رەسەيدە قازاق جاۋىنگەرىنىڭ سۇيەگى تابىلدى

رەسەي. قازاقپارات - رەسەيدە قازاق جاۋىنگەرىنىڭ سۇيەگى تابىلدى. بۇل تۋرالى قازاقستاننىڭ ر ف-داعى ەلشىلىگىنەن ءمالىم ەتتى، دەپ حابارلايدى قازاقپارات.

«رەسەيدىڭ «ناشە ناسلەديە» ىزدەستىرۋ بىرلەستىگى قازاق جاۋىنگەرىنىڭ سۇيەگىن تاپتى. ول 1916 -جىلى تۋعان ۋاحيت قايىرحانوۆ ەكەن. مارقۇمنىڭ تۋىستارىن انىقتاۋعا ەرتىس ءوڭىرىنىڭ «پانفيلوۆشىلار» ىزدەۋ جاساعى قول ۇشىن بەردى»، - دەلىنگەن اقپاراتتا.

بەلگىلىگى بولعانداي، ۋاحيت قايىرحانوۆ مايدانعا پاۆلودار وبلىسىنان الىنعان. قازا بولعانى جايىندا 1942 -جىلى قارالى قاعاز كەلگەن. ءبىراق ناقتى قاي جەردە جەرلەنگەنى تۋرالى مالىمەت بولماعان. نەبارى 25 جاسىندا مەرت بولعان جاۋىنگەردىڭ ارتىندا قالعان جالعىز ۇلى زەينوللا ۋاحيتوۆ تا ومىردەن وتكەن. كەلىنى ايسۇلۋ ۋاحيتوۆا جولداسى ومىردەن وتكەنشە اكەسىن كورۋدى اڭساپ وتكەنىن وكىنىشپەن ەسكە الادى. «سۇيەگىن جەتكىزە الساق ۇلىنىڭ جانىنا ارۋلاپ جەرلەيتىن ەدىك»، - دەيدى ول.

«سول اكەسىن توسا-توسا ءوزى دە كەتتى جارتى جىل بولدى. بىرلەۋ تابىلىپتى دەگەندە ءوزى جىلاپ وتىراتىن. 25 جاسىندا قايران كەتكەن اكەم كەلمەدى-اۋ دەپ. ەندى مىنەكەي تاعدىر. 77 جىلدان كەيىن جوعالعان اكەسى ۇلىنىڭ جانىندا جاتسا، بۇل عاجاپ. مۇنداي وقيعا بولا ما؟ بولماي ما؟ سوعان تاڭىم بار مەنىڭ»، - دەيدى پاۆلودار قالاسىنىڭ تۇرعىنى ايسۇلۋ ۋاحيتوۆا.

«پانفيلوۆشىلار» ىزدەۋ جاساعى وسى باعىتتاعى جۇمىستى جالعاستىرادى. ەكى كۇننەن كەيىن حالىقارالىق ەسكە الۋ جورىعىنا قاتىسۋ ءۇشىن تۆەر وبلىسىنا جولعا شىققالى وتىرمىز. ول 1941 -جىلى قازاقستاندا قۇرىلعان 100 جانە 101-ديۆيزياسى ۇرىسقا قاتىسىپ، جەكە قۇرامىنىڭ 75 پروتسەنتىن جوعالتقان تاريحي جەر»، - دەدى پاۆلوداردىڭ «پانفيلوۆشىلار» ىزدەۋ جاساعىنىڭ جەتەكشىسى باقىتجان وتەپوۆ.