قازاقستاندا تۇڭعىش رەت ەلەكتروموبيلدەر شەرۋى وتەدى
5 - ماۋسىمدا دۇنيەجۇزىلىك قورشاعان ورتانى قورعاۋ كۇنىنە وراي Jasyl Jol ەلەكتروموبيلدەر شەرۋى وتەدى. اتالمىش شارا بارىسىندا JAK ماركالى وتاندىق ەلەكتروموبيلدى سىناقتان وتكىزۋ جوسپارلانعان. قوستانايلىق زاۋىتتىڭ ءونىمى BMW, Lexus, Jaguar, Tesla سياقتى ايگىلى ماركا ونىمدەرىمەن باسەكەگە تۇسپەك. شەرۋگە حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى مۇرىندىق بولىپ وتىرعان. ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا اتالمىش ۇيىمنىڭ اپپارات باسشىسى ادىلبەك باسەكەيەۆ شارانىڭ شىعىندارىن دەمەۋشىلەر كوتەرەتىنىن ايتتى.
«اۆتوشەرۋ نۇر- سۇلتان - بۋراباي - نۇر- سۇلتان باعىتىندا وتەدى. وعان 7 ماركانىڭ ءونىمى قاتىسادى. اراسىندا ءبىر ەلەكتروبۋس تا بار. اتموسفەرانىڭ لاستانۋىنا بۇكىل الەم بولىپ قارسى تۇرىپ جاتقاندا بىزدە ءوز ۇلەسىمىزدى قوسۋ ءۇشىن وسى شارانى قولعا الدىق»، - دەيدى ادىلبەك باسەكەيەۆ.
اۆتور: ەسىمجان ناقتىباي