اقمولا وبلىستىق پ د 20 قىزمەتكەرى مەن قۇقىق قورعاۋ ورگاندارى سالاسىنىڭ 10 ارداگەرىنەن تۇراتىن دەلەگاتسيا اقمول كەنتىندەگى «الجير» مەموريال-مۇراجاي كەشەنىندە بولدى. پ د باستىعىنىڭ تىكەلەي تاپسىرماسىمەن ۇيىمداستىرىلعان شارا بارىسىندا دەلەگاتسيا مۇشەلەرى كەشەننىڭ ءىشىن ارالاپ كوردى. «الجير» لاگەرىندە جازاسىن وتەگەن ساياسي قۋعىن-سۇرگىن قۇرباندارىن ەسكە الىپ، 7 مىڭ ايەلدىڭ ەسىمى جازىلعان مەموريالدىق تاقتاعا گۇل دەستەلەرىن قويدى.
ەكۋرسياعا قاتىسۋشىلار مۇراجاي اۋماعىنداعى «قايعى قاقپاسى» مونۋمەنتى، شولۋ مۇناراسى، «كۇرەس پەن ءۇمىت» جانە «اشىنۋ مەن دارمەنسىزدىك» سەكىلدى ەكى مۇسىندىك كومپوزيتسيا، سونداي-اق «ەسكە الۋ قابىرعاسى»، گۋلاگ كارتاسى سالىنعان «جاس» ستەللانى ارالاپ كوردى.
ايتا كەتۋ كەرەك، «الجير» لاگەرىندە ءازيزا رىسقۇلوۆا مەن ونىڭ اناسى ءاريپا ەسەنعۇلوۆا، دامەش جۇرگەنوۆا، رابيعا اسفەندياروۆا، ءانشى ليديا رۋسلانوۆا، جازۋشى گالينا سەرەبرياكوۆا، مارشال تۋحاچيەۆسكيدىڭ وتباسىنداعى ايەلدەر، جازۋشىلار بوريس پيلنياكتىڭ ايەلى كيرا اندروننيكوشۆيلي، يۋري تريفونوۆتىڭ ايەلى ەۆگەنيا لۋرە، بولات وكۋدجاۆا مەن مايا پليسەتسكايانىڭ انالارى سياقتى مەملەكەت، ساياسات جانە قوعام قايراتكەرلەرىنىڭ ايەلدەرى جازاسىن وتەگەن.
ەكسكۋرسياعا قاتىسقان كوكشەتاۋ قالالىق پوليتسيا باسقارماسىنىڭ قىزمەتكەرلەرى العان اسەرلەرىمەن ءبولىستى.
«مۇندايدى ۇمىتۋ مۇمكىن ەمەس. مۇراجايدى ارالاعاندا ۇلكەن اسەر الىپ، سول كەزدەگى لاگەر تۇتقىندارىنىڭ تارتقان بەينەتىن تۇسىنەسىڭ»، - دەيدى ەكسكۋرسياعا قاتىسۋشىلار.
اسىرەسە، «الجير» لاگەرىنە گرۋزيادان جەتكىزىلگەن تۇتقىنداردىڭ ءومىرى مەن تارتقان ازابى جانە ءۇمىت-ارماندارى تۋرالى كوركەم دراما ەرەكشە اسەر قالدىردى.
«مۇنداي شارانىڭ ماڭىزى زور. ءوز حالقىڭنىڭ تاريحىن ءبىلىپ، بۇگىنگى قۇندىلىقتارىن سارالاۋعا مۇمكىندىك بەرەدى»، - دەيدى پولتسەيلەر.