جامبىل وبلىسىنىڭ تۋريستىك الەۋەتىن ارتتىرۋ قاجەت - قازاقستان پرەزيدەنتى

تاراز. قازاقپارات - قازاقستان پرەزيدەنتى قاسىم- جومارت توقايەۆ جامبىل وبلىسىنىڭ جۇرتشىلىعىمەن كەزدەستى، دەپ حابارلايدى قازاقپارات اقورداعا سىلتەمە جاساپ.

جيىنعا ءوڭىردىڭ ارداگەرلەرى، زيالى قاۋىم، ازاماتتىق قوعام جانە جاستار وكىلدەرى قاتىستى.

 قازاقستان پرەزيدەنتى جامبىل وبلىسىنىڭ ەكونوميكالىق مۇمكىندىكتەرىن اتاپ ءوتىپ، ءتۇيىنى تارقاتىلماعان ءبىرقاتار ماسەلەگە نازار اۋداردى.

 - وبلىستاعى ورتاشا جالاقى مولشەرى - 112 مىڭ تەڭگە. بۇل - ەلدەگى ەڭ تومەن كورسەتكىشتىڭ ءبىرى. 1 - ماۋسىمنان باستاپ تابىسى تومەن بيۋدجەتتىك سالا قىزمەتكەرلەرىنىڭ جالاقىسى ءوستى. ءوڭىر كاسىپورىندارى بۇل باستامادان شەت قالماۋى ءتيىس. بارلىق دەڭگەيدەگى اكىمدەردىڭ باستى مىندەتى جاڭا جۇمىس ورىندارىن اشىپ، حالىقتى قىزمەتپەن قامتۋ ەكەنىن ەسكەرتەمىن. جۇمىس ورىندارىن اشۋدا بيزنەستىڭ ءرولى جوعارى. سوندىقتان، جەرگىلىكتى كاسىپكەرلەردى قولداۋدى جالعاستىرۋ قاجەت، - دەدى مەملەكەت باسشىسى.

 

قاسىم- جومارت توقايەۆ ونەركاسىپتىڭ مۇمكىندىگىن تولىق پايدالانىپ، يندۋستريالاندىرۋ جوبالارىن ىسكە اسىرۋدا زاماناۋي تەحنولوگيالىق وندىرىسكە باسا ءمان بەرۋ كەرەكتىگىنە توقتالدى.

 - وڭدەۋ ونەركاسىبىنە، اسىرەسە، حيميا كلاستەرىنە ءىرى ينۆەستورلاردى تارتۋ قاجەت. ۇكىمەت پەن اكىمدىككە وسى ماسەلەنى ناقتىلاۋدى تاپسىرامىن. بۇل - ەكونوميكانىڭ ورنىقتى دامۋىنا ىقپال ەتەدى، ەڭبەك ونىمدىلىگىن ارتتىرادى. وڭىردەگى ءوندىرىستىڭ دامۋ كوزى «تاراز» حيميالىق پاركى» ارنايى ەكونوميكالىق ايماعى بولۋى قاجەت، - دەدى قازاقستان پرەزيدەنتى.

 مەملەكەت باسشىسى ءوڭىردىڭ اۋىل شارۋاشىلىعى سالاسىنداعى ەڭبەك ونىمدىلىگىنىڭ تومەن ەكەنىن ايتتى.

 - جەرگىلىكتى اكىمدىك اگروسەكتور سالاسىنىڭ ماماندارىمەن تىعىز جۇمىس ىستەۋى قاجەت. وبلىستا قانت قىزىلشاسى، جەمىس جانە كوكونىس داقىلدارىنىڭ كولەمىن كوبەيتۋگە مۇمكىندىك بار. ۇكىمەت كەلەسى جىلدان باستاپ شەتەلدەن اكەلىنەتىن شيكى قۇراق قانتىنا يمپورتتىق باج سالىعىن سالۋ تۋرالى شەشىم قابىلدادى. وسىعان وراي، وبلىس اكىمىنە قانت قىزىلشاسى مەن جەمىس- كوكونىس داقىلدارىنىڭ ەگىس كولەمىن ۇلعايتىپ، وڭدەۋ كاسىپورىندارىنىڭ قۋاتىن ارتتىرۋدى تاپسىرامىن، - دەدى قاسىم- جومارت توقايەۆ.

 قازاقستان پرەزيدەنتى وڭىردە تۋريستەردى قىزىقتىراتىن تاريحي ورىندار بارشىلىق ەكەنىن اتاپ ءوتىپ، تۋريزمدى دامىتۋ قاجەتتىگىن ايتتى.

 - ايماقتىڭ تۋريستىك الەۋەتىن ارتتىرىپ، ينۆەستيتسيا تارتۋ ءۇشىن جۇيەلى شارالار قابىلداۋ قاجەت. بۇل باعىتتا شەتەلدىك وزىق تاجىريبەلەردى ەسكەرگەن ءجون. ۇكىمەت تۋريزمدى دامىتۋعا ارنالعان مەملەكەتتىك باعدارلاما دايىنداۋدا. جامبىل وبلىسى تاريحي كورنەكتى ورىندارعا وتە باي. وڭىردەگى ايشا ءبيبى جانە قاراحان كەسەنەلەرى، جايساڭ كيەلى جەرى، كوكساي شاتقالى جانە باسقا دا تاريحي ورىندار - حالقىمىز ءۇشىن ورتاق مادەني قۇندىلىقتار. ۇكىمەت پەن اكىمدىك بۇل سالانى بىرلەسە دامىتۋعا كۇش سالۋى كەرەك. وعان وبلىستىڭ رەسۋرستارى جەتكىلىكتى، - دەدى مەملەكەت باسشىسى.

