ەلباسى: نازاربايەۆ ۋنيۆەرسيتەتى - تاۋەلسىز قازاقستاننىڭ ماڭىزدى ءارى بىرەگەي جوباسى
«قىمباتتى تۇلەكتەر! قادىرلى ۇستازدار. بۇگىن ءبىز بارشامىز ەرەكشە ەستە قالاتىن سالتاناتتى راسىمگە جينالىپ وتىرمىز. بۇل ءبىزدىڭ - بەسىنشى مارتە جينالۋىمىز. ەلىمىزدىڭ ماقتانىشىنا اينالعان نازاربايەۆ ۋنيۆەرسيتەتى تۇلەكتەرىنىڭ بەسىنشى لەگى ۇلكەن ومىرگە جولداما الدى. تاۋەلسىزدىك جىلدارى جاسالعان كوپتەگەن شارۋالاردىڭ ىشىندەگى ەڭ ءبىر جاقسىسى دا، قاجەتى دە - وسى ۋنيۆەرسيتەت بولدى دەپ سانايمىن. بۇل - ستۋدەنتتەر مەن اتا- انالار قاۋىمى، وقۋىتۋشىلار مەن ۋنيۆەرسيتەت ۇجىمى ءۇشىن مارتەبەلى ءارى مەرەيلى ءسات. وسىعان وراي سىزدەردى جانە ەلىمىزدىڭ قازىرگى جوعارعى وقۋ ورىندارىن ءبىتىرىپ وتىرعان بارلىق جاستاردى شىن جۇرەكتەن قۇتتىقتايمىن»، - دەدى ەلباسى نازاربايەۆ ۋنيۆەرسيتەتتە ءوتىپ جاتقان سالتاناتتى شارادا.
ەلباسى ءوز سوزىندە «نازاربايەۆ ۋنيۆەرسيتەتى - تاۋەلسىز قازاقستاننىڭ ماڭىزدى ءارى بىرەگەي جوباسى» سانالاتىنىن اتاپ ءوتتى.
«قىسقا مەرزىم ىشىندە ءبىلىم ورداسى حالىقارالىق دەڭگەيدەگى بەدەلدى وقۋ ورىندارىنىڭ قاتارىنا قوسىلعانىن ءبارىمىز بىلەمىز. قازىر بۇل ۋنيۆەرسيتەت زاماناۋي ءبىلىم بەرۋ جۇيەسىن قالىپتاستىرىپ، ەلىمىزدەگى ج و و- لاردىڭ كوشىن باستاپ كەلەدى. وسى ۋنيۆەرسيتەتكە قاراپ ءبارى بوي تۇزەيدى. مۇنداي جەتىستىككە جەتۋ ءۇشىن ارينە، وسى جىلداردىڭ ىشىندە كوپ جۇمىس اتقارىلدى. ەڭ الدىمەن، وقىتۋشىلار مەن ۋنيۆەرسيتەت ۇجىمى زور ەڭبەك ءسىڭىردى. مەن ونى ىلعي باقىلاپ وتىرامىن. بيىل ۋنيۆەرسيتەتتى 900 دەن استام ستۋدەنت تابىستى اياقتاعالى وتىر. تۇلەكتەرىمىز ەگەمەن ەلىمىزدى وركەندەتىپ، قازاقستاندى زامان تالابىنا ساي جاڭعىرتۋعا اتسالىسسا ەكەن دەيمىن. ءبىزدىڭ كورىپ وتىرعان بولاشاعىمىز، دۇنيەجۇزىندەگى جاعداي - ءبىلىم مەن عىلىمى دامىعان ەل عانا وزىق بولا الاتىنىن، باسەكەگە ساي بولا الاتىنىن كورسەتىپ وتىر. سوعان دايىن بولۋ ءۇشىن مەن سەندەردى دايىندادىم. «بولاشاق» باعدارلاماسىمەن ءبىلىم العان، وسى ۋنيۆەرسيتەتتى اياقتاعان الدىڭعى قاتارلى جاستار مەملەكەتتىڭ ءاربىر سالاسىندا جۇمىس ىستەپ، ەلىمىزدى بولاشاققا باستايدى دەپ سەنەمىن»، - دەدى نۇرسۇلتان نازاربايەۆ.
ەسكە سالا كەتسەك، نازاربايەۆ ۋنيۆەرسيتەتىندە سالتاناتتى تۇردە V وقۋ ءبىتىرۋ ءراسىمى ءوتىپ جاتىر. بيىل اتالمىش ۋنيۆەرسيتەتتەگى تۇلەكتەر سانى - 963 ستۋدەنت. ونىڭ ىشىندە 565 ستۋدەنت - باكالاۆريات، 378 ستۋدەنت - ماگيستراتۋرا، 14 ى - مەديتسينا دوكتورى جانە 6 ستۋدەنت - دوكتورانتۋرا باعدارلاماسى بويىنشا وقۋ ءبىتىرىپ جاتىر.
تۇلەكتەردىڭ كوپشىلىگى - عىلىم جانە تەحنولوگيالار مەكتەبىنىڭ (270 تۇلەك)، ينجەنەريا مەكتەبىنىڭ (225 تۇلەك)، گۋمانيتارلىق جانە الەۋمەتتىك عىلىمدار مەكتەبىنىڭ (168) باكالاۆريات باعدارلاماسىنىڭ ستۋدەنتتەرى. ماگيسترلىك باعدارلاما بويىنشا جوعارى بيزنەس مەكتەبىن - 82 ستۋدەنت، جوعارى ءبىلىم بەرۋ مەكتەبىن - 80 تۇلەك، جوعارعى مەملەكەتتىك ساياسات مەكتەبىن - 49 تۇلەك، ينجەنەريا مەكتەبىن - 70 تۇلەك، عىلىم جانە تەحنولوگيالار مەكتەبىن - 34 تۇلەك، گۋمانيتارلىق جانە الەۋمەتتىك عىلىمدار مەكتەبىن - 19 تۇلەك، مەديتسينا مەكتەبىن - 27 تۇلەك، تاۋ-كەن ءىسى جانە جەر تۋرالى عىلىم مەكتەبىن - 20 تۇلەك اياقتاعان.