سولتۇستىك قازاقستان وبلىسىندا ىسساپارمەن جۇرگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ «رادۋگا» ج ش س كاسىپورنىنا باردى. بۇل زاۋىت وبلىستا العاشقىلاردىڭ ءبىرى بولىپ سىبايلاس جەمقورلىققا قارسى جوبا اياسىندا جۇمىس ىستەۋگە كەلىسىم جاساستى. كومپانيا قىزمەتكەرلەرى سونداي- اق سىبايلاس جەمقورلىققا قارسى وقۋدان ءوتتى.
كاسىپورىن ازىق- تۇلىك، پلاستماسسا جانە مەتالل بۇيىمدارى، تۇرمىستىق حيميا ونىمدەرىن شىعارادى. بۇدان باسقا قوقىستى بولەك جيناپ، قايتا وڭدەۋمەن اينالىسادى. ج ش س باس ديرەكتورى دميتري شاراپايەۆتىڭ ايتۋىنشا، جاقىن ارادا وبلىس تۇرعىندارىن جەرگىلىكتى سابىنمەن تولىق قامتاماسىز ەتەتىن ءوندىرىستى جولعا قويۋ جوسپارلانعان.
كومپانيانىڭ قازاقستاننىڭ ءىرى قالالارىندا دامىعان ديستريبيۋتەرلىك جەلىسى بار. ج ش س سەحتارىندا وندىرىلگەن تاۋارلاردى رەسەي مەن قىتاي دۇكەندەرىنەن دە ساتىپ الۋعا بولادى.
ايتا كەتۋ كەرەك، وتكەن جىلدىڭ سوڭىندا «رادۋگا» ج ش س «التىن ساپا - 2018» سىيلىعىنىڭ «حالىق تاۋارلارىن شىعاراتىن ۇزدىك كاسىپورىن» اتالىمىنا يە بولدى. سونداي- اق، حالىقتىڭ داۋىس بەرۋ ناتيجەسى بويىنشا «ۇزدىك كاسىپكەر» نوميناتسياسىندا "رادۋگا" ج ش س باس ديرەكتورى لاۋرەات اتاندى.