باسقا ۇلتتىڭ وكىلدەرى قازاق تىلىنەن سايىسقا ءتۇستى

قىزىلوردا. قازاقپارات - قىزىلوردادا «مەملەكەتتىك ءتىل - ۇلت تىرەگى» تاقىرىبىمەن وزگە ۇلت وكىلدەرى اراسىندا سايىس ءوتتى، دەپ حابارلايدى قازاقپارات ءتىلشىسى.

اتالمىش ءىس-شارا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى نەگىزىندە جۇزەگە اسىرىلدى.

قالالىق بايقاۋعا مەكتەپ وقۋشىلارىنان قۇرالعان كوماندالار قاتىستى. ماقساتى - مەملەكەتتىك ءتىل ساياساتىن ناسيحاتتاۋ، ەتنوسارالىق قارىم- قاتىناستى جاھانداندىرۋ، مەملەكەتتىك تىلگە دەگەن قۇرمەتتى ارتتىرۋ. بايقاۋعا №5 -مەكتەپ- ليتسەي، №9 -مەكتەپ- گيمنازياسى، №23، №112، №173، №176، №198، №233 -ورتا مەكتەبىنەن كوماندالار قاتىستى.

ولار «تانىستىرۋ»، «وي جارىس»، «سالت-ءداستۇر - ۇلت قازىناسى»، «ونەرلىنىڭ ءورىسى كەڭ» دەگەن ءتورت كەزەڭ بويىنشا باق سىناستى.

ءاربىر مەكتەپتەن كەلگەن ءتۇرلى ۇلت وكىلدەرى قازاقشا ءان ايتىپ، ۇلى اقىنداردىڭ شىعارمالارىنان ءۇزىندى وقىدى. سونداي-اق، قازاقتىڭ سالت-داستۇرلەرىن ساحنالاپ، ماقال-ماتەل ايتۋدان سايىسقا ءتۇستى.

 

ناتيجەسىندە باس جۇلدەنى №112 -ورتا مەكتەپتىڭ «بىرلىك» كومانداسى قانجىعاسىنا بايلادى. ال، ءبىرىنشى ورىنعا №198 -مەكتەپتىڭ «دوستىق» كومانداسى لايىق دەپ تانىلدى. قالعان ورىنداردى №233، №9، №5، №23 جانە №173 -مەكتەپتەن كەلگەن توپتار ءوزارا ءبولىستى.

قازىلار القاسىنىڭ ءتوراعاسى امان اباسيلوۆ: «تىلگە قۇرمەت كورسەتۋدىڭ ءتۇرلى جولى بار. ەلباسى «بولاشاققا باعدار: رۋحاني جاڭعىرۋ: بولاشاققا باعدار» ماقالاسىندا «وتكەن ⅩⅩ عاسىر حالقىمىز ءۇشىن قاسىرەتكە تولى، زوبالاڭ دا زۇلمات عاسىر بولدى. بىرىنشىدەن، ۇلتتىق دامۋدىڭ كونەدەن جالعاسىپ كەلە جاتقان وزىمىزگە عانا ءتان جولى ءبىرجولا كۇيرەتىلىپ، قوعامدىق قۇرىلىمنىڭ بىزگە جات ۇلگىسى ەرىكسىز تاڭىلدى. ەكىنشىدەن، ۇلتىمىزعا ادام ايتقىسىز دەموگرافيالىق سوققى جاسالدى. ونىڭ جاراسى ءبىر عاسىردان بەرى ءالى جازىلماي كەلەدى. ۇشىنشىدەن، قازاقتىڭ ءتىلى مەن مادەنيەتى قۇر¬دىمعا كەتە جازدادى» دەپ ۇلتتىق كودىمىزعا جاسالعان قياناتتاردى اتاپ كورسەتەدى. ال، وسىنداي شارالار ءتىلدىڭ، سالت- ءداستۇر مەن مادەنيەتىمىزدىڭ قايتا جاڭعىرۋىنا، ەۆوليۋتسيالىق دامۋعا اكەلەتىنى ءسوزسىز. جانە وزگە ۇلت وكىلدەرىنىڭ اراسىندا وتكىزىلۋىندە دە ۇلكەن ءمان بار ەكەنىن ەسكەرۋىمىز كەرەك»، - دەدى.