قازاقستاندىق سپورتشىلار وليمپيادادا العان جۇلدەلەرىن قايتارىپ جاتىر
جاقىندا قازاقستاندىق اۋىر اتلەتتەر سۆەتلانا پودوبەدوۆا مەن يرينا نەكراسوۆا وليمپيادا ويىندارىندا يەلەنگەن جۇلدەلەرىن قايتاردى. سۆەتلانا لوندون وليمپياداسىنىڭ التىنىن، يرينا بەيجىڭ وليمپياداسىنىڭ كۇمىسىن قايتا تاپسىردى.
قازاقستان ۇلتتىق وليمپيادا كوميتەتى وليمپيادالىق حارتيا ەرەجەلەرىن ۇستانىپ، الەمدىك سپورتتاعى قازاقستان قۇراماسىنىڭ بەدەلىن ساقتاۋ ماقساتىندا سپورتشىلارمەن اڭگىمە جۇرگىزدى. اتلەتتەر تۇسىنىستىك تانىتىپ، ءتورتجىلدىق دوداسىندا يەلەنگەن مەدالدارىن قايتاردى.
ايتا كەتەلىك، 2016 -جىلى حالىقارالىق وليمپيادا كوميتەتىنىڭ تارتىپتىك كوميسسياسى (ح و ك) مەن سپورتتىق اربيتراجدى سوت (CAS) قازاقستاندىق جەتى اۋىر اتلەت پەن ەكى بالۋاننىڭ XXIX جانە XXX وليمپيادا ويىندارىندا جەڭىپ العان (بەيجىڭ-2008، لوندون-2012) مەدالدارىن جوققا شىعارىپ، ولاردىڭ دوپينگكە قارسى ەرەجەنى بۇزعاندارىن جاريا ەتتى. شەشىمگە سايكەس اتلەتتەر جارىستان شەتتەتىلىپ، ناتيجەلەرى جوققا شىعارىلدى جانە مەدالداردى قايتارۋعا مىندەتتەلدى.
جاقىن ارادا قايتارىلعان مەدالدار حالىقارالىق وليمپيادا كوميتەتىنە جولدانادى. جۇلدەسىن ءالى كۇنگە دەيىن قايتارماعان سپورتشىلارمەن كەلىسسوز جۇرگىزۋدى ۇ و ك ودان ءارى جالعاستىرماق.