شارىن ۇلتتىق پاركىندە اۆتوماتپەن قاراقۇيرىق اتقان براكونەر ۇستالدى

نۇر-سۇلتان. قازاقپارات - شارىن ۇلتتىق پاركىندە قاراقۇيرىقتى زاڭسىز اۋلاعان براكونەر ۇستالدى، دەپ حابارلايدى قازاقپارات.

بۇل تۋرالى ق ر ا ش م ورمان شارۋاشىلىق جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت جازدى.

«2019 -جىلدىڭ 3 -ماۋسىمىندا ساعات 18.00 دە شارىن مەملەكەتتىك تابيعي پاركى اۋماعىندا مەملەكەتتىك ينسپەكتورلار موتوسيكل مىنگەن كۇدىكتىنى بايقاعان. ۇلتتىق پاركتىڭ جەدەل توبى ونى توقتاتقىسى كەلگەنمەن موتوسيكلى زاڭدى تالاپتارعا باعىنباعان. سوندىقتان، ۇيعىر اۋداندىق پوليتسيا قىزمەتكەرلەرى شاقىرىلدى. پوليتسيا مەن ۇلتتىق پارك قىزمەتكەرلەرىنىڭ بىرلەسۋىمەن الماتى وبلىسى ۇيعىر اۋدانى شارىن اۋىلىنىڭ 1989 -جىلى تۋعان تۇرعىنى ۇستالدى. ونىڭ «Honda» ماركالى موتوسيكلىندە مەملەكەتتىك تىركەۋ ءنومىرى بولماعان»، - دەپ جازدى س. دىلداحمەت الەۋمەتتىك جەلىدە.

كۇدىكتى ۇستالعان ماڭنان 12 وعى بار «اك-103» ماركالى اۆتومات قارۋى مەن قاراقۇيرىقتىڭ ەتى تابىلدى.

«تەرگەۋ بارىسىندا كۇدىكتى شارىن ۇلتتىق پاركىنىڭ تەمىرلىك اۋماعىنان قارا پاكەتكە ورالعان 20 وعى بار «اك-103» ماركالى اۆتومات قارۋىن تاۋىپ العانىن ايتتى. وسى ارقىلى جابايى اڭداردى اۋلاعىسى كەلگەن. بۇل فاكت ۇيعىر اۋداندىق پوليتسيا بولىمىنە تىركەلدى. ق ر قىلمىستىق كودەكسىنىڭ 287-بابى، 3-بولىگى جانە 337-بابى، 4-بولىگى، 1,2 -تارماقتارى بويىنشا قىلمىستىق ءىس قوزعالدى. الدىن الا ەسەپ بويىنشا، زاڭسىز اڭشىلىقتان كەلگەن شىعىن 7575000 تەڭگە بولعان»، - دەپ جازدى كوميتەت وكىلى.