تۇركىستاندا ۇشەم بوسانعان ەكى انا امان-ەسەن پەرزەنتحانادان شىعارىلدى

تۇركىستان. قازاقپارات - تۇركىستاندا ەكى بىردەي انا ۇشەم بوسانىپ، بۇگىن پەرزەنتحانادان شىعارىلدى.

ءبىر ايدىڭ ىشىندە ەكى ۇشەمنىڭ ومىرگە كەلۋى وبلىس ورتالىعىندا العاش رەت تىركەلىپ وتىر، دەپ حابارلايدى قازاقپارات ءتىلشىسى.

تۇركىستان وبلىستىق №3 -پەريناتالدىق ورتالىقتا بوسانعان دينارا نارحانوۆا ءۇش ۇلدى ومىرگە اكەلدى. 1-مامىر كۇنى مەرزىمىنەن ەرتە بوسانعان 27 جاستاعى كەلىنشەكتىڭ نارەستەلەرى 1820 گرام، 1800 گرام، 1730 گرام بولعان. دارىگەرلەر العاشقى كەزدە شارانالاردىڭ جاعدايى اۋىر بولعانىن ايتادى. ولاردى جاساندى تىنىستانۋ اپپاراتىنا قوسىپ، ءبىر اي كولەمىندە دەنساۋلىقتارىنا ەرەكشە كۇتىم جاساعان. ءقازىر جاعدايلارى جاقسارىپ، سالماقتارى ەكى كەلىدەن اسقان. جاساندى ۇرىقتاندىرۋ جولىمەن جۇكتى بولعان كەلىنشەك بالالارىنىڭ ەسىمىن يكرام، يسلام جانە يمران قويىپتى. بۇعان دەيىن ءبىر قىزى بار وتباسىنىڭ پەرزەنتتەرى وسىلايشا ءتورت بالاعا كوبەيدى.

ال، ەكىنشى ۇشەمدەردى بوسانعان سايەرا تۋكليەۆا 29 جاستا. بىرلىك اۋىلىندا تۇراتىن كەلىنشەك پەرزەنتتەرىن 27 -مامىر كۇنى بوسانعان. كەسار تىلىگى ارقىلى ەكى قىز بەن ءبىر ۇلدى ومىرگە اكەلگەن جاس انانىڭ ۇيىندە تاعى ءۇش پەرزەنتى بار. نارەستەلەرى دە ايى كۇنىنە تولىپ، بۇگىن ءوز ۇيلەرىنە جىبەرىلدى.

«ۇشەمدەرگە جۇكتى ەكەنىمدى بەسىنشى اپتادا ءبىلدىم. ءۇي-ىشىمىزبەن قۋاندىق. باستاپقى جۇكتىلىك كەزىندە ءبىراز قينالعان كەزدەرىم بولدى. ءبىراق ەرەكشە كۇتىم جاساپ، دارىگەرلەردىڭ ايتقانىن تىڭدادىم. پەرزەنتتەرىمدى امان- ەسەن بوسانىپ الدىم. دارىگەرلەرگە العىس ايتقىم كەلەدى، بىزگە جاقسى ەم- دوم جاساپ، جاقسى قارادى. ەسىمدەرىن فاتيما، يسمايل، زۋحرا دەپ قويدىق. وسىلايشا ومىرگە ءۇش پەرزەنت اكەلىپ، باتىر انا اتاندىم. اللا تاعالاما وسىنداي پەرزەنتتەر بەرگەنى ءۇشىن ريزامىن»، - دەيدى سايەرا تۋكليەۆا.

بۇگىن قوس انا مەن نارەستەلەرىنە وبلىستىق اكىمدىكتىڭ اتىنان سىي- سىياپاتتار جاسالدى. ءار نارەستەگە اربا مەن كەرۋەتتەر، كيىم- كەشەكتەر مەن ويىنشىقتار تابىستادى. ءوز كەزەگىندە وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ سابيلەردىڭ الداعى ۋاقىتتا دا ەرەكشە كۇتىمگە الىناتىنىن ايتادى.

«قازىرگى تاڭدا نارەستەلەردىڭ بارلىعىنىڭ جاعدايى جاقسى. باستاپقى كەزدە سالماقتارى ازداۋ بولعاندىقتان، ولاردى دارىگەرلەر قاراۋىنا الدى. مەديتسينالىق كۇتىم جاساپ، بۇگىن ۇيلەرىنە جاقسى جاعدايدا شىعارىپ جاتىرمىز. بۇدان بىلاي ءار وتباسىنا مەديبيكە بولىنەتىن بولادى. وسى ۇشەمدەردىڭ جاعدايىن قاراپ، باقىلاۋدا ۇستاپ وتىراتىن بولامىز»، - دەدى مۇقان ەگىزبايەۆ.

ايتا كەتەيىك، جىل باسىنان بەرى وڭىردە ءۇش ۇشەم دۇنيەگە كەلگەن. ەكى انا تۇركىستان قالاسىندا، تاعى ءبىر انا شىمكەنت قالاسىنداعى وبلىستىق پەريناتالدىق ورتالىقتا بوسانعان.