ەلوردادا جەكپە- جەك سارايى اشىلادى

نۇر- سۇلتان. قازاقپارات - ەلوردا كۇنى قارساڭىندا جەكپە- جەك سارايىنىڭ قۇرىلىسى اياقتالادى. بۇل تۋرالى پارلامەنت سەناتىنداعى ۇكىمەت ساعاتىندا نۇر- سۇلتان قالاسى اكىمىنىڭ ورىنباسارى ەرلان كاناليموۆ ايتتى، دەپ حابارلايدى قازاقپارات ءتىلشىسى.

«جاقىن ارادا 5 مىڭ ورىنعا ارنالعان جەكپە- جەك سارايىنىڭ قۇرىلىسى اياقتالادى، ياعني قالا كۇنىندە اشىلادى دەپ جوسپارلانۋدا»، - دەدى ە. كاناليموۆ.

ونىڭ اتاپ وتۋىنشە، بۇگىندە دەنە شىنىقتىرۋ جانە ساۋىقتىرۋ كەشەندەرى جەتىسپەيدى.

«قازىرگى كەزدە سپورتتىق نىساندار شامادان تىس جۇمىس ىستەۋدە، ياعني ونىڭ دەڭگەيى 143 پايىزعا جەتتى. ەلباسى تاپسىرماسىن ورىنداۋ اياسىندا 4 تۇرعىن الابىندا دەنە شىنىقتىرۋ- ساۋىقتىرۋ كەشەننىڭ قۇرىلىسىنا جوبالاۋ- سمەتالىق قۇجاتتاماسى ازىرلەنۋدە. بۇل كەشەندەر امبەبەپ بولادى. سپورتتىق الاڭداردان بولەك، وسى اۋماقتا حالىققا قىزمەت كورسەتۋ ورتالىعى، ەگدە جاستاعى ادامدار ءۇشىن كلۋب، پوليتسيا، ءدارىحانا، مەديتسينالىق پۋنكت قامتىلادى. قۇرىلىس جۇمىستارىنا 6,4 ميلليارد تەڭگە قاراستىرىلىپ، 2,7 ميلليارد تەڭگەسى ءبولىندى. قۇرىلىس جۇمىستارىن باستاۋ بيىلدىڭ ەكىنشى جارتجىلدىعىنا جوسپارلانعان. بۇل عيماراتتار 2021 -جىلى پايدالانۋعا بەرىلەدى»، - دەدى اكىمنىڭ ورىنباسارى.

وسى ورايدا، ول بۇل سپورتتىق نىساندار بارلىق تۇرعىندار ءۇشىن قولجەتىمدى بولاتىنىن اتاپ ءوتتى.

اۆتور: رۋسلان عابباسوۆ