگە اسىرۋ ءۇشىن 505 مىڭ تەڭگە قايتارىمسىز مەملەكەتتىك گرانت بەرىلەدى. بۇدان باسقا ەڭبەك جانە الەۋمەتتىك قورعاۋ مينيسترلىگىنىڭ مالىمەتىنشە، بيىل كوپ بالالى انالارعا جانە مۇگەدەك جاندارعا ەلىمىز بويىنشا 5 مىڭ ميكرونەسيە ۇلەستىرىلمەك.
«الدىڭعى ەكى لەكتە ءبىز 680 سولتۇستىك قازاقستاندىقتى وقىتىپ شىعاردىق. ولاردىڭ 550 ىنىڭ بيزنەس-جوبالارى قولداۋ تاۋىپ، 100 ا ە ك مولشەرىندە گرانت الاتىن بولدى. بۇل جاڭا ءىس باستاۋ ءۇشىن جاقسى كومەك. سونداي-اق «ەڭبەك» باعدارلاماسى بويىنشا جىل باسىنان 73 نەسيە بەرىلدى. ولاردىڭ 39-ى بىلتىر «باستاۋ» بويىنشا وقىعاندار»، - دەيدى كاسىپكەرلەر پالاتاسىنىڭ س ق و بويىنشا ديرەكتورى دارحان قاليەۆ.
جالپى بيىل وڭىردە «باستاۋ» جوباسى بويىنشا 990 ادامدى وقىتۋ جوسپارلانعان. ولار - ءوزىن ءوزى جۇمىسپەن قامتىعاندار جانە جۇمىسسىز جۇرگەن تۇرعىندار.