نۇرسۇلتان نازاربايەۆ: قازاقستاننان باسقا ەشقايدا بارعىم كەلمەيدى

نۇر-سۇلتان. قازاقپارات - ق ر تۇڭعىش پرەزيدەنتى - ەلباسى نۇرسۇلتان نازاربايەۆ ج و و تۇلەكتەرىنە زور سەنىم ارتاتىنىن مالىمدەدى، دەپ حابارلايدى قازاقپارات ءتىلشىسى.

«بارلىعىنا تابىس تىلەيمىن. ساپالى ءبىلىم جارقىن بولاشاققا جول اشادى. ۋنيۆەرسيتەتتە العان ءبىلىمدى تاجىريبە جۇزىندە ىسكە اسىرىپ، ەل يگىلىگى ءۇشىن قىزمەت ەتەتىن كەز كەلدى. قادامدارىڭىز قۇتتى بولسىن. بارشاڭىزعا ساتتىلىك، باياندى باقىت تىلەيمىن. ايتاتىن ءسوز بىرەۋ- اق: وسى ۋنيۆەرسيتەتتىڭ قابىرعاسىنان ۇشىپ شىعىپ، قازاقساننىڭ تۇلەگى بولىپ جەر ءجۇزىن شارلايتىن بولاسىزدار. قايدا جۇرسەڭدەر دە ۇمىتپاڭدار - ءبىزدىڭ بۇكىل دۇنيەدە جالعىز وتانىمىز بار. ول - قازاقستان. سولاي عوي!؟» - دەدى ەلباسى.

نۇرسۇلتان نازاربايەۆ ەلباسى رەتىندە كوپ نارسەلەردى قايتا ويلاپ جۇرگەنىن اتاپ ءوتتى.

«ويلاعانىمدى تۇجىرىمداپ، ەلگە قىزمەت ەتۋ جايىن ويلاستىرىپ ءجۇرمىن. مەن دۇنيەنىڭ بارلىق مەملەكەتتەرىن ارالاعان اداممىن. ومىرىمدە 200-دەن ارتىق پرەزيدەنتپەن كەزدەستىم. پرەمەرلەرمەن، عالىمدارمەن، ساياساتكەرلەرمەن جۇزدەستىم. دۇنيەنىڭ بارلىق ادەمى جەرىندە بولدىم. سونىڭ ءبارىن ارالاعانمەن، قازىر شىنىمدى ايتسام، قازاقستاننان باسقا ەشقايدا بارعىم كەلمەيدى. دەمالىسقا دا. قازاقستاندا قازىر ءبارى بار. بىلتىر ارنايى ارالاپ، كوپ جەردى كوردىم. قازاقستاندىقتاردىڭ كوبى تەڭىزگە بارادى. كاسپي تەڭىزىندە قازىر ۇلكەن كەشەن تۇرعىزىپ، 4-5 جۇلدىزدى قوناق ۇيلەر سالىنادى. ول ەشقايسىسىنان كەم بولمايدى. الاكول مەن بۋراباي دا سول. الماتى وبلىسىندا تاۋ- شاڭعىلى كەشەن اشىلعالى جاتىر»، - دەدى ول.

ەلباسى ەلدى كوركەيتىپ، تۋريستىك نىسانداردى دامىتا بەرسەك، شەتەلدىكتەر كوپ كەلەتىنىن اتاپ ءوتتى.

«وسى ۋنيۆەرسيتەتكە دە شەتەلدىك ستۋدەنتتەردى شاقىرىپ وتىرمىن. ولار ءالى بىلە بەرمەيدى. ءبىراق، بىلەتىن بولادى. سەبەبى، سىزدەر وسى ۋنيۆەرسيتەتتىڭ اتاعىن شىعاراسىزدار دەپ سەنەمىن»، - دەدى نۇرسۇلتان نازاربايەۆ.

ەسكە سالا كەتسەك، نازاربايەۆ ۋنيۆەرسيتەتىندە سالتاناتتى تۇردە V وقۋ ءبىتىرۋ ءراسىمى ءوتىپ جاتىر. بيىل اتالمىش ۋنيۆەرسيتەتتەگى تۇلەكتەر سانى - 963 ستۋدەنت. ونىڭ ىشىندە 565 ستۋدەنت - باكالاۆريات، 378 ستۋدەنت - ماگيستراتۋرا، 14 ى - مەديتسينا دوكتورى جانە 6 ستۋدەنت - دوكتورانتۋرا باعدارلاماسى بويىنشا وقۋ ءبىتىرىپ جاتىر.

تۇلەكتەردىڭ كوپشىلىگى - عىلىم جانە تەحنولوگيالار مەكتەبىنىڭ (270 تۇلەك)، ينجەنەريا مەكتەبىنىڭ (225 تۇلەك)، گۋمانيتارلىق جانە الەۋمەتتىك عىلىمدار مەكتەبىنىڭ (168) باكالاۆريات باعدارلاماسىنىڭ ستۋدەنتتەرى. ماگيسترلىك باعدارلاما بويىنشا جوعارى بيزنەس مەكتەبىن - 82 ستۋدەنت، جوعارى ءبىلىم بەرۋ مەكتەبىن - 80 تۇلەك، جوعارعى مەملەكەتتىك ساياسات مەكتەبىن - 49 تۇلەك، ينجەنەريا مەكتەبىن - 70 تۇلەك، عىلىم جانە تەحنولوگيالار مەكتەبىن - 34 تۇلەك، گۋمانيتارلىق جانە الەۋمەتتىك عىلىمدار مەكتەبىن - 19 تۇلەك، مەديتسينا مەكتەبىن - 27 تۇلەك، تاۋ-كەن ءىسى جانە جەر تۋرالى عىلىم مەكتەبىن - 20 تۇلەك اياقتاعان.