باستاپقى جارناسىز باسپانا: مۇعالىمدەر ءۇشىن ءۇي الۋ تالاپتارى قانداي
ەسكە سالا كەتسەك، بۇگىن ەلوردادا «قازاقستان يپوتەكالىق كومپانياسى» (ق ي ك) مەن ق ر د س م، ق ر ب ع م اراسىندا «نۇرلى جەر» باعدارلاماسى بويىنشا ساتىپ الۋ قۇقىعىمەن تۇرعىن ۇيلەردى جالعا بەرۋ تۋرالى كەلىسىمدەرگە قول قويىلدى. اتالعان كەلىسىمدەر ارقىلى مينيسترلىكتەر مەن ۆەدومستۆولىق باعىنىستى ۇيىمداردىڭ قىزمەتكەرلەرىن تۇرعىن ۇيمەن قامتۋ جوسپارلانعان.
بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ارىن ورساريەۆ ءبىلىم سالاسىنىڭ قانداي قىزمەتكەرلەرى اتالمىش باعدارلاما بويىنشا ءۇي الا الاتىنىن ايتىپ بەردى.
«جالپى باعدارلاماعا قاتىسۋعا كىمنىڭ قۇقىعى بار؟ مينيسترلىكتىڭ جانە ۆەدومستونىڭ باعىنىستى ۇيىمدارىنىڭ قىزمەتكەرلەرى كەزەك ءتارتىبى بويىنشا الا الادى. سوڭعى بەس جىلدا ولاردىڭ اتىندا تۇرعىن ءۇي بولماۋى كەرەك. سونداي-اق، تولەم قابىلەتى راستالۋى ءتيىس. ياعني، كىرىس تۋرالى انىقتاما الىپ كەلۋى قاجەت. كەيىن ساتىپ الۋ قۇقىعىمەن جالعا بەرىلەتىن تۇرعىن ءۇي بەرىلەدى. ق ي ك ءبىلىم جانە عىلىم مينيسترلىگىنە قانشا پاتەردىڭ بارى تۋرالى حابارلاما جىبەرەدى. ول حابارلامادا پاتەردىڭ شارشى مەترى، قاباتى، باعاسى ءبارى كورسەتىلەدى. ب ع م كەزەكتەگى ادامدارعا ءوتىنىش حات جىبەرەدى. ق ي ك قاتىسۋشىلارمەن جالعا الۋ شارتىن جاسايدى. وسى شارت 240 ايعا، ياعني 20 جىلعا ارنالعان. ءبىر جولعى تولەم - 1 پايىز»، - دەدى ول.
ب ع م جاۋاپتى حاتشىسىنىڭ اتاپ وتۋىنشە، قازىرگى تاڭدا قازاقستاندا ءبىلىم سالاسىندا 10 مىڭعا جۋىق ادام پاتەر كەزەگىندە تۇر.
«شارشى مەترىن 260 مىڭ تەڭگە دەپ ەسەپتەسەك، 50 شارشى مەترلىك ءۇي شامامەن 13 ميلليون تەڭگە تۇرادى. ەگەر جالعا بەرۋ مەرزىمى 20 جىل بولسا، اي سايىنعى تولەم شامامەن 60-70 مىڭ تەڭگە بولماق. ەگەر ءبىز كەلىسىمشارتتى 15 جىلعا جاسار بولساق، ايىنا 80-90 مىڭ تەڭگەگە اينالادى. الداعى ەكى جىلدا وسى باعدارلاما بويىنشا مۇعالىمدەرگە 1500 ءۇي بولىنەدى»، - دەدى ول.
ءوز كەزەگىندە ق ر دەنساۋلىق ساقتاۋ ءمينيسترى ەلجان ءبىرتانوۆ بۇل باعىتتاعى شارۋا ءبىرشاما ماسەلەنى شەشەتىنىن ايتىپ ءوتتى.
«جاقىندا تاراز قالاسىندا ق ر پرەزيدەنتى قاسىم-جومارت توقايەۆ مەديتسينا قىزمەتكەرلەرىن تۇرعىن ۇيمەن قامتاماسىز ەتۋ باعىتىندا ناقتى تاپسىرما بەرگەن بولاتىن. بۇل راسىندا دا، كۇردەلى ماسەلە. قازىرگى كۇنى دەنساۋلىق ساقتاۋ سالاسىنداعى ءبىر تۇيتكىل - ول، ارينە، كادر تاپشىلىعى. بۇل ماسەلەنى تەرەڭ زەرتتەپ جاتىرمىز. البەتتە، كوپ جاعدايدا كادر تاپشىلىعى دارىگەرلەر مەن مەدبيكەلەردىڭ الەۋمەتتىك جاعدايىنا بايلانىستى بولىپ وتىر. وسى باعىتتا ۇكىمەت وسى ماسەلەنى شەشۋ ءۇشىن بىرنەشە باعىت بويىنشا جۇمىس جۇرگىزەدى. بىرىنشىدەن، ارينە، بارلىقتارىڭىز بىلەتىندەي، ەلباسىنىڭ تاپسىرماسىمەن 1 -ماۋسىمنان باستاپ بۇكىل مەديتسينالىق قىزمەتكەرلەردىڭ جالاقىسى 30 پايىزعا كوتەرىلەتىن بولادى. تاپسىرمانى ورىنداۋ ءۇشىن قاجەتتى نورماتيۆتىك قۇجاتتار قابىلداندى. قاراجات ءبولىندى. وسى ايدان باستاپ بۇكىل دارىگەرلەر، مەيىربيكەلەر مەن مەديتسينالىق مەكەمەدە ەڭبەك ەتەتىن قىزمەتكەرلەردىڭ جالاقىسى 30 پايىزعا كوتەرىلەتىن بولادى»، - دەدى مينيستر.
ەلجان ءبىرتانوۆتىڭ سوزىنشە، بۇگىندە 15 مىڭ مەديتسينا قىزمەتكەرى باسپاناعا ءزارۋ.
«قازىرگى تاڭدا قازاقستاندا 400 مىڭعا تارتا مەديتسينالىق قىزمەتكەر ەڭبەك ەتەدى. ولاردىڭ ىشىندە 170 مىڭ مەيىربيكە مەن 60 مىڭ دارىگەر بار. البەتتە، وسى باسپانا تاپشىلىعى ماسەلەسى بار. قازىرگى تاڭدا ءبىزدىڭ مالىمەت بويىنشا، 15 مىڭنان استام دارىگەرگە باسپانا قاجەت. بۇگىنگى مەموراندۋمعا قول قويۋ - بىزگە وتە قۋانىشتى جاعداي. رەسپۋبليكا بويىنشا، 1 جارىم مىڭ مەديتسينالىق قىزمەتكەر جالعا بەرىلەتىن باسپانانى الاتىن بولادى. بۇل جۇمىستى ارى قاراي جەرگىلىكتى اتقارۋشى ورگاندارمەن جالعاستىرامىز. مەنىڭ ويىمشا، وسى شارالار ارقىلى دارىگەر مەن مەيىربيكەلەردىڭ الەۋمەتتىك جاعدايى كوتەرىلەدى. بۇل تىكەلەي مەديتسينالىق قىزمەتتىڭ ساپاسىن كوتەرۋگە سەپتىگىن تيگىزەدى»، - دەدى ول.