 ايماقتار اراسىنداعى الشاقتىقتى ازايتۋ قاجەتتىگىن ايتقان قازاقستان پرەزيدەنتى جامبىل وبلىسىنداعى شاعىن قالالاردى دامىتۋ تۋرالى ويىن ورتاعا سالدى.

- مونو جانە شاعىن قالالار - ءوز الدىنا بولەك ماسەلە. جاڭاتاس، قاراتاۋ سەكىلدى شاعىن قالالاردىڭ الەۋمەتتىك، كولىك جانە ينجەنەرلىك ينفراقۇرىلىمىن دامىتامىز. بۇل شارالار، ەڭ الدىمەن، حالىقتىڭ ءومىر ءسۇرۋ ساپاسىن ارتتىرۋ ءۇشىن جاسالىپ وتىر، - دەدى قاسىم- جومارت توقايەۆ.

 مەملەكەت باسشىسى سىبايلاس جەمقورلىق ماسەلەسىنە دە توقتالدى.

- جەمقورلىقتى تۇبەگەيلى جويعانشا كۇرەسەمىز. اكىمدەرگە ەرەكشە جاۋاپكەرشىلىك جۇكتەلەدى. ەل ەكونوميكاسىنىڭ دامۋى جانە حالىقتىڭ ءال- اۋقاتىنىڭ ارتۋى وسىعان تىكەلەي بايلانىستى. جەمقورلىقپەن كۇرەس - مەنىڭ پرەزيدەنت رەتىندە نەگىزگى ماقساتتارىمنىڭ ءبىرى. بۇل ىسكە ايماق وكىلدەرى بەلسەنە ارالاسۋى كەرەك، - دەدى قازاقستان پرەزيدەنتى.

قاسىم- جومارت توقايەۆ اۋداندىق، اۋىلدىق ەلدى مەكەندەردەگى جولداردى جاقسارتۋدى، ءبىلىم بەرۋ نىساندارىن كوپتەپ سالۋدى، سول ارقىلى ءۇش اۋىسىمدى جانە اپاتتى جاعدايداعى مەكتەپتەر ماسەلەسىن رەتتەۋدى تاپسىردى. سونىمەن قاتار، مەملەكەت باسشىسى جاستارعا ءارقاشان قولداۋ كورسەتىلەتىنىن جانە بىلىكتى مامانداردىڭ شىعارماشىلىقتا، قىزمەتتىك ساتىدا ءوسۋى ءۇشىن كەدەرگى بولماۋى كەرەكتىگىن ايتتى.

 - اكىمدىكتەردىڭ جانىنداعى جاستار كەڭەسى ولاردىڭ قىزمەت بابىندا وسۋىنە قاجەتتى باسپالداق بولۋى ءتيىس. ءبىز مەملەكەتتىك قىزمەتتە عانا ەمەس، ءبىلىم مەن عىلىم، مادەنيەت پەن سپورت، بيزنەس جانە باسقا دا سالالاردا دارىنداردىڭ دارا شىعۋىن قولدايمىز. «جاس كاسىپكەر» باعدارلاماسى اياسىندا جاستاردىڭ بيزنەس باستامالارى مەن ستارتاپتارى قولداۋ تابادى، - دەدى قازاقستان پرەزيدەنتى.

سونىمەن قاتار، قۇقىق قورعاۋ ورگاندارىنىڭ جۇمىسىن كۇشەيتۋ قاجەتتىگىن ەسكەرتىپ، وڭىردەگى مال ۇرلىعى مەن ەسىرتكى ساۋداسىنا توسقاۋىل قويۋ كەرەكتىگىن اتاپ ءوتتى.

 - ادال ەڭبەك ەتىپ، كۇنىن كورىپ وتىرعان مالشىلاردى قورعاۋىمىز قاجەت. زاڭدى قاتايتىپ، قىلمىسكەرلەردى سىبايلاستارىمەن قوسىپ، قاتاڭ جازالاۋ كەرەك. سوندىقتان، اكىمدىكتەر مەن جەرگىلىكتى پوليتسيا بارىمتاعا قارسى شۇعىل شارالار قابىلداۋى ءتيىس. قىلمىستىق كودەكسكە ءتيىستى وزگەرتۋلەر ەنگىزۋ قاجەت. ەسىرتكى قىلمىسىنىڭ ۋشىعۋى - بۇكىل قوعامدى الاڭداتقان وزەكتى ماسەلەنىڭ ءبىرى. وكىنىشكە قاراي، قازىرگى وزىق تەحنولوگيا دامىعان زاماندا «ەسىرتكى بيزنەسىنىڭ» داۋرەنى ءجۇرىپ تۇر. بۇل، ەڭ الدىمەن، جاستاردىڭ ساناسىن جانە دەنساۋلىعىن ۋلايتىن كەسەل. مۇنى توقتاتۋ قاجەت! - دەدى مەملەكەت باسشىسى.

قاسىم- جومارت توقايەۆ كەزدەسۋ سوڭىندا دارىگەر، مۇعالىم جانە كاسىپكەرلەردى العىس حاتتارمەن ماراپاتتادى. ماراپاتتالعاندار: مويىنقۇم اۋداندىق اۋرۋحانانىڭ باس دارىگەرى ج. ايتيشيەۆ، «كناۋف- گيپس تاراز» ج ش س ديرەكتورى م. بەكنازاروۆ،  وبلىستىق دارىندى بالالارعا ارنالعان مەكتەپ- ينتەرناتتىڭ قازاق ءتىلى مەن ادەبيەتى ءپانىنىڭ مۇعالىمى پ. وزىقبايەۆا جانە «اگرو سپەتس ستروي» ج ش س باس ديرەكتورى م. راحىمبەردييەۆ.