قازاق دالاسىنا قانشا ادام دەپورتاتسيالاندى
بولجامدى ساندى ەلورداداعى ساياسي قۋعىن-سۇرگىن مەن اشارشىلىق قۇرباندارىن ەسكە الۋ كۇنىنە ارنالعان ق ح ا-نىڭ «تاريحتان تاعىلىم - وتكەنگە تاعزىم» حالىقارالىق X فورۋمىندا قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ءجاميلا ءابدىقادىروۆا ايتتى، دەپ حابارلايدى قازاقپارات ءتىلشىسى.
«ق ر تۇڭعىش پرەزيدەنتى - ەلباسى نۇرسۇلتان نازاربايەۆ ق ح ا- نىڭ XIIسەسسياسىندا «ⅩⅩ عاسىردا قازاقستان اۋماعىندا كوپەتنيكالىق حالىقتىڭ قالىپتاسۋىنىڭ كۇردەلى كەزەڭى» وتكەنىن ايتقان ەدى. ستاليندىك رەجيم كەزىندە ءار جىلدارى تۇتاستاي حالىقتار قازاق جەرىنە جەر اۋدارىلىپ جاتتى. جالپى العاندا، 5 ميلليون ادامعا دەيىن ادام دەپورتاتسيالاندى. جەر اۋدارىلعان حالىقتاردىڭ تاعدىرىن زەرتتەۋ ۇزاق ۋاقىت مۇمكىن بولمادى. ساتتار فازىل ۇلى (ق ر پرەزيدەنتى جانىنداعى «قوعامدىق كەلىسىم» ر م م ديرەكتورى، تاريح عىلىمدارىنىڭ دوكتورى) بۇعان دەيىنگى كىتاپتىڭ تۇساۋكەسەرىندە اتاپ وتكەندەي، تاريحشىلار تاۋەلسىزدىك العان جىلداردان باستاپ زەرتتەۋ جۇمىستارىن جۇرگىزگەنىمەن، قۇجاتتاردىڭ كوبىنە قول جەتكىزۋ قيىن بولدى»، - دەيدى ءجاميلا ءابدىقادىروۆا.
ءجاميلا ءابدىقادىروۆا ءوز سوزىندە پرەزيدەنت ءارحيۆى 2004-2008 -جىلدارى كەڭ اۋقىمدى جۇمىس جۇرگىزگەنىن، ال ۇكىمەتارالىق كوميسسيا وسى قۇجاتتاردى قاراپ، كوبىن كوممۋنيستىك پارتيانىڭ ورتالىق كوميتەتىنىڭ فۋنكتسياسى رەتىندە قۇپيالاۋ تۋرالى شەشىم شىعارعانىن اتاپ ءوتتى. الايدا، جۇمىس اينالىمىنا 40 مىڭعا تارتا قۇجات ەنگىزىلگەن.
«قازاقستان حالقىنىڭ ينتەراكتيۆتى كارتاسىن ازىرلەۋ تۋرالى ۇسىنىسقا بايلانىستى حالىقتىڭ كوپۇلتتى قۇرامىن زەرتتەۋ جۇمىسىنا جاڭا سەرپىن بەرىلدى. 2010 -جىلى تمد تاريحشىلارىنىڭ فورۋمىندا مەملەكەت باسشىسى دەپورتاتسيالانعان حالىقتاردىڭ تاعدىرىن زەرتتەۋ جۇمىسىنا كىرىسۋدى تاپسىردى. وسىعان بايلانىستى پرەزيدەنت ءارحيۆى قحا- مەن بىرلەسە وتىرىپ، دەپورتاتسيالانعان حالىقتاردى قابىلداۋ جانە ورنالاستىرۋ بويىنشا دەرەكتى جيناقتاردىڭ سەرياسىن دايىندادى. سونداي- اق، قۇجات جيناقتارىندا گۋلاگ جۇيەسىندەگى ارنايى مەكەمەلەردەگى رەجىمدى كۇشەيتۋ تاريحى، زورلىقپەن كوشىرىلگەن ميگرانتتاردى ورنالاستىرۋ ماسەلەلەرى، ەرىكسىز ەڭبەككە تارتۋ تۋرالى دەرەكتەر بەرىلگەن»، - دەدى ءجاميلا ءابدىقادىروۆا.
ەسكە سالا كەتسەك، ەلوردادا قازاقستان حالقى اسسامبلەياسى ساياسي قۋعىن-سۇرگىن مەن اشارشىلىق قۇرباندارىن ەسكە الۋ كۇنىنە ارنالعان «تاريحتان تاعىلىم - وتكەنگە تاعزىم» حالىقارالىق X فورۋمى ءوتىپ جاتىر. اتالمىش فورۋمدا اقپارات جانە قوعامدىق دامۋ ءمينيسترى داۋرەن ابايەۆ ءسوز سويلەپ، ستاليندىك رەپرەسسيانىڭ قۇرباندارى بويىنشا ورتاق ازا - قازاقستاندىقتاردى بىرىكتىرەتىن فاكتورعا اينالۋى ءتيىس» ەكەنىن ءمالىم ەتتى.