افريكا فۋتبول كونفەدەراتسياسىنىڭ پرەزيدەنتى پاريجدە قاماۋعا الىندى

 نۇر- سۇلتان. قازاقپارات - افريكا فۋتبول كونفەدەراتسياسىنىڭ (CAF) پرەزيدەنتى احماد احماد بەيسەنبى كۇنى پاريجدە قاماۋعا الىندى. بۇل جايلى Jeune Afrique باسىلىمى حابارلادى.

احماد حالىقارالىق فۋتبول فەدەراتسياسىنىڭ (فيفا) كونگرەسىنە قاتىسۋ ءۇشىن پاريجگە كەلگەن. 5 - ماۋسىم كۇنى جيىن بارىسىندا پرەزيدەنت قىزمەتىنە شۆەيتسارلىق دجانني ينفانتينو قايتا سايلاندى. ال فرانسيانىڭ سىبايلاس جەمقورلىققا قارسى كۇرەس جونىندەگى ورتالىق بيۋروسىنىڭ وكىلدەرى قارجى جانە سالىقتىق قۇقىق بۇزۋشىلىقتارعا بايلانىستى 59 جاستاعى ماداگاسكارلىقتان جاۋاپ الۋدا.

 باسىلىمنىڭ حابارلاۋىنشا، تۇتقىنداۋ فرانسۋزدىق Technical Steel كومپانياسىمەن كەلىسىمگە قول قويۋ ءۇشىن CAF تىڭ نەمىستىڭ Puma فيرماسىمەن ءبىرجاقتى دەمەۋشىلىك كەلىسىمشارتتارىن بۇزۋىمەن بايلانىستى. افريكا فۋتبول كونفەدەراتسياسىنىڭ بۇرىنعى باس حاتشىسى امر ءحاحميدىڭ ايتۋىنشا، «Technical Steel» كومپانياسىمەن شارت جاسالۋىنا احمادتىڭ فرانسۋز كومپانياسىنىڭ باسشىلارىمەن تانىستىعى سەبەپ بولعان.