تۇركىستاندا جاس انشىلەر تانىمال كومپوزيتورلاردىڭ اندەرىن شىرقادى
مەرەكەلىك شارادا ءوڭىردىڭ بارلىق اۋدان، قالالارىنان كەلگەن جاس دارىندار پاتريوتتىق جانە بالداۋرەن بالالىق شاق جايلى بەلگىلى كومپوزيتورلاردىڭ اندەرىن شىرقاپ، بي بيلەدى، دەپ حابارلايدى قازاقپارات ءتىلشىسى.
«جەڭىس» ساياباعىنداعى كونسەرتتىك باعدارلامانى تاماشالاۋعا 5000 نان اسا قالا قوناقتارى مەن تۇرعىندار جينالدى. وبلىستىق مادەنيەت جانە تىلدەردى دامىتۋ باسقارماسى مەن مادەنيەت جانە حالىق شىعارماشىلىعى ورتالىعى ۇيىمداستىرعان شاراعا «قالقانقۇلاق» فيلمىنىڭ باستى ءرولىن سومداعان جاس اكتەرلەر ءادىلحان نۇريمان مەن سىرگەباي ەرسۇلتان «قالقانقۇلاق» ءانىن ورىنداپ، كورەرمەندەردىڭ ىقىلاسىنا بولەندى.
شارا بارىسىندا سونداي-اق، جاس انشىلەر اننەن شاشۋ شاشىپ، ساياباققا كەلگەن جۇرشىلىققا كوتەرىڭكى كوڭىل كۇي سىيلادى. ولاردىڭ اراسىندا وبلىستىق، رەسپۋبليكالىق بايقاۋلاردا توپ جارىپ جۇرگەن جۇلدەگەرلەر دە بار. ەرتەگى كەيىپكەرلەرى بالالارمەن بىرگە ويىن ويناپ، قيال - عاجايىپتار الەمىنە ەنگىزدى. بۇلدىرشىندەرگە ارنالعان اتتراكتسيوندار دا بالعىن بالالاردى شات- شادىمان كۇيگە بولەدى.
ايتا كەتەيىك، بالالاردىڭ قۋانىشىنا ارنالعان شارا «جاستار جىلى» اياسىندا دارىندى بالالار مەن جاسوسپىرىمدەردىڭ شىعارماشىلىعىنا قولداۋ كورسەتۋ مەن ولاردى وتانسۇيگىشتىككە باۋلۋ، ۇلتتىق رۋحتا تاربيەلەۋ مەن قولداۋ كورسەتۋ ماقساتىندا ۇيىمداستىرىلدى. وبلىستىڭ ءار اۋدان-قالالارىنداعى مادەنيەت ۇيلەرى مەن كلۋبتاردا وقىپ جۇرگەن جاس دارىنداردى تانىتۋ مەن ۇلكەن ساحناعا شىعارۋ كوزدەلگەن.