دوپينگ ءۇشىن ۇستالعان سپورتشىلارعا قانداي جازا تاعايىندالادى
«ءبىز سپورتتىق كورسەتكىشتەرى جوعارى ەلدەردىڭ تاجىريبەسىن زەرتتەدىك. ونىڭ نەگىزىندە مينيسترلىك سالالىق زاڭعا وزگەرىستەر مەن تولىقتىرۋلار ەنگىزۋ بويىنشا جۇمىستاردى جۇرگىزۋدە. ۇسىنىلىپ وتىرعان نورمالار تىيىم سالىنعان پرەپاراتتاردى پايدالانۋ مەن تاعايىنداۋ جانە تاراتقانى ءۇشىن ادامداردى قۇراما كوماندالاردان شىعارۋدان بولەك، سپورتشىلار مەن باپكەرلەرگە جانە ولارعا قاتىسى بار ماماندارعا اكىمشىلىك جاۋاپكەرشىلىكتى بەلگىلەۋدى قاراستىرادى» ، - دەدى ۆيتسە- مينيستر.
ە. رامازانوۆتىڭ ايتۋىنشا، تۇزەتۋلەر اياسىندا جارىستاعى ناتيجەلەردىڭ جويىلعانى ءۇشىن تولەنگەن اقشالاي ىنتالاندىرۋ تولەمدەرىن قايتارۋدى قاراستىرادى. سونىمەن قاتار، سپورتتىق اتاعىن جويۋ، ۇلكەن جارىستاردىڭ جەڭىمپازدارى مەن چەمپيوندارىنا بەرىلگەن باسپانانى كەرى قايتارۋ ەسكەرىلگەن.
بۇدان بۇرىن حابارلانعانداي، قازاقستان سپورتشىلارى تاراپىنان دوپينگ پايدالانۋ جاعدايلارى تومەندەمەي تۇر. سوڭعى 5 جىلدا قازاقستان سپورتشىلارى تاراپىنان دوپينگ پايدالانۋدىڭ 263 وقيعاسى انىقتالدى.