وقۋشىلار قازاقستاننىڭ كورىكتى جەرلەرىن تۋريستىك پويىزبەن ارالاماق

نۇر-سۇلتان. قازاقپارات - ەلوردانىڭ تەمىرجول ۆوكزالىندا «تۋعان ەلگە ساياحات» بالالار ەكسكۋرسيالىق پويىزى» جوباسىنىڭ جاڭا ماۋسىمى باستالدى.

200 دەن استام بالا مىنگەن 9 ۆاگوندىق پويىز قازاقستاننىڭ كورىكتى قالالارى مەن تاريحي ورىندارىن ارالايتىن توعىز كۇندىك ساياحاتقا اتتاندى، دەپ حابارلايدى قازاقپارات.

ساياحاتقا اتتانۋ ءۇشىن نۇر- سۇلتان قالاسىنا جينالعان وقۋشىلارى الدىمەن ەلوردانىڭ ەڭ ادەمى جەرلەرىنىڭ ءبىرى «ەكسپو-2017» - «نۇر الەم» بولاشاق مۇراجايىندا بولىپ، «بايتەرەككە» كوتەرىلدى. ەكى دەڭگەيلى اۆتوبۋسپەن «ماڭگىلىك ەل» سالتانات قاقپاسىنا بارىپ، ەلوردانى ارالادى، ءتۇرلى سپورتتىق جانە مادەني سارايلاردى تاماشالادى.

«مەن نۇر-سۇلتان قالاسىنا ءبىرىنشى رەت كەلىپ تۇرمىن. «تۋعان ەلگە ساياحات» جوباسى مەن ءۇشىن ەرەكشە تاريح بولىپ قالماق. سەبەبى، بۇل قالادا ءتۇرلى ادەمى عيماراتتار كوپ. مۇندا مەن كوپ جاڭا دوستار تاپتىم. ماعان «ەكسپو»، «بايتەرەك»، حان- شاتىر جانە باسقا دا عيماراتتار ەرەكشە ۇنادى»، - دەدى جوبا قاتىسۋ ءۇشىن قىزىلوردا وبلىسىنىڭ سىرداريا اۋدانىنا قاراستى ايدارلى اۋىلىنان كەلگەن جانسايا تولەگەن.

قالالار اراسىنداعى ساياحات كەزىندە پويىزدا بالالاردى ءتۇرلى شىعارماشىلىق، زياتكەرلىك، بوس ۋاقىتتى ءتيىمدى وتكىزۋگە ارنالعان شارالار مەن ءتىل كۋرستارى كۇتەدى. الداعى ساياحاتتاعى ۇلكەن ءرول بالالاردىڭ قىزىقتى ۋاقىت وتكىزۋى مەن قاۋىپسىزدىگىنە جاۋاپتى تالىمگەرلەرگە تيەسىلى.

«مەن بۇل جوباعا وسىمەن 4 جىل قاتارىنان قاتىسىپ جاتىرمىن. ماعان جوبا وتە قاتتى ۇنايدى، سوندىقتان مەن جىل سايىن وسىندا كەلۋ ءۇشىن جاز ايىن كۇتەمىن. ءبىز پويىزدا كوپتەگەن قىزىقتى شارالار وتكىزەمىز: ەر بالالار اراسىندا ارمرەسلينگ، ۆوكال كۋرستارى، ەرمەكساز ساباقتارى، گيتارادا ويناۋ، حورەوگرافيا ساباقتارى، تاريح، اعىلشىن ءتىلى جانە كوركەم سۋرەت ساباقتارى. مەن ءۇشىن بۇل جۇمىستاعى ەڭ قىزىعى - بۇل بالالاردىڭ ەموتسياسى مەن ولاردىڭ جوباعا بارىنشا بەرىلۋى. ءبىز العاشقى پويىزبەن ساپارعا اتتانعاننان بەرى بيىل 4 جىل ءوتتى، ءبىراق ءبىز وتكەن ماۋسىمدارداعى بالالارمەن ءالى كۇنگە دەيىن ارالاسىپ تۇرامىز»، - دەيدى اعا تالىمگەر، حورەوگراف مارات ومىربەكوۆ.

پويىز ەلورداعا 9 -ماۋسىم ورالىپ، ءبىرىنشى ساياحات ماۋسىمىن اياقتايدى. سول كۇنى بالالارعا ارنايى قورىتىندى كونسەرت ۇيىمداستىرالادى. سونىمەن قاتار، وسى جىلى تاعى دا ەكى ساپار - 1 -شىلدە مەن 1 -تامىزعا جوسپارلانىپ وتىر. جالپى 2019 -جىلعى ماۋسىمعا 600 بالا قامتىلادى. جوبا بالالاردىڭ جان-جاقتى دامۋىنا، قورشاعان الەمگە قىزىعۋشىلىعىن ارتتىرۋعا، ەلدىڭ تاريحي جانە ساۋلەت ەسكەرتكىشتەرىمەن تانىسىپ، ءپاتريوتيزمدى نىعايتۋعا باعىتتالعان. پويىز باعدارىنا نۇر-سۇلتان، بايقوڭىر، تاراز، الماتى جانە بالقاش قالالارى كىرەدى.