ەلوردانىڭ كوپبالالى انالارى قولونەر بويىنشا تەگىن وقۋدان وتەدى

نۇر-سۇلتان. قازاقپارات - نۇر-سۇلتاندا قالا اكىمدىگىنىڭ قولداۋىمەن «اسىل انا» الەۋمەتتىك جوباسى ىسكە قوسىلدى.

جوبا اياسىندا 6، 7، 8، 9 -ماۋسىم كۇندەرى كوپبالالى انالارعا تىگىنشىلىككە، قولدانبالى ونەرگە ۇيرەتەتىن تەگىن شەبەرلىك ساباقتارى وتكىزىلەدى، دەپ حابارلايدى قالا اكىمدىگىنىڭ رەسمي سايتى.

شەبەرلىك ساباقتارىن ەلىمىزگە تانىمال، ەتنيكالىق ستيلدە قولونەر جانە ۇلتتىق ونەر بۇيىمدارىن شىعاراتىن ديزاينەر، ق ر پرەزيدەنتىنىڭ «التىن ساپا» سىيلىعىنىڭ لاۋرەاتى، «قۇرمەت» سىيلىعىنىڭ يەگەرى ىرزا تۇرسىنزادا وتكىزەدى. شەبەرلىك ساباقتارى «ديپلومات» قوناق ۇيىندە ساعات 11:00-دەن باستالادى.

شەبەرلىك ساباعىنىڭ قاتىسۋشىلارىنا قولدانبالى ونەردىڭ قىر-سىرى، جەكە كاسىپتى اشۋدىڭ جولدارى جانە ونى الەۋمەتتىك جەلىلەردى پايدالانا وتىرىپ، تابىستى جۇرگىزۋدى ۇيرەتەتىن بولادى.

«اتالمىش ءىس-شاراعا قولونەردى ۇيرەنگىسى كەلگەن كوپبالالى انالاردىڭ ءبارى قاتىسا الادى. ءوز كەزەگىندە قاتىسۋشىلار تاراپىنان تالپىنىس، ءوز بەتىنشە تابىس تابۋعا ۇمتىلۋ جانە تابىستى ايەلدەر قاتارىندا بولۋعا دەگەن ىنتا- جىگەر تالاپ ەتىلەدى»، - دەپ حابارلايدى ۇيىمداستىرۋشىلار.

ترەنينگ بارىسىندا پايدالى ءبىلىم العان كوپبالالى انالار ەلوردا كۇنى مەرەكەسىنە ارنالعان «اسىل انا» بايقاۋىنا قاتىسا الادى. ول 15 -ماۋسىمدا وتەدى.

بايقاۋعا قاتىسۋشىلار كورمەدە ءوز بۇيىمدارىن جۇرتشىلىققا ۇسىنادى، ال جەڭىمپازدار ديپلومدار مەن تىگىن ماشينالارى سەكىلدى باعالى سىيلىقتارعا يە بولادى.

ۇيىمداستىرىلعان شەبەرلىك ساباقتارى «اسىل انا» الەۋمەتتىك جوباسىنىڭ ءبىر بولىگى بولىپ ەسەپتەلەدى. ونىڭ ماقساتى - كوپبالالى انالاردى قولونەرشىلىككە ۇيرەتۋ، ولاردى ۇلتتىق برەندتى دامىتۋ ارقىلى شاعىن جانە ورتا بيزنەسكە تارتۋ. ءىس- شارالار كەشەنىنە وقىتۋ سەمينارلارى، تىگىن جانە قولدانبالى ونەردى وقىتۋ بويىنشا سەمينارلار، الەۋمەتتىك جەلىلەر ارقىلى بيزنەس جۇرگىزۋ ءۇشىن وزدەرىنىڭ كورمەلەرىن، شەبەرلىك سىنىپتارىن ۇيىمداستىرۋ كىرەدى. جوبانىڭ ءاربىر كەزەڭى شەبەرلەردىڭ، پسيحولوگتاردىڭ، زاڭگەرلەردىڭ جانە بيزنەس جاتتىقتىرۋشىلاردىڭ جەتەكشىلىگىمەن جۇرگىزىلەدى.

سونىمەن قاتار، «اسىل انا» جوباسى زاڭگەرلىك جانە پسيحولوگيالىق كەڭەستەر، وڭالتۋ كومەگىن كورسەتەتىن كوپبالالى انالاردى قولداۋ ورتالىعىن قۇرۋدى كوزدەيدى. بۇل جەردە كوپبالالى انالاردىڭ وزدەرى جۇمىسقا ورنالاسا الادى.

ورتالىقتا شاعىن بالاباقشا ۇيىمداستىرۋ جانە جىل بويى سەمينار- ترەنينگتەر مەن شەبەرلىك ساباقتارىن وتكىزۋ كوزدەلىپ وتىر. «اسىل انا» الەۋمەتتىك جوباسى كوپبالالى انالاردىڭ ءوز ءىسىن جۇرگىزۋ الەۋەتىن اشۋعا، ولاردىڭ ءوز مۇمكىندىكتەرىن دامىتۋعا، سونداي- اق ۇلتتىق قولونەرشىلىكتى زاماناۋي ترەندكە اينالدىرۋعا ىقپال ەتەدى دەپ كۇتىلىپ وتىر.

شەبەرلىك ساباقتارىنا قاتىسۋ تۋرالى ساۋالدارعا 87759976866، 87758604141 نومىرلەرىنەن جاۋاپ الۋعا بولادى.