گيمالاي تاۋىندا سەگىز الپينيست جوعالىپ كەتتى

ولار - ۇلى بريتانيا، ا ق ش، اۋستراليا جانە ءۇندىستان ازاماتتارى، دەپ حابارلايدى قازاقپارات BBC- گە سىلتەمە جاساپ.

ولاردى ىزدەۋگە اسكەري اۆياتسيا جۇمىلدىرىلعان. قۇتقارۋشىلار الپينيستەردىڭ امان قالۋى ەكىتالاي ەكەنىن ايتىپ وتىر.

ءۇندىستان الپينيزم ينستيتۋتىنان شىققان وفيتسەر، ءتورت بريتانيالىق، ەكى امەريكالىق جانە ءبىر اۋستراليالىق باعىندىرۋ اسا قيىن شىڭداردىڭ ءبىرى سانالاتىن ناندا-دەۆيگە كوتەرىلۋدى 13 -مامىر كۇنى باستاعان. شىڭنىڭ تەڭىز دەڭگەيىنەن بيىكتىگى - 7816 مەتر. الپينيستەر الدىمەن بۇرىن ەشكىم شىقپاعان 6477 مەترلىك شىڭعا كوتەرىلمەك بولعان.

جوسپار بويىنشا، 31 -مامىر كۇنى الپينيستەر لاگەرگە ورالۋى ءتيىس بولاتىن. ولاردان حابار بولماعان سوڭ، بازاداعىلار دابىل قاققان.

جەرگىلىكتى بيلىك وكىلدەرىنىڭ جورامالىنشا، 27 -مامىر كۇنى تاۋدا قار كوشكەن بولۋى مۇمكىن. جوعالعان الپينيستەرگە سەنبى كۇنى ىزدەۋ سالىنعان. ءبىراق اۋا رايىنىڭ ناشارلاۋىنا بايلانىستى، وپەراتسيا توقتاتىلىپ، ەرتەڭىنە قايتا باستالعان.

قۇتقارۋشىلار قار كوشكەن جەرگە جەتكەنشە 3-4 كۇن قاجەت. «ولاردى ءتىرى تابۋ مۇمكىندىگى ەلەس سياقتى»، - دەيدى ۋتتاراكحاند شتاتىنىڭ پيتحوراگارح وكرۋگىنىڭ باسشىسى ۆيدجاي كۋمار.