قازاق تاريحى باتىس پەن شىعىسقا قاتار اسەر ەتكەن - راسسەل باۋەرس

نۇر-سۇلتان. قازاقپارات - اريزونا شتاتى ا ق ش پەن قازاقستان اراسىنداعى ساۋدا-ەكونوميكالىق بايلانىستىڭ ورتالىعىنا اينالادى.

بۇل تۋرالى قازاقستانداعى ساۋدا-ينۆەستيسيالىق ميسيالاردىڭ كەلەشەگىن تالقىلاعان باسپا ءسوز ءماسليحاتىندا ايتىلدى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن شارادا اريزونا وكىلدەر پالاتاسىنىڭ سپيكەرى راسسەل باۋەرس ەكى ەل اراسىنداعى ەكونوميكالىق قارىم-قاتىناستىڭ تاريحىنا قىسقاشا توقتالىپ، ونى جانداندىرا تۇسۋگە نيەتتى ەكەنىن ءبىلدىردى.

«سىزدەردىڭ تاريح باتىس پەن شىعىسقا قاتار اسەر ەتكەن. ەكى الىپ ەكونوميكانىڭ ورتاسىندا تۇرسىزدار. ەل تىزگىنىندەگى تۇلعالار سارابدال ساياسات ۇستانىپ وتىر. بىزدە دە سىزدەر سياقتى كوشپەلى وركەنيەت بولعان. مىڭجىلدىق تاريحىمىز وتە ۇقساس. مادەنيەتتەرىڭىزدى قاتتى قاستەرلەيسىزدەر. سوندىقتان، سىزدەرمەن ارىپتەستىك ورناتۋ بىزگە وتە قولايلى»، - دەيدى راسسەل باۋەرس.

سپيكەردىڭ ايتۋىنشا، قازاقستان اەروعارىش سالاسىندا بايقوڭىر ايلاعىنىڭ مۇمكىندىكتەرىن كەڭىنەن پايدالانۋى قاجەت.

«قازاقستان - جاس ءارى دەموكراتيالىق مەملەكەت. اۋىل شارۋاشىلىعى مەن اەروعارىش سالاسىندا مۇمكىندىكتەرىڭىز وراسان ەكەنىن بىلەمىز. ال بىزدە 926 اەروعارىش كومپانياسى بار. بۇل سالادا بايقوڭىردىڭ ورنى ەرەكشە. اتالمىش سالادا سىزدەرگە تەحنولوگيالىق قولداۋ كورسەتۋگە ءازىرمىز»، - دەدى ا ق ش وكىلى.

وسى كەلىسىمدەردىڭ بارلىعىن ناقتىلاپ، قانشالىقتى مۇمكىن ەكەنىن باعالاۋ ءۇشىن ميسسيا وكىلدەرى 5-13 -ماۋسىم ارالىعىندا نۇر-سۇلتان، شىمكەنت، الماتى، تۇركىستان جانە وسكەمەن قالالارىنا بارۋدى جوسپارلاپ وتىر. ساپار ناتيجەسىندە اريزونا وكىلدەر پالاتاسى نۇر-سۇلتان قالاسىندا تۇراقتى كەڭسەسىن اشاتىنى دا ايتىلدى.