قاسىم- جومارت توقايەۆ پەن دونالد تۋسك ب ا ق وكىلدەرى ءۇشىن بريفينگ وتكىزدى
مەملەكەت باسشىسى قازاقستانعا رەسمي ساپارمەن كەلگەنى ءۇشىن ەۋروپالىق كەڭەس ءتوراعاسىنا ريزاشىلىق ءبىلدىرىپ، ساپاردىڭ ساياسي قۋعىن- سۇرگىن قۇرباندارىن ەسكە الۋ كۇنىمەن تۇسپا- تۇس كەلگەنىنىڭ سيمۆولدىق ءمانى بارىن ايتتى.
- ەۋروپالىق كەڭەستىڭ قابىلداعان جاڭا ستراتەگياسى مەن ءسىزدىڭ ساپارىڭىز ورتالىق ازيا ەلدەرىنىڭ ساياسي- ەكونوميكالىق ورنىقتى جانە قاۋىپسىز دامۋى ءۇشىن ەۋروپالىق تاراپتىڭ مۇددەلى ەكەنىنىڭ دالەلى، - دەدى قازاقستان پرەزيدەنتى.
قاسىم- جومارت توقايەۆ دونالدا تۋسكتىڭ ساپارى نۇر- سۇلتان مەن بريۋسسەل اراسىنداعى ديالوگقا تىڭ سەرپىن بەرەتىنىن اتاپ ءوتتى.
- قازاقستان ورتالىق ازيا ەلدەرىنىڭ ىشىندە ەۋروپالىق وداقپەن «ەكىنشى بۋىن» كەلىسىمىنە قول قويعان ءبىرىنشى ەل بولدى. بۇل ءبىزدىڭ بايلانىستارىمىزدىڭ بەرىك ەكەنىن كورسەتەدى. ءبىز ەۋروپا ەلدەرىنىڭ بارىمەن ستراتەگيالىق، سەرىكتەستىك قاتىناستارىمىزدى نىعايتۋعا بەلسەندى اتسالىسامىز. قازاقستاننىڭ «ەۋروپاعا جول» باعدارلاماسى مەن ەۋروپالىق وداقتىڭ ورتالىق ازياعا ارنالعان ستراتەگياسى ءارتۇرلى سالاداعى تابىستى ءىس- قيمىلدارىمىزدىڭ ۇلگىسى بولىپ تابىلادى. وسى جەتىستىكتەردى ەسكەرە وتىرىپ، ەۋروپالىق وداقپەن ىنتىماقتاستىعىمىزدىڭ كەلەشەگى جاقسى بولاتىنىنا سەنىمدىمىز، - دەدى مەملەكەت باسشىسى.
دونالد تۋسك جىلى قابىلداعانى جانە نۇر- سۇلتانعا رەسمي ساپارمەن العاش كەلۋگە مۇمكىندىك تۋعىزعانى ءۇشىن قازاقستان پرەزيدەنتىنە ريزاشىلىق ءبىلدىردى.
- ەۋروپالىق وداق ورتالىق ازيامەن سەرىكتەستىكتى تەرەڭدەتۋ ءۇشىن ءوز ستراتەگياسىن ايقىندادى. قازاقستان - وڭىردەگى ەۋروپالىق وداقتىڭ نەگىزگى سەرىكتەسى. ەلدەرىڭىز باتىس پەن شىعىستىڭ، رەسەي مەن وڭتۇستىك ازيانىڭ اراسىنداعى كوپىر بولىپ سانالادى. ەۋروپالىق وداق - قازاقستاننىڭ نەگىزگى ساۋدا جانە ينۆەستيتسيالىق سەرىكتەسى. قازاقستانمەن سەرىكتەستىكتى جانە ىنتىماقتاستىقتى كەڭەيتۋ تۋرالى كەلىسىمدى ەۋروپالىق وداق ەلدەرى جۋىردا راتيفيكاتسيالايدى. ءبىز ونى جۇزەگە اسىرۋدى باستادىق، - دەدى ەۋروپالىق كەڭەستىڭ ءتوراعاسى.
قاسىم- جومارت توقايەۆ پەن دونالد تۋسك جۋرناليستەرگە كەلىسسوز بارىسىندا جاھاندىق جانە وڭىرلىك ماسەلەلەر جونىندە، سونداي- اق، ەنەرگەتيكا، كولىك جانە سيفرلىق كوممۋنيكاتسيا سالالارى بويىنشا ەكىجاقتى ىنتىماقتاستىقتى تەرەڭدەتۋ تۋرالى كەڭ كولەمدە جەمىستى پىكىر الماسقانىن ايتتى.