قاسىم- جومارت توقايەۆ دارىندى بالالارمەن كەزدەستى
12:41, 01 - ماۋسىم 2019
نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ حالىقارالىق بالالاردى قورعاۋ كۇنى ەلىمىزدىڭ بارلىق وڭىرىنەن كەلگەن حالىقارالىق جانە رەسپۋبليكالىق وليمپيادالاردىڭ جەڭىمپازدارىمەن، وقۋ ۇزدىكتەرىمەن، كوپبالالى وتباسىلاردىڭ بالالارىمەن، بالالار ءۇيىنىڭ تاربيەلەنۋشىلەرىمەن كەزدەستى، دەپ حابارلايدى اقوردانىڭ باسپا ءسوز قىزمەتى.
اڭگىمەلەسۋ بارىسىندا قاسىم- جومارت توقايەۆ بالالاردى مەرەكەمەن قۇتتىقتاپ، ولارعا وقۋدا تابىس تىلەدى.
- قازىرگى زاماندا ءبىلىمدى جانە كاسىبي مامان بولۋ وتە ماڭىزدى. ءبىلىمدى ادامنىڭ شاماسى بارىنە جەتەدى. سوندىقتان، سەندەردىڭ جاسىڭدا، ەڭ باستىسى، جاقسى وقىپ، ءبىلىم الۋ. ەلىمىزدىڭ لايىقتى ازاماتتارى بولاتىندارىڭا سەنىمدىمىن.
ورتا سىنىپتىڭ 40 وقۋشىسى ءۇشىن «اقوردا» رەزيدەنتسياسىندا تاقىرىپتىق ەكسكۋرسيا ۇيىمداستىرىلدى. ولار بۇكىل ەلىمىز ءۇشىن ماڭىزدى ستراتەگيالىق شەشىمدەر قابىلداناتىن وسىناۋ عاجاپ عيمارات تۋرالى كوپتەگەن قىزىقتى دەرەكتەرمەن تانىستى. سونىمەن قاتار، ەكسكۋرسيا بارىسىندا ەلباسىنىڭ تۇلعالىق قىرىنا جانە ونىڭ تاريحتاعى رولىنە ەرەكشە كوڭىل ءبولىندى.